1-3. Anyoika bo aingiseta nuetapit itunga luipu aingit, ido eipone bo ani ebongonokiniata idiinin luipu?

ISUMUNIT Ebaibuli ebe “mam bobo ejaun atwanare.” (Apukokinio 21:4) Kosula kalo 5, apotu oni kesisiautu ebe epedori alucet ainakin oni adumun aijar naka ikar kere. Konye eroko itunga etwakete. (Ekalimonokinan 9:5) Adiopet kaingiseta nuepolok nges na ebe, Anyoika bo etakanikinete oni kitwaka?

² Ipudakin oni adumuni abongokinet naka angiset kangin arai itwakiarit oni luminatawok. Kingisi oni ebe: ‘Ai bo elosit ngesi? Eseseni kereka ngesi oni? Ingarakini kereka ngesi oni? Kiyanyuni kereka oni ngesi bobo?’

³ Einakinitos idiinin luipu abongonokineta nuegelegela kanuka angiset kana. Isisianakinete ice ebe arai irai ijo itunganan yenajokan, ilosi ijo toma akuj ido ebe arai irai ijo itunganan yenaronon, ilosi ijo akim namam edungei. Ebakasi ice ebe kitwana ijo iraun ijo emoyo loijari keda lukatwakakon. Ido ice ebakasi ebe arai kitwana ijo etubokinio ijo, kiurunio ijo bobo, arai bo ijaikinio ijo akuan ace, kwape itunganan arai bo nat itiang.

4. Anyoin aomosioit adiope na emoritos idiinin luipu?

⁴ Esubitos idiinin luipu bala ejaasi kaisisianakineta luegelegela. Konye emoritos aomisioit adiope. Isisianakinete kesi ebe arai ketwana itungananan, ekui emoyoke atwanare. Erai kereka ngin abeit?

AI BO ILOSI ONI KITWAKA?

5, 6. Anyoika bo etakanikinete oni kitwaka?

⁵ Ejeni Yawe nuetakanikinete oni kitwaka, ido alimok ngesi oni ebe ketwana itunganan, anangaki aijarake. Erai atwanare ailocokinet naka aijar. Aso ketwana itunganan, mam bobo ngesi inyikoni aipup ka aomoom kanenicie.a Arai kitwaka oni mam bobo kipedori asesen, aipup, karaida aomoom.

⁶ Ewadikat Ekabaka Solomon ebe “mam ikatwak ejenete ibore.” Mam ikatwak epedorete amina araibo nat angara oni ido “emamei aswam, karaida ainerun, karaida aijen karaida acoa kokatwak.” (Kosiom Ekalimonokinan 9:5, 6, 10.) Ido koitabo loka Isabulin 146:4, elimokinit oni Ebaibuli ebe arai ketwana etunganan, “eoliorete aomisioke.”

NUINERIT YESU KANUIKAMUNITOS ATWANARE

7. Anyoika abu Yesu kinerite kanuikamunitos atwanare?

⁷ Natwania Lasaro loarai epapero loka Yesu, abu ngesi kolimok ikesisiakake ebe: “Opaperowok Lasaro ejotoi.” Konye mam Yesu apeleikinit atemar ebe iyengi Lasaro. Abu Yesu kiyatak atemar ebe “atwana Lasaro.” (Yokana 11:11-14) Abu Yesu kituput atwanare kede ajo. Ido mam ngesi abu kotema ebe elosit Lasaro toma akuj arai bo nat airiamun kede ipajanake luetwakito. Ido mam bobo abala ebe abu Lasaro kolot akim namam edungei arai bo aurunio kwape itunganan ice arai itiang. Asubit Lasaro bala ajotoi noi. Itupusitos aiwadikaeta ace nuka Ebaibuli atwanare keda ajo. Ebala Ebaibuli ebe neatwania Sitepan, abu ngesi “kojotoor.” (Aswamisio 7:60) Ewadikat ekiyakia Paul da ebe apotu Ikristayon ice ‘kojotooros’ kotoma atwanare.​—1 Ikorinton 15:6.

