Aisisiaet 6

Ajakanut Naka Edeke Nges Inyo?

Aii bo ipikakinitai Ajakanut naka Edeke? (1) Ingai bo Ekabaka ke? (2)

Emorete kereka icie da aipuga kede Ekabaka? Arai ikoni nen, idii bo? (3)

Inyo itodunit ebe ijai kwana oni apaarasia nuka awasia? (4)

Inyo ebuni Ajakanut naka Edeke moolo aiswamaikin itunga? (5-7)

1. Neajaar toma akwap, abu Yesu kisisianak ikesisiak ailip, kobu Ajakanut naka Edeke. Ajakanut erai ­apugan na ingarenikit ekabaka. Ajakanut naka Edeke erai apugan naitegelikina. ­Esipokina toma kuju ido ebuni ­aipuga akwap na. Italauni ekiror ­k’Edeke. ­Einakini nuekote Edeke aiswamaun kakwap kwape kokuju.—Matayo 6:9, 10.

2. Abu Edeke isumun Yesu araun Ekabaka loka Ajakanut Ke. (Luka 1:30-33) Neajar Yesu toma akwap, abu kitodu ebe eraun nges lo esiana, ejok ka Epugan loedolit. Kebongo kuju, mam aponi korasakinai aitaraun nges Ekabaka loka Ajakanut k’Edeke. (Iburanian 10:12, 13) Okaru lo 1914, abu Yawe kijaik Yesu apedor na esumunit Ngesi nesi. Ageun kangin, ipugai do Yesu kotoma akuj kwape Ekabaka loeseunit Yawe.—Daniel 7:13, 14.

3. Eseunit bobo da Yawe icie ikiliok ka angor lumunon kakwap alosit toma kuju. Ipugaete kesi nepepe ka Yesu kwape ikabakan, ikatubok, ka isaseredotin kotoma otunga. (Luka 22:28-30; Apukokinio 5:9, 10) Anyarit Yesu ikepugak lu Ajakanut “esipan lodidi.” Erai etiai kec 144,000.—Luka 12:32; Apukokinio 14:1-3.

4. Atipet ne araunor Yesu Ekabaka, kocakari Satani kede ikemalaikan anyoun kotoma akuj kitoni kwap nee. Kanukangun orokiaros iboro kakwap kana ageun okaru lo 1914. (Apukokinio 12:9, 12) Ijiesio, ebeli, adekasinei, eyasi lokabilibilio na ikisila—nu kere eraasi “aanyunet” naitodunit ebe ipugai Yesu kosodi eiswamae lo ejaai aparasiake nuka awasia.—Matayo 24:3, 7, 8, 12; Luka 21:10, 11; 2 Timoteo 3:1-5.

5. Edodor kwana apak na ebunio Yesu atubokin itunga, atiakatiak kes kwape etiakatiaka ecokon amerekekin kakinei. “Amerekekin” kes itunga ngul luetodutu ebe erimaritos kesi Yesu. Edumunete aijar namam eduan kakwap. “Akinei” kes itunga ngul lu agiroto Ajakanut naka Edeke. (Matayo 25:31-34, 46) Bobo da eyapiei Yesu abunere amudiar ngul luesubitosi bala akinei. (2 Isesalonikan 1:6-9) Arai ikoto ijo araun adiopet “kamerekekin” nuka Yesu, ibusakinit ijo apupokin akirot naka Ajakanut kosodi aswam kwape isisianakinere ijo.—Matayo 24:14.

6. Kwapekwana etiakatiaka akwap toma atutubena nuipu. Ngin diopet ejaasi kakepugan. Etapit atutubena nu ajinikin bonik. Konye ebuni Ajakanut naka Edeke alemar apuganasinei nuka itunga kere. Kipugai do kwape apugan adiopet bon kakwap kere. (Daniel 2:44) Emameun do ejie, adiakaret karaida adedeng. Itunga kere iboiete do kotoma ainapakin ka aimorikikina.—Mika 4:3, 4.

7. Kotoma Apugan naka Yesu na Ikaru Elukumit, itunga lumunon eraunos lukadolitok, kosodi akwap kere araun paradais. Osange loka ikaru elukumit, edumuni Yesu kedau aswam nginbore kere yen akoto nges Edeke aswam. Inyakakini do ngesi Ajakanut nejai Papake. (1 Ikorinton 15:24) Kanukinyo mam ijo ilimokina ipaperokon ka luiminan kon da iboro lu ebuni Ajakanut naka Edeke aswam?

[Aputo kapapula 13]

Kotoma apugan ka Yesu, emameun edinget arai aimuwarit luce