Ya Ine, Nsiku 25 Muezi wa 4
Mutonene Yehova paantu ali waunvua lizui lyane, kupapaata kwane kwa kuloomba kukwasiiwa.—Malum. 116:1.
Yehova kunti watukwasia kusipikizia maavia mu buikazi bwetu ni kupata nsaansa mu miilo yeetu itakatiifu. Musita utuli twapepa kuli Yehova ni kumubuila kintu kili mukutwemia, weene kunti watupeelanke maka atukabiile eevi kusipikizia ezio aali. Kabili, kine buezio bwetu te bupuile lubilo nga evelia vitwakiba twaswapiile, kunti kyapala tumuloombe Yehova lingi eevi atupeele maka a kusipikizia buezio bobo. Weene ali watukupa tukite evio. Keekio kilangiliilue mu eezi milandu yakue Isaya: “Tekulekelele ata kaniini [Yehova] atuuzie.” (Is. 62:7) Ezio milandu ili na mana ki? Mapepo etu kuli Yehova apalile kutwalilila nga evelia fwefue basili mukumulekelela Yehova atuuzie. Milandu yakue Isaya yatulangulusia mifuano yakue Yesu palua kupepa ili mu lileembo lya Luka 11:8-10, 13, (NWT). Mu leelio lileembo, Yesu watukinkizia ‘tutwalilile kwa mute’ kupepa ni ‘kutwalilila kuloomba’ mupasi utakatiifu. Kabili, kunti twamuloomba Yehova atutungulule eevi tukwate bupinguzi buweeme. w22.11 8 lifu. 1; 9 lifu. 6-7
Ya Tano, Nsiku 26 Muezi wa 4
Tupalile kupita mu maavia engi pa kwingila mu Bukolo Bwakue Leeza.—Miil Bat. 14:22.
Weewe pamo ni lupua lobe kunti mwaiteania loonu palua kukyuziiwa. Apana kuya watontonkania palua bintu byonse bibiipile bili kuviinda kukitika. Kuliko kukita evio, kosia bukibuza bobe pamo ni Yehova, kabili bakwasie baana bobe kukita evio vyenka. Kine nsita inge weewe watendeka kwema, mubuile Leeza bintu byonse bili ku mutima. (Malum. 62:7, 8) Londolole mwali pamo mu lupua juu ya ki mupalile kumuswapila weene. Kwa mufuano palua masaanzo, kine waiteania we muine ni kumuswapila Yehova, uli kukwasia baana bobe baye basipile ni kuya bali ni mutende kine kwaaluka kukyuziiwa. Mutende wakue Leeza, uli watulengia twiunvue kuya twasuungilue. (Baf. 4:6, 7) Kupitila ozo mutende, Yehova ali walengia mutima weetu uye wateekameene anzia maluele akolele, masaanzo, ni kukyuziiwa kutuli kuviinda kupata loonu. Ali wabombia bakote bali babomba saana eevi kutusuunga. Kabili, apeele kila umo weetu lisyuko lya kukwasiana. Mutende utuli mukuya twasekelela loonu, uli mukuya watuteania palua maavia akata saana ali mukuiza, atasie mu musita wa “lyemo likata.”—Mat. 24:21. w22.12 27 lifu. 17-18
Ya Sita, Nsiku 27 Muezi wa 4
Nsyaaiziile balunghami [ao, balungheeme] inzi naaiziile ba bibalo.—Mat. 9:13.
Tupalile kulekela kwimona kuya twali ni bilubo palua mazaambi akata aatwaakitile lwa kale. Anzia evio, te tupalile kuya twafyamina mu kilubula mulandu eevi tuye twakita ‘bibalo [ao, mazaambi] na bufue.’ (Baeb. 10:26-31) Inzi, kunti twasininkizia nangue kine twaakimuloomba Yehova atweleele ni kuya kubamona bakote eevi batukwasie, kisia twaalulula lwendo lwetu, Yehova waakitweleela kale mu nzila ikata. (Is. 55:7; Miil Bat. 3:19) Ngeleelo ya kilubula mulandu ili ni buviinde bwa kuviimba mazaambi etu onse kabili yakalengia tukaviinde kwikala mu Paradiso. Buikazi mu Paradiso, tebukatopia. Lyonse twakaba twasaakaana ni bantu baweeme kabili twakita miilo ya mana. Kukila pa byonse, kila busiku twakaba twakila kusambilila palwakue Baba weetu wa ku muulu ni kuya twasekelela byonse byali wakaba watuteaniizia. Lyonse, kwakaba bintu bingi saana bya kusambilila palwakue, kabili kwakaba kwali bingi saana bya kusambilila palua bibumbua byakue. w22.12 13 lifu. 17, 19