Wapiga-Mbiu wa Ufalme Waripoti

Yehova Ni Mwenye Nguvu Zaidi Kuliko Adui Zake

IBILISI na mashetani wake wamejaribu kwa muda mrefu sana kuzuia kuhubiriwa kwa zile habari njema kwa kutumia dini bandia na uwasiliani-roho. Biblia husema kuhusu kusudi ovu la Shetani kwenye 2 Wakorintho 4:4 ambapo hutaarifu kwamba “mungu wa dunia hii amepofusha fikira zao wasioamini, isiwazukie nuru ya injili ya utukufu wake Kristo aliye sura yake Mungu.”

Lakini Yehova Mungu ni mwenye nguvu kuliko Shetani. Hakuna lolote wawezalo kufanya adui za Yehova ili kuzuia kutimizwa kwa kusudi lake la kimungu, ambalo ni kwamba “watu wote waokolewe, na kupata kujua yaliyo kweli.” (1 Timotheo 2:4) Ripoti zifuatazo kutoka kwa wapiga-mbiu wa Ufalme katika Australia zakazia jambo hili.

◻ Baada ya miaka 20 ya kutoshughulika na dini, mwanamke mmoja alianza kusoma Biblia tena. Upendezi huu ulioamshwa upya katika Biblia ulimsababisha awe na maswali kadhaa, hivyo akamwomba Mungu msaada ili apate majibu. Alitaka kuitafuta kweli, lakini alijua kwamba kurudi katika dini yake ya zamani hakungetatua tatizo lake. Badala ya hivyo, alianza utafutaji wake kwa kutembelea duka la vitabu vilivyotumiwa na kuuliza ikiwa walikuwa na vitabu vyovyote juu ya dini.

Mwenye duka alikumbuka kuwa alikuwa na kitabu cha kidini, si dukani, bali nyumbani. Kichwa cha kitabu kile kilikuwa Unaweza Kuishi Milele Katika Paradiso Duniani, kilichochapishwa na Mashahidi wa Yehova. Mwanamke huyo alisoma kitabu kile kwa hamu naye akapata majibu kwa mengi ya maswali yake ya Biblia. Baada ya kuwatafuta Mashahidi wa Yehova katika kitabu cha nambari za simu, aliwasiliana nao hatimaye na kuanza funzo la kawaida la Biblia.

◻ Mwanamke mmoja mchanga alikodi huduma za gazeti la habari la kwao ili kutangaza uzo la talasimu. Tangazo hilo liliirejezea kuwa ‘talasimu ya enzi ya kati iliyo na uwezo mwingi sana.’ Mmoja wa Mashahidi wa Yehova aliona tangazo hilo. Aliamua kupiga nambari ya simu iliyoonyeshwa ili azungumze na mwanamke huyo kuhusu chanzo cha uwezo unaodhaniwa wa talasimu hiyo. Mazungumzo juu ya maoni ya Biblia kuhusu utendaji wa kishetani yalifuatia. Mwanamke huyo mchanga mwenye talasimu alifunua kuwa siku moja tu iliyotangulia, alikuwa amemwomba Mungu msaada kwa matatizo yake na mashetani. Shahidi huyo alifanya mipango kwa ajili ya mazungumzo mengine kwenye simu.

Wakati alipopiga simu, mwanamke huyo mchanga hakuwepo nyumbani. Mama yake alijibu simu akasema: “Sijui ulilomwambia binti yangu, lakini lile limetukia ni muujiza!” Alielezea kuwa baada ya simu ya kwanza, binti yake alitupa picha na vitabu vyake vyote vya kishetani na kuanza kuisoma Biblia.

Muda mfupi baadaye, mipango ilifanywa kwa ajili ya ziara ya kibinafsi kwa mwanamke huyo mchanga. Alikubali mara hiyo funzo la kawaida la Biblia pamoja na Mashahidi wa Yehova. Alianza pia kushirikiana na Mashahidi kwa kuhudhuria mikutano yao ya Kikristo. Kwa mara nyingine tena, Yehova aliwashinda mashetani kwa kufanya ujuzi sahihi wa kweli za Biblia unga’e.