“Fanyeni Mioyo Yenu Kuwa Imara”

“Mna uhitaji wa uvumilivu, ili kwamba, baada ya nyinyi kuwa mmefanya mapenzi ya Mungu, mpate kupokea utimizo wa ahadi.”—WAEBRANIA 10:36.

1, 2. (a) Ni nini kilichowapata Wakristo kadhaa katika karne ya kwanza? (b) Kwa nini ni rahisi imani kudhoofika?

KATI ya waandikaji wote wa Biblia, hakuna aliyetaja imani mara nyingi zaidi kuliko mtume Paulo. Na kwa mara nyingi, yeye alizungumzia wale ambao imani yao ilikuwa imedhoofika au kufa. Kwa kielelezo, Himenayo na Aleksanda “wa[li]vunjikiwa imani kama vile kuvunjikiwa meli.” (1 Timotheo 1:19, 20) Demasi alimwacha Paulo kwa sababu “aliupenda mfumo wa mambo uliopo.” (2 Timotheo 4:10) Wengine “[walii]kana imani” kwa matendo yao yasiyo ya Kikristo na ya kutowajibika. Wengine walidanganywa na hekima isiyo ya kweli nao “[waka]kengeuka kutoka kwenye imani.”—1 Timotheo 5:8; 6:20, 21.

² Kwa nini Wakristo hao watiwa-mafuta walishindwa katika njia hizo? “Imani ni taraja lililohakikishwa la mambo yatumainiwayo, wonyesho dhahiri wa mambo halisi ingawa hayaonwi.” (Waebrania 11:1) Sisi huonyesha imani katika mambo tusiyoweza kuona. Hatuihitaji kwa mambo yanayoonekana. Ni rahisi zaidi kufanya kazi kupata mali zinazoonekana, kuliko mali za kiroho zisizoonekana. (Mathayo 19:21, 22) Vitu vingi vinavyoonekana—kama vile “tamaa ya mwili na tamaa ya macho”—vinavutia kwa nguvu mwili wetu usio mkamilifu na vyaweza kudhoofisha imani yetu.—1 Yohana 2:16.

3. Mkristo apaswa asitawishe imani ya aina gani?

³ Lakini Paulo asema, “amkaribiaye Mungu lazima aamini kwamba yeye yuko na kwamba yeye huwa mthawabishaji wa wale wanaomtafuta kwa bidii.” Musa alikuwa na imani kama hiyo. Yeye “alikaza macho kuelekea malipo ya thawabu” naye “a[ka]endelea akiwa imara kama ambaye anaona Yeye asiyeonekana.” (Waebrania 11:6, 24, 26, 27) Mkristo anahitaji imani ya aina hiyo. Kama ilivyoonyeshwa katika makala iliyotangulia, Abrahamu alikuwa kielelezo chema kuhusu hiyo.

Kielelezo cha Imani ya Abrahamu

4. Imani ya Abrahamu iliathirije maisha yake?

⁴ Abrahamu alikuwa Uru alipopokea ahadi ya Mungu kwamba angekuwa baba ya mbegu ambayo ingekuwa baraka kwa watu wa mataifa yote. (Mwanzo 12:1-3; Matendo 7:2, 3) Abrahamu alimtii Yehova kwa msingi wa ahadi hiyo, akahama kwenda Harani kwanza, kisha akaenda Kanaani. Huko, Yehova aliahidi kuipa mbegu ya Abrahamu nchi hiyo. (Mwanzo 12:7; Nehemia 9:7, 8) Hata hivyo, mengi ya yale ambayo Yehova alimwahidi yangetimizwa baada ya kifo cha Abrahamu. Kwa mfano, Abrahamu mwenyewe hakumiliki kamwe sehemu yoyote ya Kanaani—ila tu pango la Makpela, alilonunua liwe mahali pa kuzikia. (Mwanzo 23:1-20) Hata hivyo alikuwa na imani katika neno la Yehova. Zaidi ya yote, alikuwa na imani katika “jiji [la wakati ujao] lililo na misingi halisi, ambalo mjenzi na mfanyi wa jiji hilo ni Mungu.” (Waebrania 11:10) Imani hiyo ilimtegemeza katika maisha yake yote.

5, 6. Imani ya Abrahamu ilijaribiwa kwa njia gani kuhusu ahadi ya Yehova?