8. Eipone bo ani ijenunia oni ebe mam Edeke asubit itunga tetere etwakete?

⁸ Asubit kereka Edeke Adam ka Keba tetere kesi etwakete? Mam! Asubit Yawe kesi tetere ejarete ikar kere kongalete. Neasubia Yawe itunga, abu ngesi kijaik kesi eipud lokaijar ikar kere. (Ekalimonokinan 3:11) Mam auriak iyalamasi asesen idwekec emojongete kotwakete da, ido epupi Yawe da kwape kwangin kanuwok. Konye arai kosubite Edeke oni kanu aijar ikar kere, kanukinyo kitwakia?

KANUKINYO KITWAKIA?

9. Kanukinyo araar aicoretait naejaikinit Yawe Adam ka Keba napatana arimaar?

⁹ Komanikor loka Eden, abu Yawe kolimok Adam ebe: “Inyamenenei kwape ikotor araito nuka ngolikitoi komanikor: dimarai mam inyami nuka ekitoi loka ajenun nuejok ka nueroko: naarai kapaaran nainyamia ngun itwani cut.” (Ageun 2:9, 16, 17) Acaii aicoretait ngin ido mam ationo arimaar, ajaatar Yawe keda apedorosio nuka alimokin Adam ka Keba nuibusakinit aswam kanumam ibusakinit. Korai korimaaritos kesi Yawe, ti kesi kitodutu ebe eyongitos kesi eyaitene loka Yawe. Abeit bobo kes aisiyalamikin Yawe kanu ainakin kesi iboro kere luepudasi kesi.

10, 11. (a) Eipone bo ani abu Satan kingalakinia Adam ka Keba? (b) Kanukinyo amameor aitimio kanuka adiakar naka Adam ka Keba?

¹⁰ Nukaiturur, apotu Adam ka Keba koseutu aimwang Yawe. Abala Satan ingisi Keba ebe: “Abala teni Edeke ebe, ‘Mam inyamenenete araito nuka ekitoi kere lokomanikor’?” Kobongok Keba kobala ebe: “Kisiikinitai ainyam araito nuka ikito lukomanikor; dimarai araito nuka ekitoi loejai kiding omanikor, ngun abala Edeke ebe: ‘Mam inyamenenete, karaida atiror, kinyeis atwakare.’”​—Ageun 3:1-3.

¹¹ Kosodi kotema bobo Satan atiar: “Mam cut itwakete. Naarai ejeni Edeke ebe apaaran napinyamiata ngun, nges ekwenyuniata akusikonye, iraunos yesi da bala Edeke, ajenenen nuejok ka nueroko.” (Ageun 3:4-6) Akoto Satan Keba aomoom ebe apedori ngesi alopet aseun aswam nuejok arai nueroko. Kwangin, abu Satan kingalak Keba kanuikamunitos nuepote atakanikin nges arai kemwang Edeke. Abala Satan ebe mam Keba etwani, kosodi do Keba ainyam araito koinak da okilenike konyam. Ajenete Adam ka Keba ebe kecorakit Yawe kesi ebe mam ainyam araito. Nanyamiata kesi araito, apotu kesi komwangata aicoretait na acai ido kopatana arimaar. Kanu anyamiata kesi araito apotu kesi kitodutu ebe mam kesi ayongitos Papakec lokokuju loemin. Amamei do kesi aitimio kanuka akecediakar!

12. Kanukinyo abu adiakar naka Adam ka Keba kitakadikinia Yawe?

¹² Apotu do auriak wok lusodit kitakadikis Yawe Lokasuban kec! Epone bo ani ipupunio ijo arai kitopolou ijo idwe kosodete aimwang ijo? Mam kereka ijo kikadakini?

