Kanuinyo Ejaar Aronis ka Aiticanitoi?

Naetakanuniata nueroko, etapit itunga aingisit ebe: “Kanuinyo atakanuniata ngun?” Epol oni alakara naarai ijaikinit Ebaibuli abongonokineta nuka aingiset kangin!

1. Epone ani ayaunia Satan aronis toma akwap?

Abu Satan Ekejodijodon kipaliik Edeke. Akoto Satan aipuga luce, aso, abu ngesi kitapaa itunga lusodit Adam ka Keba aimorikikin kanges atupaar epalike. Abu Satan kiswama nu kopone loka aingalingal Keba. (Ageun 3:1-5) Abu Satan kijaik Keba aomit ebe imikit Yawe Keba ibore yenajokan. Akoto Satan itunga aomit ebe epote kesi adumun aiyalama naepol arai kipalikisi kesi Edeke. Abu Satan kitegea aisab nasodit naalimokinia Keba ebe mam Keba abuni atwanare. Kanuangun, nges enyaritor Ebaibuli Satan “papa loka aingal.”​—Yokana 8:44.

2. Inyo bo abu Adam keda Keba koseutu aswam?

Amina Yawe Adam keda Keba noi. Abu kolimok kes anyamenen adioraito kere nukotoma omanikor dimarai adiopet bon mam abeit kes ainyam. (Ageun 2:15-17) Konye apotu kesi kiketakinos ainyam araito naka ekitoi lomam acamakinitai kes. Abu Keba “kodeng araitoke, konyam.” Ekaulo, abu Adam da, “konyam.” (Ageun 3:6) Apotu kesi kere kipaliikis Edeke. Apatanikit Adam ka Keba aswam nuejok naarai araasi kesi luadolito. Konye naarai apotu kopeleikisi aipaliikin Edeke, apotu kesi kodiakasi ido apotu kongeroto apuganike. Abu aseunetekec koyau aiticanitoi naepol noi.​—Ageun 3:16-19.

3. Epone ani etiroritor oni aseunet naka Adam ka Keba?

Naadiakariata Adam ka Keda, apotu kesi koraunos lumam edolito, kanuangun apotu kesi kikopakisi ikecedwe da amamut adolit. Kanuikamunitos Adam, ebala Ebaibuli ebe: “Kanuka ngun kwape kelomunia adiakanar akwapin kanuka etunganan ediopet, kolom da atwanare kanuka adiakar, kwangin kodolok atwanare otunga kere, naarai apotu kere kodiakasi.”​—Iromayon 5:12.

Idumununei oni atiokisio kanuka akiro nuegelegela. Acepakio idumuni oni atiokisio kanuka aseununetawok nuarokok. Icesawan, edoikinete oni atiokisio kanuka aseununeta nuarokok nuka icetunga. Bobo da idumuni oni aiticanitoi naarai kijaun aiboisit namam ibusakinit ido kosawan lueroko.​—Kosiom Ekalimonokinan 9:11.

KISISIAU NUIPU

4. Loeyangaununei aiticanitoiwok

Iyuunitos itunga luipu ebe Edeke ngesi ipugat akwap kere. Eraas kereka ngun abeit? Koboliak EBIDIO.

EBIDIO: Ingai bo Ipugat Akwap? (1:24)

Kosiom Yakob 1:13 keda 1 Yokana 5:19, kosodete aimor aingiset nata:

• Erai kereka Edeke eyangaununei aiticanitoi ka adioronis kere otunga?

5. Kojenu nuatakanutu ameun naageunia Satan aipuga

EBIDIO: Kanuinyo Ecamakinitor Edeke Aiticanitoi Ajaunun?​—Nuetiakunitai (3:07)

Kosiom Ageun 3:1-6, kosodete aimor aingiseta nuta

• Anu bo akiro nukaisab nuabu Satan kiner?​—Koany ikokoron 4 keda 5.

• Epone ani abu Satan koinakinia itunga aomoom ebe imikit Yawe kesi iboro luejokuka?

• Katupitos nuabala Satan, ipudasi kereka itunga Yawe araut Epuganikec kanu kesi ajaut kaiyalama?

Kosiom Ekalimonokinan 8:9, kosodete aimor aingiset nata:

• Anyoika bo nuatakanutu kotoma akwap kana namam Yawe eraar Epugan?

1. Araasi Adam keda Keba luadolitos ido ajaasi Paradais. Konye apotu kesi korimaasi Satan kosodete aipaliikin Yawe

2. Akaulo na kesi aipaliikin Edeke abu aronis, aiticanitoi, keda atwanare kilelebun toma akwap

3. Ebuni Yawe alemar adiakar, aiticanitoi, keda atwanare. Epote do bobo itunga araun luedolito ido luiboiete koParadais

6. Epodokinit Yawe aiticanitoiwok

Epodokinit kereka Yawe oni ka aiticanitoiwok? Aanyutu ber nuabu Ekabaka Daudi keda ekiyakia Petero kiwadikata. Kosiom Isabulin 31:7 keda 1 Petero 5:7, kosodete aimor aingiset nata:

• Epone ani ipupio jo kanu aijen ebe itei Yawe ido epodokinit ngesi oni ka aiticanitoiwok?

NUIDAU AISISIAUN

Satan Ekejodijodon keda itunga iyarei lusodit kesi kanoinoi ibusakinit aitoron kanuka aronis naejai toma akwap. Epodokinit Yawe oni noi keda aiticanitoiwok, ido eyapie nges aitanang atiokisio.

Ainyogoor

• Anu bo akiro nukaisab nuabu Satan kolimok Keba?

• Epone ani abu epali loka Adam keda Keba koyaunia ican neijai oni?

• Epone ani ijenunia oni ebe epodokinit Edeke oni ka aiticanitoiwok?

ISISIAU BOBO NUTA

Kisisiau epone loenyaritor Ebaibuli adiakar.

“Inyoin bo Adiakar?” (Aisisiaet naka olago)

Kosiom nuipu nuikamunitos akiro nuabu Satan Ekejodijodon kikeunite komanikor loka Eden.

“Kanuinyo Ecamakinitor Edeke Aiticanitoi Ajaunun?” (Watchtower, Elap Losodit 1, 2014)

Kisisiau abongonokineta nuitalakaarete nuka aingiseta nuetioko.

“Kanuinyo Adanyere Iyudayan Kojie Loiyareit Loka Akwap Kere? Kanuinyo Mam Edeke Kitikokinitor?” (Aisisiaet naka olago)

Koany nuabu ediopetunganan kisisiau kanuikamunitos aiticanitoi naajai atutubetekec.

Ainaki Yawe Eong Aijar Naejai Alosikinet (5:09)