⁵ Jambo hilo laonekana hasa kuhusu ahadi ya kwamba mbegu ya Abrahamu ingekuwa taifa kubwa. Ili jambo hilo litukie, Abrahamu alihitaji kuwa na mwana, naye alingoja kwa muda mrefu ili kupata mmoja. Hatujui alikuwa na umri gani aliposikia ahadi ya Mungu kwa mara ya kwanza, lakini alipofunga hiyo safari ndefu kwenda Harani, Yehova alikuwa bado hajampa mtoto. (Mwanzo 11:30) Alikaa Harani muda mrefu vya kutosha kuweza ‘kujipatia vitu na watu,’ na alipohamia Kanaani, alikuwa na umri wa miaka 75 naye Sara alikuwa na umri wa miaka 65. Na bado, hawakuwa na mwana. (Mwanzo 12:4, 5) Sara alipofikia umri wa katikati ya miaka 70, alikata kauli kwamba sasa alikuwa mzee sana asiweze kumzalia Abrahamu mtoto. Kwa sababu hiyo, akifuata desturi ya wakati huo, alimpa Abrahamu kijakazi wake Hagari, naye Abrahamu akapata mwana kupitia kijakazi huyo. Lakini huyo hakuwa mtoto aliyeahidiwa. Hatimaye, Hagari na mtoto wake Ishmaeli walifukuzwa. Hata hivyo, Abrahamu alipoomba kwa niaba yao, Yehova aliahidi kumbariki Ishmaeli.—Mwanzo 16:1-4, 10; 17:15, 16, 18-20; 21:8-21.

⁶ Katika wakati wa Mungu uliowekwa—muda mrefu sana baada yao kusikia ahadi hiyo kwa mara ya kwanza—Abrahamu mwenye umri wa miaka 100 na Sara mwenye umri wa miaka 90, walipata mtoto mvulana, Isaka. Lazima hilo liwe lilikuwa jambo la ajabu kama nini! Kwa wenzi hao wazee, jambo hilo lilikuwa kama ufufuo wakati miili yao ambayo ilikuwa ‘imefishwa’ ilipotokeza uhai mpya. (Waroma 4:19-21) Walingoja kwa muda mrefu, lakini wakati ahadi hiyo ilipotimizwa hatimaye, kungoja kwao kulistahili jitihada zao.

7. Imani inahusianaje na uvumilivu?

⁷ Kielelezo cha Abrahamu chatukumbusha kwamba imani haipaswi kuwa ya muda mfupi tu. Paulo alihusianisha imani na uvumilivu alipoandika: “Mna uhitaji wa uvumilivu, ili kwamba, baada ya nyinyi kuwa mmefanya mapenzi ya Mungu, mpate kupokea utimizo wa ahadi. . . . Sisi si namna irudiyo nyuma kwenye uangamivu, bali namna iliyo na imani kuelekea kuhifadhi hai nafsi.” (Waebrania 10:36-39) Wengi wamengojea kwa muda mrefu kutimizwa kwa ahadi hiyo. Wengine wamengoja muda wote wa maisha yao. Imani yao yenye nguvu imewategemeza. Na, kama Abrahamu, watapokea thawabu katika wakati wa Yehova uliowekwa.—Habakuki 2:3.

Kumsikiliza Mungu

8. Sisi humsikilizaje Mungu leo, na kwa nini hilo litaimarisha imani yetu?

⁸ Angalau mambo manne yaliimarisha imani ya Abrahamu, na mambo hayohayo yanaweza kutusaidia. Kwanza, yeye ‘aliamini kwamba Mungu yuko’ kwa kusikiza Yehova aliposema. Hivyo, alikuwa tofauti na Wayahudi wa siku ya Yeremia, ambao walimwamini Yehova lakini hawakuamini maneno yake. (Yeremia 44:15-19) Leo, Yehova husema nasi kupitia kurasa za Biblia, Neno lake lililopuliziwa, ambalo Petro alisema liko kama “taa yenye kung’aa mahali penye giza . . . katika mioyo yenu.” (2 Petro 1:19) Tusomapo Biblia kwa makini, ‘tunalishwa maneno ya imani.’ (1 Timotheo 4:6; Waroma 10:17) Isitoshe, katika siku hizi za mwisho, “mtumwa mwaminifu na mwenye busara” anaandaa ‘chakula cha kiroho kwa wakati ufaao,’ mwongozo katika kutumia kanuni za Biblia na kuelewa unabii wa Biblia. (Mathayo 24:45-47) Kumsikiliza Yehova kupitia njia hizo ni kwa lazima kabisa ili kuwa na imani yenye nguvu.