13. Anyoin bo apolou na abalar Yawe elimokini Adam ebe “ibongori da apua”?

¹³ Namwangiata Adam ka Keba Edeke, apotu kesi kotwakiasi aijar naka ikar kere. Abu Yawe kolimok Adam ebe: “Naarai irai ijo, apua ibongori da apua.” (Kosiom Ageun 3:19.) Apolouke ebe abu Adam kobongo bobo araun apua, araun bala mam nges kesubunitai. (Ageun 2:7) Kedau Adam adiakar, abu kotwana komameun bobo cut.

14. Kanukinyo kitwakia?

¹⁴ Arai korimaarito Adam ka Keba Edeke, ti kesi eroko ejarete kitoni lolo. Konye namwangiata kesi Edeke, apotu kesi kodiakasi, kosodete atwakare. Esubit adiakar kwape adeka nairumuna kanejaasi auriakawok lusodit. Kiwurunitai oni kere irai ikadiakanarak, ido ngun nges kitwakia oni da. (Iromayon 5:12) Konye mam ngin arai alosikinet naka Edeke kanuka itunga. Mam Edeke akoto itunga atwakare, ido enyarit Ebaibuli atwanare kwape “lokasurup.”​—1 Ikorinton 15:26.

KILACAKIN IJO ABEIT

15. Eipone bo ani elacakinia oni abeit naikamunit atwanare?

¹⁵ Ajenun abeit naikamunit atwanare kilacakini ijo kotoma aisisianakineta nuipu nukaisab. Kilimokinit oni Ebaibuli ebe mam ikatwak epupete apipil karaida adiokadakinet. Mam oni ipedori einer ka kesi, ido mam kesi da epedorete einer kaoni. Mam kesi epedorete aiswamakin oni nueroko, aso mam oni ibusakinit akurian kes. Konye, isisianakinete idiinin luipu ebe elositos lukatwak aiboisit ace ido ebe ekoto oni atacakin isasedootin arai engarenok luka ediini ikapun kanu ailipanakin lukatwak. Konye naijenunia oni abeit naikamunit atwanare, mam oni icamuni aisab kwape kangin.

16. Anyoin bo aisab naisisianakinete idiinin luipu kanuikamunitos lukatwak?

¹⁶ Itosomai Satan idiinin lukaisab kanu aingalingalia oni ka ainakinit oni aomit ebe eroko lukatwak ejarete. Kwape aanyunet, isisianakinete ice ebe arai kitwaka, ejai oni itutubet yenelosi aijar nenice. Isisianakini kereka ekonidiini kwangin, arai bo isisianakini abeit naka Ebaibuli naikamunit lukatwak? Itosomai Satan aingal kanu aitapaar itunga kotoma aima Yawe.

17. Kanukinyo eraar aisisianakin naka aicwe itunga kakim amorosit kanejai Yawe?

¹⁷ Mam aisisianakineta nuka idiinin luipu ejokuka. Kwape aanyunet, isisianakinete idiinin ice ebe icweo itunga luarokok kakim namam edungei. Erai ngin amorosit kanejai Yawe. Mam Yawe itisilaanar itunga! (Kosiom 1 Yokana 4:8.) Epone bo ani ipupio ijo arai kiyany ijo itunganan itisilaari ikekoku koipone lo aicwe akaninike? Ipedori ijo aomoom ebe erai etunganan ngon loededeng. Mam ijo ikotokin aipaperikin keda nges. Ido ekoto Satan oni aipup eipone ngon kanuikamunitos Yawe!

18. Kanukinyo mam ibusakinitor oni akurian lukatwak?

¹⁸ Isisianakinete idiinin ice ebe ketwakata itunga, eraunos kesi imoyon. Isisianakinete idiinin ngun ebe ibusakinit oni ayongit ka akurian imoyon ngun naarai epedorete kesi araun ipaperowok luegogong arai bo lukasurup luededeng. Iyuunito itunga luipu aisab ngin. Ekuriaka kesi lukatwak, kanuka ngun emaete kesi lukatwak aboisit na aima Yawe. Kiitu ebe mam ikatwak epupete karaida aijen idiobore, aso mam ibusakinit oni akurian kesi. Erai Yawe Lokasubaniwok. Erai ngesi Edeke lokabeit, ido ibusakinit oni aima nges bon.​—Apukokinio 4:11.

