Oinsá atu ajuda sira neʼebé ladún hatene lee
1. Tanbasá mak dala ruma susar atu hanorin Bíblia ba ema neʼebé ladún hatene lee?
1 Dala ruma, uma-naʼin sira neʼebé ladún hatene lee mós hakarak aprende kona-ba Maromak, maibé sira dada an kuandu haree Bíblia ka livru sira. Se ita fahe kedas livru Bíblia Hanorin ba ema sira hanesan neʼe, karik ida-neʼe sei la ajuda. Entaun, oinsá mak ita bele ajuda sira atu aprende lia-loos? Ami husu haklaken-naʼin sira neʼebé iha esperiénsia barak ona husi rai hamutuk 20 kona-ba oinsá sira ajuda ema sira hanesan neʼe. Mai ita haree dalan oioin neʼebé sira uza.
2. Ita bele uza buat saida deʼit atu ajuda sira neʼebé ladún hatene lee?
2 Se uma-naʼin la hatene lee ka lee uitoan deʼit, ita bele uza broxura Rona ba Maromak ka Rona ba Maromak hodi Hetan Moris ba Nafatin atu estuda ho nia. Irmaun pioneiru ida husi rai-Estadus Unidus hatudu ba uma-naʼin broxura rua neʼe no husu nia ida-neʼebé mak nia hakarak uza atu estuda. Sukursál iha rai-Kénia fó-hatene katak broxura rua neʼe diʼak tebes atu uza iha sira-nia haklaken-fatin, tanba baibain ema Áfrika gosta liu atu aprende hodi rona ba istória sira, duké uza pergunta no resposta. Se ita uza pergunta no resposta atu hanorin sira neʼebé eskola boot, karik sira sei simu. Maski nuneʼe, karik la diʼak atu uza dalan neʼe atu hanorin sira neʼebé ladún hatene lee. Se uma-naʼin hatene lee uitoan, haklaken-naʼin barak hakarak uza broxura Liafuan Diʼak Husi Maromak, ka Ita Bele Sai Maromak nia Belun!, ka mós bele uza Livru Istória husi Bíblia.
3. Atu bele hanorin sira neʼebé ladún hatene lee, ita presiza halo saida deʼit?
3 Gaba sira: Sira neʼebé la eskola karik sente moe no sira barak sente katak sira la iha folin. Entaun, se sira sente katak ita hanoin no komprende sira-nia situasaun, neʼe bele loke dalan ba ita atu hanorin sira kona-ba lia-loos. Ema barak neʼebé la hatene lee, baibain sira mós matenek no bele aprende. Tan neʼe, hatudu respeitu ba sira no labele hatún sira. (1 Pedro 3:15) Se sira sente katak sira-nia hakaʼas-an la saugati deʼit no sira bele laʼo ba oin atu aprende kona-ba Maromak, ida-neʼe sei book sira atu kontinua estuda. Tan neʼe, importante atu gaba sira beibeik.
4. Oinsá mak ita bele ajuda sira neʼebé ladún hatene lee atu prepara sira-nia livru?
4 Maski estudante hatene lee uitoan deʼit, fó laran-manas ba nia atu prepara ninia livru. Haklaken-naʼin balu husi rai-Áfrika Súl fó laran-manas ba sira-nia estudante Bíblia atu husu família ka kolega neʼebé hatene lee ho diʼak atu ajuda sira. Atu ajuda ninia estudante sira kona-ba oinsá atu prepara sira-nia livru, irmaun ida husi rai-Bretaña dala ruma fó ninia livru rasik ba estudante kuandu sira estuda parágrafu balu. Ida-neʼe ajuda estudante atu haree katak fasil tebes atu hetan resposta se livru riska tiha ona. Irmaun ida husi rai-Índia anima ninia estudante atu haree dezeñu sira ba lisaun neʼebé sira sei estuda ba semana tuirmai no hanoin kleʼan kona-ba ida-neʼe.
