Maisha na Huduma ya Yesu

Je! Yohana Alikuwa na Ukosefu wa Imani?

YOHANA Mbatizaji, ambaye amekuwa gerezani kwa karibu mwaka mmoja sasa, anapokea ripoti juu ya ufufuo wa mwana wa mjane kwenye mji wa Naini. Lakini Yohana anataka kusikia moja kwa moja kutoka kwa Yesu juu ya umaana wa jambo hilo, kwa hiyo anatuma wawili wa wafuasi wake wakaulize hivi: “Wewe ndiwe Yule Ajaye, au tumtazamie mwingine?”

Huenda hilo likaelekea kuwa ulizo la kiajabu, hasa kwa kuwa Yohana amekwisha kuona roho ya Mungu ikishuka juu ya Yesu na amekwisha kusikia sauti ya Mungu ya kibali alipokuwa akimbatiza karibu miaka miwili kabla ya hapo. Huenda ulizo la Yohana likafanya wengine wakate shauri kwamba imani yake imedhoofika. Lakini hivyo sivyo ilivyo. Yesu hangesifu sana Yohana, kama anavyofanya katika pindi hii, kama Yohana ameanza kutia shaka. Basi, mbona Yohana anauliza ulizo hilo?

Huenda ikawa Yohana anataka afahamishwe waziwazi tu na Yesu kwamba Yeye ndiye Masihi. Jambo hilo lingemtia nguvu sana Yohana anaponyong’onyea gerezani. Lakini Inaonekana kuna zaidi yanayohusika katika ulizo la Yohana. Ni wazi yeye anataka kujua kama kuna mwingine atakayekuja, mwandamizi, inaweza kusemwa hivyo, atakayekamilisha utimizo wa mambo yote yaliyotabiriwa kufanywa na masihi.

Kulingana na mambo ya unabii wa Biblia ambayo Yohana amezoelea, Mpakwa-mafuta wa Mungu atakuwa mfalme mkombozi. Na bado Yohana angali ameshikwa akiwa mfungwa gerezani, hata miezi mingi baada ya Yesu kubatizwa. Kwa hiyo ni wazi Yohana anauliza Yesu: ‘Je wewe ndiwe utakayesimamisha Ufalme wa Mungu katika uwezo wa ki-nje au kuna mwingine tofauti, mwandamizi, ambaye sisi tunapaswa kumngojea atimize mambo yote ya unabii yanayohusiana na utukufu wa Masihi?’

Badala ya kuambia wafuasi wa Yohana ‘Bila shaka mimi ndiye yule aliyepaswa kuja!’ Yesu anaonyesha katika saa iyo hiyo wonyesho wa kustaajabisha kwa kuponya watu wengi magonjwa na maradhi ya aina zote. Halafu anaambia wafuasi: “Nendeni mkamweleze Yohana hayo mliyoyaona na kuyasikia; vipofu wanapata kuona, viwete wanatembea, wenye ukoma wanatakasika, viziwi wanasikia, wafu wanafufuliwa, maskini wanahubiriwa habari njema. Naye [mwenye furaha ni] mti ye yote asiyechukizwa nami [asiyejikwaa juu yangu, NW].”

Ndiyo kusema, kwa kuwa ulizo la Yohana huenda likatoa wazo la kwamba anatazamia Yesu afanye mengi zaidi ya anayofanya, kama vile kumweka huru Yohana mwenyewe, Yesu anaambia Yohana asitazamia mengi kuliko hayo.

Wakati wafuasi wa Yohana wanapoondoka, Yesu anageukia makutano na kuwaambia kwamba Yohana ndiye “mjumbe” wa Yehova aliyetabiriwa katika Malaki 3:1 na pia ndiye nabii aliyetabiriwa na Eliya katika Malaki 4:5, 6. Hivyo yeye anatukuza Yohana kuwa analingana na nabii ye yote aliyeishi kabla yake, akieleza hivi:

“Amin, nawaambieni, Hajaondokea mtu katika wazao wa wanawake aliye mkuu kuliko Yohana Mbatizaji; walakini aliye mdogo katika ufalme wa mbinguni ni mkuu kuliko yeye. Tangu siku za Yohana Mbatizaji hata sasa ufalme wa mbinguni [ndio mradi ambao kuelekea huo watu hukazana, na wale wanaokazana wakisonga mbele ndio wanaounyakua, NW.”

Hapa Yesu anaonyesha kwamba Yohana hatakuwa katika Ufalme wa kimbingu, kwa kuwa aliye mdogo kule ni mkubwa kuliko Yohana. Yohana alitayarishia Yesu njia, lakini kifo chake kinatukia kabla Kristo hajatia muhuri lile agano au mapatano, pamoja na wafuasi wake wakawe watawala-wenzi pamoja naye katika Ufalme wake. Hiyo ndiyo sababu Yesu anasema kwamba Yohana hatakuwa katika Ufalme wa kimbingu. Badala ya hiyo Yohana atakuwa raia wa kidunia wa Ufalme wa Mungu. Luka 7:18-30; Mathayo 11:2-15.

◆ Kwa sababu gani Yohana anauliza kama Yesu ndiye Yule Anayekuja au kama mtu mwingine tofauti anapaswa kutazamiwa?

◆ Ni mambo gani ya unabii ambayo Yesu anasema Yohana alitimiza?

◆ Kwa sababu gani Yohana Mbatizaji hatakuwa mbinguni pamoja na Yesu?