9. Matokeo yatakuwa nini tukiamini kikweli tumaini la Kikristo?

⁹ Imani ya Abrahamu ilihusiana sana na tumaini lake. “Kwa kutegemea tumaini alikuwa na imani, ili apate kuwa baba ya mataifa mengi.” (Waroma 4:18) Hilo ni jambo la pili liwezalo kutusaidia. Hatupaswi kusahau kwamba Yehova ndiye “mthawabishaji wa wale wanaomtafuta kwa bidii.” Mtume Paulo alisema: “Tunafanya kazi kwa bidii na kujikakamua wenyewe, kwa sababu tumeweka tumaini letu juu ya Mungu aliye hai.” (1 Timotheo 4:10) Iwapo kwa kweli tunaamini tumaini la Kikristo, maisha yetu yote yataonyesha imani yetu, kama alivyofanya Abrahamu.

Kuzungumza na Mungu

10. Ni sala ya aina gani itakayoimarisha imani yetu?

¹⁰ Abrahamu alizungumza na Mungu, na hilo likawa jambo la tatu lililoimarisha imani yake. Leo, sisi pia tunaweza kuzungumza na Yehova kwa kutumia zawadi ya sala kupitia Yesu Kristo. (Yohana 14:6; Waefeso 6:18) Ilikuwa baada ya kusimulia mfano wenye somo uliokazia uhitaji wa kusali daima, ambapo Yesu aliuliza swali hili: “Mwana wa binadamu awasilipo, je, kwa kweli ataipata hiyo imani duniani?” (Luka 18:8) Sala yenye kujenga imani haitolewi bila kutafakari au kufikiri. Ni yenye maana kubwa. Kwa kielelezo, sala ya kuhisiwa moyoni ni muhimu tunapofanya maamuzi ya maana au tunapokuwa chini ya mkazo mkubwa.—Luka 6:12, 13; 22:41-44.

11. (a) Abrahamu aliimarishwaje alipomweleza Mungu hisia zake? (b) Twaweza kujifunza nini kutokana na jambo lililompata Abrahamu?

¹¹ Abrahamu alipozidi kuzeeka naye Yehova akawa bado hajampa mbegu iliyoahidiwa, yeye alizungumza na Mungu kuhusu hangaiko lake. Yehova alimhakikishia jambo hilo. Matokeo yakawa nini? Abrahamu ‘alimwamini Yehova, naye akamhesabia jambo hili kuwa haki.’ Kisha Yehova akatoa ishara ya kuthibitisha maneno yake yenye kutoa uhakikisho. (Mwanzo 15:1-18) Tukimweleza Yehova hisia zetu katika sala, na kukubali uhakikisho wake mbalimbali ulio katika Neno lake, Biblia, na kumtii kwa imani kamili, basi Yehova pia ataimarisha imani yetu.—Mathayo 21:22; Yuda 20, 21.

12, 13. (a) Abrahamu alibarikiwaje alipofuata mwongozo wa Yehova? (b) Ni mambo ya aina gani yaliyoonwa yatakayoimarisha imani yetu?

¹² Jambo la nne lililoimarisha imani ya Abrahamu ni utegemezo ambao Yehova alimpa alipofuata mwongozo wa Mungu. Abrahamu alipoenda kumwokoa Loti kutoka kwa wafalme-wavamizi, Yehova alimpa ushindi. (Mwanzo 14:16, 20) Wakati Abrahamu alipoishi kama mkazi wa muda katika nchi ambayo mbegu yake ingerithi, Yehova alimbariki kwa vitu vya kimwili. (Linganisha Mwanzo 14:21-23.) Yehova aliongoza jitihada za msimamizi-nyumba wa Abrahamu za kumtafutia Isaka mke afaaye. (Mwanzo 24:10-27) Naam, Yehova ‘alimbariki Abrahamu katika vitu vyote.’ (Mwanzo 24:1) Tokeo lilikuwa kwamba, imani yake ilipata nguvu sana nao uhusiano wake na Yehova Mungu ukawa wa karibu sana hivi kwamba, Yehova alimwita “rafiki yangu.”—Isaya 41:8; Yakobo 2:23.

