Mapainia Hutoa na Kupokea Baraka

“KUPAINIA kuna thamani zaidi ya kazi-maisha ya kimwili yenye mafanikio. Hakuna jambo linaloridhisha zaidi ya kusaidia watu wapate kumjua Yehova na kweli yake.” Ndivyo alivyosema mwanamke mmoja Mkristo aliyechagua kupainia—kuhubiri Ufalme kwa wakati wote—kuwa kazi-maisha yake. Ni kazi-maisha nyingine ngapi ziwezazo kutoa furaha ya jinsi hiyo?

Kupainia ni mradi wa hali ya juu na pia pendeleo lenye thamani. Mtu mmoja-mmoja aweza kuchaguaje maisha ya jinsi hiyo? Ni nini kinachohitajiwa ili kushikamana na upainia kwa muda mrefu wa kutosha kuweza kuvuna baraka ambazo huo hutoa?

Mambo mawili ni muhimu. Kwanza, hali zifaazo. Wengi huishi katika hali ambazo kwa wazi hufanya kupainia kusiwezekane. Na pili, sifa za kiroho na mtazamo ufaao. Bila shaka, iwe hali za sasa zamruhusu mtu apainie au la, wote waweza kujitahidi kukuza sifa za Kikristo zenye ukomavu.

Sababu kwa Nini Wengine Hupainia

Ni nini zilizo sifa za kustahili za upainia wenye mafanikio? Stadi za kuhubiri ni muhimu. Mapainia wahitaji kujua jinsi ya kutoa habari njema kwa watu wasiowajua, kufanya ziara za kurudia kwa wanaopendezwa, na kuongoza mafunzo ya Biblia nyumbani. Ukosefu wa stadi hizo waweza kumvunja moyo painia. Hata hivyo, mambo mengine ni ya maana pia.

Kwa kielelezo, kila jambo lihusulo ibada yetu lahusiana na uhusiano wetu na Yehova na tengenezo lake. Hilo latia ndani kupainia. Painia mchanga aitwaye Rado alieleza hivi: “Kwa kijana, hakuna jambo zuri zaidi ya kumkumbuka Yehova na kutembea katika njia ya kweli.” Ndiyo, kupainia ni njia nzuri kwa vijana kuonyesha wampenda Yehova na ukaribu wao kwake.—Mhubiri 12:1.

Ujuzi na uelewevu ni za lazima pia. (Wafilipi 1:9-11) Kwa kweli, hayo ndiyo mafuta yaendelezayo injini yetu ya kiroho ikitenda kazi. Funzo la kibinafsi la kawaida ni muhimu ili kuepuka kuwa na uchovu wa kiroho, huku tukipoteza idili na usadikisho wetu. Bila shaka, ujuzi tunaotwaa ndani haupaswi uathiri akili pekee bali pia na moyo. (Mithali 2:2) Kwa hiyo, kuongezea funzo la kibinafsi, twahitaji wakati kwa ajili ya sala na kutafakari ili ujuzi tunaopata uguse moyo. Kisha, hali zetu zikiruhusu, tutataka kupainia.—Linganisha Ezra 7:10.

Kuchukua utumishi wa painia hutaka pia ile roho ya kujidhabihu. Kijana aitwaye Ron alikuwa amefanya mipango yake yote ili kupainia. Alikuwa akingojea tu hali zifaazo ili aweze kupainia. Hasa, alitaka kazi ambayo ingemruhusu apainie na wakati uleule afurahie anasa za maisha. Alipotaja hilo kwa dada mmoja mkomavu jibu lake lilimshtua. Dada huyo alisema hivi: “Yehova hubariki matendo, si ahadi.” Kijana huyo alipata kazi yenye mshahara wa chini zaidi uliomruhusu wakati wa kupainia. Kutumia Mathayo 6:25-34 kutamsaidia mtu aweze kufaulu ajapopata mshahara wa chini.

Nia yenye unyenyekevu ya kufuata madokezo mazuri yaweza kuchangia sana kuingia kwetu katika utumishi wa painia. Mapema maishani mwake akiwa Mkristo, Hanna alikuza tamaa ya kupainia. Lakini yeye hakupainia wakati alipokuwa akilea familia, na baadaye yeye alihusika katika kazi-maisha ya kibiashara. Kwa kutii shauri zuri kutoka kwa wazee walio macho, aliacha kazi-maisha yake ya kimwili yenye kupendeza akaanza utumishi wa painia. Sasa Hanna ana shangwe nyingi katika kuwaleta wengine kufikia hatua ya kujiweka wakfu na kusaidia wasiotenda.