19. Eipone bo ani ingarakinitor oni aijen abeit naikamunit atwanare?

¹⁹ Naijenunia oni abeit naikamunit lukatwak, ilacun oni kotoma aingal naka idiinin lukaisab. Ido ingarakini abeit oni amisiikin aisumununeta nuijaikinit Yawe kanuikamunitos aijarawok nakoingaren .

20. Anyoika bo nuibuni oni aisisiaun kosula loetupakini?

²⁰ Kolo sek, abu ejaanakinan loka Edeke loanyaritai Yob kingit ebe: “Arai ketwana itunganan epedori kereka ajarun bobo?” (Yob 14:14, NW) Epedori kereka itunganan yenetwanit ajarun bobo? Abongokinet naijaikinit oni Edeke kotoma Obaibuli erai naejokuna. Ibuni oni ajenun abongokinet ngin kosula kalo etupakini.

1-3. Inyoin bo eenit oni kere, Ido ingai bo kilakuni oni?

KOOMOOM ber ijo bala eenitai ijo kanuka akiro numam ijo iswamat. Ido komamei ijo arereng alacakinio. Emamei ijo amuno, emameete nuipedori ijo aswam. Konye naemameor ijo adiomun, kobuni itunganan yenikilakuni ijo kisumunikinite aingarakin ijo! Eipone bo ani ipupunio ijo?

² Irai oni kere iwenan luka atwanare. Karaida kitam oni aswam nuipedori kere, mam oni ikui. Konye ejaatar Yawe kapedori naka alakun oni kotoma atwanare. Ido kisumunit ebe “lokasurup lokawasia amudiario nges atwanare.”​—1 Ikorinton 15:26.

³ Koomoom ber ijo eipone loipupunia ijo ainapakin naemameunor atwanare! Konye mam erai atwanare bon ebeit Yawe alemar. Ebuni bobo ngesi aitajarun lukatwak. Komoom ber ijo eipone loejaunotor ngun kanekon. Isumunit ngesi ebe “ejarunete lukatwakakon.” (Isaia 26:19, NW) Na ngesi enyarit Ebaibuli ajarun.

ARAI KETWANA YENIMINATAKON

4. (a) Inyoin epedori aitalakar oni ketwana yeniminatawok araibo ipaperowok? (b) Lubo angai ipapero luka Yesu?

⁴ Arai ketwana iminatawok arai ipaperowok, idumuni do oni apipil ka akuudian naepol. Ipupi oni bala emamei oni ajokis. Mam oni ipedori aitajarun ngesi. Konye ijaikinit oni Ebaibuli amuno najokan. (Kosiom 2 Ikorinton 1:3, 4.) Kaanyutu ber oni aanyunet adiopet naitodunit ebe ekoto Yawe ka Yesu aitajarun lukatwak. Neajaar Yesu toma akwap, epejonokini ngesi Lasaro ka ainacanake. Araasi kesi kere ipapero. Ebala Ebaibuli ebe: “Komina Yesu Marita ka inacike ka Lasaro da.” Konye, kadiope paaran kotwana Lasaro.​—Yokana 11:3-5.

5, 6. (a) Anyoika nuabu Yesu kiswama keanyu ngesi ipajan ka ipapero luka Lasaro emonyete? (b) Kanukinyo eraatar nuitalakarete oni ajenun eipone lo apupio Yesu kanuikamunitos atwanare?

⁵ Abu Yesu kolot aitalakar Marita ka Mariam. Kepupu Marita ebe abeit Yesu abunere, abu kolot kinga naka ere airiamun ka nges. Eyalama ngesi aanyun Yesu, konye abu ngesi kolimok Yesu ebe: “Arai kijai ijo ne ti mam onaceka ketwana.” Aomit Marita ebe eyapit Yesu. Akaulo kangun, abu Yesu koany inacike Mariam emonyi, abu kokadak ido komony. (Yokana 11:21, 33, 35) Abu ngesi da kopup apipil naipupi oni naitwaniara yeniminatawok.