5. Oinsá mak ita bele hatudu pasiénsia kuandu estuda ho ema neʼebé ladún hatene lee?
5 Hatudu pasiénsia: Maski ita uza livru naran deʼit, tau atensaun ba pontu importante sira. No ajuda estudante atu komprende didiʼak pontu sira-neʼe. Kuandu foin komesa estuda, se bele diʼak atu uza minutu 10 ka 15 deʼit. Diʼak atu la estuda informasaun barak liu, karik estuda parágrafu balu deʼit semana-semana. Hatudu pasiénsia kuandu estudante lee neineik. Karik nia sei hakaʼas an atu aprende lee ho diʼak liután nuʼudar nia aprende barak kona-ba Maromak Jeová no haburas domin ba nia. Atu ajuda estudante halo ida-neʼe, diʼak atu konvida nia atu tuir reuniaun husi tempu neʼebé ita komesa estuda ho nia.
6. Oinsá mak ita bele ajuda ema atu aprende lee?
6 Se estudante Bíblia aprende lee ho diʼak, neʼe sei ajuda nia atu laʼo ba oin lalais iha lia-loos. (Salmo [Mazmur] 1:1-3) Atu ajuda estudante aprende lee, haklaken-naʼin barak uza livru Hakaʼas an atu aprende lee no hakerek ba minutu balu depois sira ramata sira-nia estudu kada semana. Se estudante sai laran-tun, karik ita bele fó laran-manas ba nia hodi temi buat balu neʼebé nia aprende tiha ona. Dehan ba nia katak Jeová sei haraik bensaun ba ninia hakaʼas-an, no anima nia atu halo orasaun hodi husu ajuda. (Provérbios [Amsal] 16:3; 1 João 5:14, 15) Haklaken-naʼin balu husi rai-Bretaña fó laran-manas ba sira-nia estudante atu halo planu balu neʼebé sira bele kumpre. Porezemplu, sira bele aprende ho didiʼak alfabetu, tuirmai buka no lee eskritura balu, no ikusliu lee livru ruma kona-ba Bíblia neʼebé ladún iha letra barak. Kuandu ita ajuda ema aprende lee, diʼak se ita book sira atu iha hakarak halo ida-neʼe, laʼós deʼit hanorin sira oinsá atu lee.
7. Tanbasá mak ita labele dada an atu haklaken lia-loos ba sira neʼebé ladún hatene lee?
7 Maromak Jeová hafolin ema hotu, inklui mós sira neʼebé la eskola. (Jó [Ayub] 34:19) Sin, buat neʼebé importante ba Jeová mak ema nia laran. (1 Crônicas [Tawarikh] 28:9) Tan neʼe, labele dada an atu haklaken lia-loos ba sira neʼebé ladún hatene lee. Ita iha livru diʼak barak neʼebé ita bele uza uluk atu hanorin ema sira-neʼe. Ikusmai, ita bele uza livru Bíblia Hanorin hodi ajuda sira komprende kleʼan liu kona-ba Eskritura.
[Liafuan neʼebé foti husi pájina 6]
Sira neʼebé la eskola karik sente moe no sira barak sente la iha folin. Entaun, hodi komprende sira-nia situasaun bele loke dalan ba ita atu hanorin sira kona-ba lia-loos
[Kaixa iha pájina 6]
Se uma-naʼin la hatene lee, bele koko ida-neʼe:
• Uza broxura Rona ba Maromak ka Rona ba Maromak hodi Hetan Moris ba Nafatin, ka livru seluk neʼebé simples.
• Labele hatún nia, maibé gaba nia beibeik.
• Estuda ho nia ba minutu balu deʼit, no labele estuda informasaun barak liu.
• Ajuda nia atu aprende lee ho diʼak liután.
Se ita haree katak nia gosta tebes lia-loos no hakarak aprende liután, ita bele komesa uza livru Bíblia Hanorin atu estuda ho nia.