Shukrani kwa ajili ya yale ambayo kweli imefanya maishani mwa mtu yaweza pia kuwa kichocheo cha kupainia. Fikiria hali ya mwanamke mmoja aliyeshuka moyo sana ambaye ndoa yake ilikuwa ikivunjika. Hali hiyo ilibadilika kwa njia ya kutokeza alipojifunza kweli ya Neno la Mungu na kuizoea. Akisisimuliwa na yale ambayo kweli ilikuwa imemfanyia, aliamua kwamba njia bora zaidi ya yeye kuonyesha uthamini ingekuwa kupainia na kuwasaidia wengine. Ndivyo alivyofanya, na sasa ana baraka za kuwa na mafunzo mengi ya Biblia na maisha ya familia yenye furaha.

Wengine Waweza Kusaidia

Mara nyingi mapainia hutokeza mapainia wengine. Rado, aliyetajwa mapema, alikuwa na miaka sita wakati mapainia wawili walipojifunza Biblia pamoja na wazazi wake. Alipokuwa bado ni mchanga sana, aliandamana kwa ukawaida na wahubiri hao wa wakati wote katika huduma ya shambani. Rado mwenyewe alikuwa painia wa kawaida akiwa na umri wa miaka 17. Mwanamume mwingine mchanga, Arno, alilelewa katika nyumba ya Kikristo lakini alikuwa dhaifu kiroho. Baadaye, alijitahidi kurudisha nguvu zake za kiroho, na sasa yeye husema hivi: “Nilipokea kitia-moyo kingi kutoka kwa mapainia. Nilishirikiana nao hasa wakati wa malikizo ya shule na nyakati nyingine niliripoti kadiri ya muda wa saa 60 kwa mwezi katika utumishi wa shambani. Baada ya hiyo, hatua ya kufikia utumishi wa painia wa kawaida [uliotaka muda wa saa 90 kwa mwezi] haikuwa kubwa sana.” Kwa kweli kutafakari juu ya shauri la 1 Wakorintho 7:29-31 juu ya kutoutumia ulimwengu kikamili kumesaidia vijana kama hao.

Roho ya painia yaweza kutia mizizi kwa urahisi katika nyumba ambamo masilahi ya kiroho hutangulizwa na wazazi huwatia moyo watoto wao waingie katika huduma ya wakati wote. Philo, aliyekulia katika nyumba ya jinsi hiyo, asema hivi: “Wengi walinishauri niendelee na elimu yangu, kufanyia kazi wakati ujao wa kimwili. Lakini wazazi wangu walinisaidia nifanye chaguo lenye hekima zaidi. Waliniambia kwamba ikiwa kwa kweli nilitaka kujengea wakati ujao, jambo nililopaswa kutanguliza ni kukuza uhusiano pamoja na Yehova.”

Mwanamke mchanga aitwaye Thamar pia aona kwamba kielelezo na jitihada za wazazi wake ndizo zilizomfanya aingie katika utumishi wa painia. Yeye asema hivi: “Kwa kweli siwezi kusema ni lini nilipokuza maoni ya kiroho kuelekea uhai, lakini najua sikuzaliwa na maoni hayo. Desturi ya wazazi wangu ya kushiriki kwa ukawaida katika utumishi wa shambani na kuhudhuria mikutano, na pia kupenda kwao kweli kwa kina, kulinisaidia sana nikuze maoni yangu ya kiroho.”

Kushikamana na Uamuzi Wako

Baada ya mtu kuingia katika utumishi wa painia, kudumu katika huo humwezesha avune manufaa kamili ya uamuzi huo wenye hekima. Mashauri mengi yenye mafaa yangeweza kutolewa kwa kusudi hilo. Kwa kielelezo, mapainia hufanya vema kujifunza jinsi ya kuratibu wakati wao ili waufanye uwe wenye mazao mengi kadiri iwezekanavyo. Lakini, jambo la maana zaidi labaki kuwa uhusiano wa mtu mmoja-mmoja na Yehova na tengenezo Lake.