⁶ Aijen eipone loepupio Yesu kanuikamunitos atwanare erai naitalakaari oni. Ido esubit Yesu bala Papake. (Yokana 14:9) Ejaatar Yawe ka apedor naka alemar atwanare ikar kere, ido ebuni ngesi aswam ngun katipet.

“LASARO, KOLOM!”

7, 8. Kanukinyo agiritor Marita alemar amoru kates kana edaikinitai Lasaro, konye nuinyoika abu Yesu kiswama?

⁷ Nadolunio Yesu ates nedaikinitai Lasaro, arapakinitai amoru ates, abu Yesu kotema atiar: “Kolemasi amoru.” Konye mam Marita akoto. Adaunit lokatwan Lasaro apaarasia aongon kates. (Yokana 11:39) Mam ngesi ajeni nuabeit Yesu aswam kanu aingarakin onaceke.

⁸ Abu Yesu kolimok Lasaro: “Kolom!” Akiro nuapotu Marita ka Mariam koanyutu araasi nuaumokina. “Kolom lokatwan eenitai akanin ka akeje kigoen lukaida.” (Yokana 11:43, 44) Aponi kitajarunai Lasaro! Abu ngesi kimorikikin kipajanake ka ipaperoke. Apotu kesi kotunutunata, atironor ka einer ka Lasaro. Arai ngin aumokinet naepol! Abu Yesu kitajaru Lasaro.

“IPESE, KATEMARI JO ATIAR, ‘KONYOU!’”

9, 10. (a) Ingai bo ijaikinit Yesu apedor naitajarunun itunga? (b) Kanukinyo ejokunar oni aisisia nuikamunitos akiro nuka ajarun?

⁹ Etajari kereka Yesu itunga kakepedori elope? Mam. Eroko Yesu kitajarunia Lasaro abu ngesi kilip nejai Yawe ido abu Yawe kijaik ngesi apedor naitajarun Lasaro. (Kosiom Yokana 11:41, 42.) Mam erai Lasaro bon abu Yesu kitajaru. Elimokinit oni Ebaibuli nuikamunitos ipese yenikar 12 yenadeka noi. Akadakinit papake loanyaritai Yairo, ido abu ngesi kilip Yesu aitangaleun ngesi. Arai ngesi ikekoku idiopet bon. Naperoko ngesi inera keda Yesu, kopotu icetunga inerasi ebe: “Atwana akokukon. Kanukinyo itaaria bobo Ekesisianakinan?” Konye kobongok Yesu Yairo atiar: “Sirikikurianar, kiyuu aiyuun.” Kouparos ka Yairo oreke. Keyapiasi kesi ore, kodumutu itunga emonyete. Kotema Yesu atiar: “Sirikimonya naarai mam etwanit.” Aticepak mam auriak apese angin ajenete apolou na akiro nuenera Yesu. Abu Yesu kolimok itunga kere anyoun kosodi ngesi aupar keda auriak apese toma agola naeperikinitai apese ngin. Abu Yesu kikeu nges akan ido kolimok atiar: “Ipese, katemari jo atiar, ‘konyou!’” Komoom ber aiyalama napotu ikeuriak kodumutu neanyuniata kesi akookec enyouni kosodi ageun alosit. (Marako 5:22-24, 35-42; Luka 8:49-56) Ameun kapaaran kangin, naesesenata kesi akokukec, kiitunete kesi nuabu Yawe kiswamak kesi kitosomai Yesu.a

¹⁰ Apotu itunga luabu Yesu kitajaru kotwakata bobo. Konye ejokuna oni aisisia nuikamunitos itunga ngun naarai ijaikini ngin oni da amuno nabeit. Ekoto Yawe aitajarun itunga, ido ebuni ngesi aswam ngun.