¹³ Je, sisi leo tunaweza kuwa na imani kama hiyo? Ndiyo. Ikiwa sisi, kama Abrahamu, tutamjaribu Yehova kwa kuzitii amri zake, yeye atatubariki, na kuimarisha imani yetu. Kwa kielelezo, tukitupia jicho Ripoti ya Mwaka wa Utumishi ya 1998 twaona kwamba wengi walibarikiwa kwa njia ya ajabu walipotii amri yake ya kuhubiri habari njema.—Marko 13:10.

Rekodi ya Imani Leo

14. Yehova alibarikije kampeni ya kutoa trakti Habari za Ufalme Na. 35?

¹⁴ Huko nyuma katika Oktoba 1997, kampeni ya ulimwenguni pote ya kutoa trakti Habari za Ufalme Na. 35 ilifanikiwa kwa njia yenye kutokeza, kwa sababu ya bidii na shauku ya Mashahidi mmoja-mmoja. Yale yaliyotukia Ghana ni mfano halisi. Tokeo lilikuwa kwamba nakala zipatazo milioni 2.5 ziligawanywa katika lugha nne, na mafunzo ya Biblia yapatayo 2,000 yakaombwa. Katika Saiprasi, Mashahidi wawili waliokuwa wakigawanya Habari za Ufalme walimwona kasisi mmoja akiwafuata. Baada ya muda, walimtolea nakala ya Habari za Ufalme. Alikuwa tayari amepokea nakala moja naye alisema: “Nilivutiwa sana na ujumbe wake hivi kwamba nikataka kuwapongeza watu walioiandika.” Huko Denmark, nakala milioni 1.5 za Habari za Ufalme ziligawanywa kukiwa na matokeo mazuri. Mwanamke mmoja anayefanya kazi huko katika idara ya mahusiano ya umma alisema: “Trakti hiyo ina ujumbe kwa ajili ya kila mtu. Ni rahisi kuielewa, nayo inakuchochea, inakutia tamaa ya kutaka kujua zaidi. Inaeleza mambo kinaganaga kabisa!”

15. Ni mambo gani yaliyoonwa yaonyeshayo kwamba Yehova alibariki jitihada ya kufikia watu kila mahali?

¹⁵ Katika 1998 jitihada ilifanywa ili kuhubiria watu si katika nyumba zao tu bali kila mahali. Katika Côte d’Ivoire mume na mke ambao ni wamishonari walizuru meli 322 gatini. Waliangusha vitabu 247, magazeti 2,284, broshua 500, na mamia ya trakti, na pia wakawaangushia mabaharia vidio za kutazama wakiwa baharini. Huko Kanada, Shahidi mmoja alienda kwenye duka la kuunda bodi za gari. Mwenye duka hilo alipendezwa, naye ndugu huyo akakaa kwa muda wa saa nne na nusu, ingawa muda uliotumiwa kutoa ushuhuda kutoka mteja mmoja hadi mwingine kwa ujumla ulikuwa tu saa moja hivi. Hatimaye, alipanga kujifunza naye saa nne usiku. Ingawa hivyo, nyakati nyingine funzo lilianza saa sita usiku na kuendelea hadi saa nane usiku. Yaelekea ratiba hiyo ilikuwa ngumu, lakini matokeo mazuri yakapatikana. Mwanamume huyo aliamua kufunga duka lake kila Jumapili ili kuhudhuria mikutano. Punde si punde, yeye na familia yake walikuwa wanafanya maendeleo mazuri.

16. Ni mambo gani yaliyoonwa yaonyeshayo kwamba broshua Anataka na kitabu Ujuzi ni vifaa vyenye nguvu katika kazi ya kuhubiri na kufundisha?

¹⁶ Broshua Mungu Anataka Tufanye Nini? na kitabu Ujuzi Uongozao Kwenye Uhai Udumuo Milele vyaendelea kuwa vifaa vyenye nguvu katika kazi ya kuhubiri na kufundisha. Huko Italia mtawa mmoja wa kike aliyekuwa anangojea basi alikubali nakala ya trakti Habari za Ufalme. Siku iliyofuata, alifikiwa tena naye akakubali broshua Anataka. Baadaye, alijifunza Biblia kila siku kwa muda wa dakika 10 hadi 15 kwenye kituo cha basi. Baada ya mwezi mmoja na nusu, aliamua kuacha makao ya watawa wa kike na kwenda nyumbani Guatemala ili aendelee kujifunza. Katika Malawi mwenda-kanisa mwenye bidii aitwaye Lobina aliudhika wakati binti zake walipoanza kujifunza Biblia pamoja na Mashahidi wa Yehova. Hata hivyo, wasichana hao walimweleza mama yao kweli ya Biblia walipoweza kufanya hivyo. Katika Juni 1997, Lobina aliona kitabu Ujuzi na kupendezwa na usemi “Ujuzi Uongozao.” Katika Julai alikubali funzo la Biblia. Katika Agosti alihudhuria mkusanyiko wa wilaya na kusikiliza programu yote kwa makini. Kufikia mwisho wa mwezi huo, alikuwa ameacha kanisa lake na kustahili kuwa mhubiri asiyebatizwa. Alibatizwa Novemba 1997.