Jambo linalohusiana na hilo ni mtazamo wenye sala. “Nilipoipata kweli, nilitaka sana kupainia,” asema Cor. Hata hivyo, baba yake alitaka kwamba amalize kwanza mtalaa wake kwenye Chuo Kikuu cha Kilimo. Baadaye, Cor alianza kupainia. Baadaye alioa, na mke wake akajiunga naye katika kazi ya kupainia. Mke wake alipopata mimba, Cor alikabili uwezekano wa kuacha kazi ya kupainia. “Mara nyingi nilisali kwa Yehova na kuweka mbele yake tamaa yangu ya moyoni ya kuendelea kupainia,” asema Cor. Hatimaye Cor alipata aina ya kazi ya kuajiriwa ambayo ilimwezesha apainie huku akilea familia.

Kuridhika na mahitaji ya kimwili ya lazima ni jambo jingine ambalo mara nyingi humsaidia mtu aendelee katika huduma ya painia. Mtume Paulo aliandika hivi: “Msiwe na tabia ya kupenda fedha; mwe radhi na vitu mlivyo navyo; kwa kuwa yeye mwenyewe amesema, Sitakupungukia kabisa, wala sitakuacha kabisa.” (Waebrania 13:5) Kuridhika na vitu vya sasa kulimsaidia Harry na Irene waendelee kupainia. Irene, ambaye ni kipofu, amekuwa painia kwa miaka minane. “Hatujaona kamwe hali yetu ya kifedha kuwa tatizo,” yeye asema. “Tulikuwa waangalifu tu tusije kujipatia kamwe mizigo ya kifedha. Tumehesabu gharama sikuzote. Maisha zetu zimekuwa za kiasi sikuzote, bali zenye kupendeza sana, nazo zimekuwa na baraka nyingi.”

Shangwe na Baraka Nyingi

Nikitazama nyuma kwenye ule muda wa miaka tisa ya kupainia, Thamar asema: “Wamkaribia Yehova sana, kana kwamba alikuwa ameushika mkono wako kihalisi.” (Zaburi 73:23) Akumbuka pia majaribu fulani. “Kutokukamilika kwangu mwenyewe pamoja na kule kwa wengine kulinitatiza kwa ukawaida,” aongeza Thamar. “Zaidi ya hayo, nilikuwa nikiwatazama ndugu na dada waliochagua njia ya maisha yenye kuthawabisha zaidi kimwili, na chaguo lao lilionekana lenye kuvutia kidogo nilipokuwa nje nikitembea katika mvua na baridi. Lakini ndani sana moyoni mwangu, singetaka kamwe kubadilishana hali. Ni nini kingine isipokuwa kupainia kingeweza kuleta shangwe jinsi hiyo, uradhi wa kiroho jinsi hiyo, na baraka jinsi hiyo?” Je! wewe ungethamini sana shangwe na baraka kama hizo?

Kwa sababu mapainia hutumia wakati mwingi katika huduma ya Kikristo, wanaweza kusaidia watu kadhaa wapate ujuzi wa kweli ya Biblia. Harry na Irene, waliotajwa hapo mbele, wasema hivi: “Kuna mapendeleo mengi yawezayo kupatikana katika tengenezo la Yehova, lakini kusaidia mtu mwenye kupendezwa hivi karibuni afanye maendeleo kufikia hatua ya kuwa mtumishi wa Yehova ndilo pendeleo lililo tukufu zaidi ya yote.”

Painia mwingine alieleza mambo vema aliposema hivi: “Maneno ya Mithali 10:22 yamethibitika kuwa ya kweli katika hali yangu: ‘Baraka ya Yehova hutajirisha, wala hachanganyi huzuni nayo.’ Mara kwa mara, andiko hilo limetimizwa kwangu katika ile miaka ambayo nimemtumikia Yehova.”

Wazazi, je, mnakazia kikiki katika watoto wenu tamaa ya kupainia? Mapainia, je, mnajitahidi kuchochea tamaa hiyo katika wengine? Wazee, je, mnawaunga mkono mapainia katika kutaniko lenu na kusaidia kukuza roho ya upainia katika wengine? Watu wa Yehova wengi zaidi na zaidi na wasukumwe kujitahidi kufikia baraka hizo nyingi washirikipo katika utumishi wa painia.