17, 18. Vidio za Sosaiti zimethibitikaje kuwa zenye manufaa katika kuwasaidia watu “waone” mambo ya kiroho?

¹⁷ Vidio za Sosaiti zimewasaidia wengi “kuona” mambo ya kiroho. Katika Mauritius mwanamume mmoja aliacha kanisa lake kwa sababu ya mgawanyiko uliokuwa humo. Mmishonari mmoja alimwonyesha muungano wa Mashahidi wa Yehova, akitumia vidio United by Divine Teaching. Akiwa amevutiwa, mwanamume huyo alisema: “Nyinyi Mashahidi wa Yehova tayari mko katika Paradiso!” Alikubali kujifunza Biblia. Dada mmoja huko Japani alimwonyesha mume wake asiyeamini vidio Jehovah’s Witnesses—The Organization Behind the Name, naye akachochewa kuwa na funzo la Biblia la kawaida. Baada ya kutazama vidio United by Divine Teaching, akataka kuwa mmoja wa Mashahidi wa Yehova. Mfululizo wenye sehemu tatu wa vidio The Bible—A Book of Fact and Prophecy ulimsaidia kutumia kanuni za Biblia maishani mwake. Hatimaye, vidio Jehovah’s Witnesses Stand Firm Against Nazi Assault ilimwonyesha kwamba Yehova huwaimarisha watu Wake dhidi ya mashambulio ya Shetani. Mwanamume huyo alibatizwa katika Oktoba 1997.

¹⁸ Hayo ni mambo machache tu kati ya mambo mengi sana yaliyoonwa mwaka wa utumishi uliopita. Yanaonyesha kwamba Mashahidi wa Yehova wana imani yenye kutenda na kwamba Yehova anaimarisha imani hiyo kwa kubariki utendaji wao.—Yakobo 2:17.

Sitawisha Imani Leo

19. (a) Hali yetu ikoje nzuri zaidi kuliko ya Abrahamu? (b) Ni watu wangapi waliokusanyika kukumbuka kifo cha Yesu cha dhabihu mwaka uliopita? (c) Ni nchi gani zilizokuwa na mahudhurio ya Ukumbusho yenye kutokeza mwaka uliopita? (Ona chati kwenye ukurasa wa 12 hadi 15.)

¹⁹ Leo hali yetu ni nzuri zaidi kuliko ya Abrahamu katika njia nyingi. Twajua kwamba Yehova alitimiza ahadi zake zote alizomwahidi Abrahamu. Wazao wa Abrahamu walirithi Kanaani, wakawa taifa kubwa. (1 Wafalme 4:20; Waebrania 11:12) Isitoshe, miaka ipatayo 1,971 baada ya Abrahamu kuondoka Harani, mzao wake, Yesu, alibatizwa kwa maji na Yohana Mbatizaji, kisha Yehova mwenyewe akambatiza kwa roho takatifu ili awe Mesiya, Mbegu ya Abrahamu katika maana ya kiroho iliyo kamili. (Mathayo 3:16, 17; Wagalatia 3:16) Nisani 14, 33 W.K., Yesu alitoa uhai wake ukiwa fidia kwa ajili ya wale ambao wangedhihirisha imani kwake. (Mathayo 20:28; Yohana 3:16) Mamilioni ya watu sasa wanaweza kujibariki kupitia yeye. Mwaka uliopita, watu 13,896,312 walikusanyika Nisani 14 ili kukumbuka kitendo hicho cha upendo na cha ajabu. Ni kutetewa kulikoje kwa Yehova, Mtimizaji Mkuu wa ahadi!

20, 21. Watu kutoka katika mataifa yote walijibarikije kupitia Mbegu ya Abrahamu katika karne ya kwanza, nao wanajibarikije leo?

²⁰ Katika karne ya kwanza wengi kutoka katika mataifa yote—Waisraeli wa asili wakiwa wa kwanza—walidhihirisha imani katika Mbegu hiyo ya Abrahamu na kuwa wana watiwa-mafuta wa Mungu, washiriki wapya wa “Israeli [wa kiroho] wa Mungu.” (Wagalatia 3:26-29; 6:16; Matendo 3:25, 26) Walikuwa na matarajio ya uhai wa kiroho usioweza kufa mbinguni wakiwa watawala-wenzi katika Ufalme wa Mungu. Ni watu 144,000 tu ambao wangebarikiwa katika njia hiyo, na wachache kati yao ndio wanaobaki. (Ufunuo 5:9, 10; 7:4) Mwaka uliopita, watu 8,756 walitoa ushuhuda wa imani yao kwamba walikuwa wa idadi hiyo kwa kushiriki mifano wakati wa sherehe ya Ukumbusho.

²¹ Leo, Mashahidi wa Yehova karibu wote ni wa ule “umati mkubwa” uliotabiriwa kwenye Ufunuo 7:9-17. Kwa sababu wanajibariki kupitia Yesu, wana tumaini la uhai wa milele kwenye dunia paradiso. (Ufunuo 21:3-5) Watu 5,888,650 walioshiriki katika kazi ya kuhubiri katika 1998 ni uthibitisho kwamba umati huu ni “mkubwa” kwelikweli. Ilisisimua hasa kuona Urusi na vilevile Ukrainia zikiripoti wahubiri zaidi ya 100,000 kwa mara ya kwanza. Yenye kutokeza pia ni ripoti kutoka Marekani—wahubiri 1,040,283 katika Agosti! Hizi ni nchi tatu tu kati ya nchi 19 zilizoripoti wahubiri zaidi ya 100,000 mwaka uliopita.

Tumaini Litakalotimizwa Hivi Karibuni

22, 23. (a) Kwa nini yatupasa tufanye mioyo yetu iwe imara leo? (b) Twaweza kuthibitikaje kuwa kama Abrahamu, wala si kama watu wasio na imani waliotajwa na Paulo?

²² Waliohudhuria ukumbusho walikumbushwa kiwango kikubwa zaidi ambacho ahadi za Yehova zimetimizwa. Katika 1914, Yesu alitawazwa kuwa Mfalme wa Ufalme wa kimbingu wa Mungu, kuanzia kuwapo kwake katika mamlaka ya Ufalme. (Mathayo 24:3; Ufunuo 11:15) Naam, Mbegu ya Abrahamu sasa inatawala mbinguni! Yakobo alisema hivi kuhusu Wakristo wa siku yake: “Dhihirisheni subira; fanyeni mioyo yenu kuwa imara, kwa sababu kuwapo kwa Bwana kumekaribia.” (Yakobo 5:8) Kuwapo huko sasa ni hakika! Jinsi tulivyo hata na sababu zaidi ya kufanya mioyo yetu iwe imara!

²³ Uhakika wetu katika ahadi za Mungu na utiwe nguvu upya daima kwa funzo la Biblia na sala yenye maana. Na tusiache kamwe kupata baraka za Yehova tunapotii Neno lake. Ndipo tutakapokuwa kama Abrahamu, si kama wale ambao imani yao ilidhoofika na kufa, kama Paulo alivyotaja. Hakuna chochote kitakachotutenganisha na imani yetu iliyo takatifu zaidi. (Yuda 20) Twasali kwamba itakuwa hivyo kwa watumishi wa Yehova katika mwaka wa utumishi wa 1999 na kuendelea hadi wakati ujao wa milele.

Je, Wajua?

◻ Twawezaje kumsikiliza Mungu leo?

◻ Ni manufaa gani zitokanazo na kutoa sala zenye maana kwa Mungu?

◻ Imani yetu itaimarishwaje tukifuata mwongozo wa Yehova kwa utii?

◻ Ni sehemu zipi za ripoti ya mwaka (ukurasa wa 12 hadi 15) ulizopata kuwa zenye kupendeza hasa?

[Chati katika ukurasa wa 12-15]

RIPOTI YA MWAKA WA UTUMISHI WA 1998 YA MASHAHIDI WA YEHOVA ULIMWENGUNI POTE

(Ona buku lililojalidiwa)

[Picha katika ukurasa wa 16]

Tukisikiliza Neno la Yehova, uhakika wetu katika ahadi zake utatiwa nguvu upya

[Picha katika ukurasa wa 18]

Imani yetu inaimarishwa tunaposhiriki katika huduma