NUISISIAUNI ONI KOTOMA AKIRO NUKA AJARUN

11. Anyoika bo isisianakini oni Ekalimonokinan 9:5 nuikamunitos Lasaro?

¹¹ Isisianakini Ebaibuli ebe “mam ikatwak ejenete ibore.” Arai kwape kwangin kanejai Lasaro da. (Ekalimonokinan 9:5) Kwape alimunitor Yesu, asubit bala ajootoi Lasaro. (Yokana 11:11) Naejaar Lasaro ates, mam ngesi ‘ajeni idiobore.’

12. Epone bo ani ijenunia oni ebe abu ajarun naka Lasaro kojaun?

¹² Naetajarunia Yesu Lasaro, asesenete itunga luipu. Karaida lukasurup ke Yesu ajenete ebe keswamaunit Yesu aumokinet na. Ajai Lasaro da loetajarunitai, ngun ngesi itodunitosi cut ebe abu ajarun naka Lasaro kojaun. (Yokana 11:47) Bobo da, apotu itunga luipu kolototo aanyun Lasaro, akaulo kangun, apotu kesi da kiyuut ebe kejukunit Edeke Yesu. Lukasurup ke Yesu mam akotos aiyuun ngun, aso apotu kitemokis aiar Yesu ka Lasaro da loetajarunitai.​—Yokana 11:53; 12:9-11.

13. Kanukinyo kijenia ebe epedori Yawe aitajarun lukatwak?

¹³ Abu Yesu kotema ebe ejarunete “itunga kere luejaas toma atesin.” (Yokana 5:28) Apolouke ebe itunga kere luiituni Yawe itajarunio. Kanu Yawe aitajarun idiotunganan, ibusakinit nges aijen akiro kere nuikamunitos nges. Ejeni kereka ngesi itunga jokan? Eebo, ejaasi ibillionin nuka aacer toma akuj. Ebala Ebaibuli ebe ejeni Yawe kangin idiopet kakesi. (Kosiom Isaia 40:26.) Kwape epedoritor Yawe aiitun aacer kere, iituni cut ngesi akiro kere nuikamunitos itunga kere luetwakito kanu aitajarun kesi. Nuepolok kakere, Yawe nges esubit iboro kere, aso kijeni ebe ejaasi ngesi kapedor naka aitajarun lukatwak.

14, 15. Anyoika bo nuisisiauni oni kotoma akiro nuka Yob kanuikamunitos ajarun?

¹⁴ Abu Yob ekejaanakinan loamunokina Edeke kiyuunite nuka ajarun. Engisit ngesi ebe: “Arai ketwana itunganan, epedori kereka ajarun bobo?” Abu bobo ngesi kolimok Yawe ebe: “Kinyarauni, eong da eii: Imiela ijo aswam naka akaninikon.” Eebo, ajeni Yob ebe imiela Yawe aitajarun lukatwak kedol apak.​—Yob 14:13-15, NW.

¹⁵ Eipone bo ani ipupia ijo kanuikamunitos amuno naka ajarun? Aticepak iwomit ijo ebe, ‘Itajaruno kereka ikapajan ka ikapapero da luetwakito?’ Aijen ebe imiela cut Yawe aitajarun lukatwak, italakaari oni. Aanyutu ber oni nuebala Ebaibuli kanuikamunitos aibois naebeit kesi aiboio keda lubo angai itajarunio.

‘IIRARETE EKEPOROTO KOSODETE ALOMUN’

16. Aijar naikoni bo ai epote itunga luitajarunio kanu aijar kakwap adumun?

¹⁶ Kolo sek, apotu itunga luetajarunitai kimorikinos ka ipajanakec ka ipaperokec kane kotoma akwap. Ebuni araun kwape kwangin koingaren, ido ebuni ajokunar adepar nen. Kanukinyo? Naarai ngun kere luitajarunio ejaunos ka arereng na aijar ikar kere komam bobo etwakete. Ido epote kesi aiboi kakwap naejok adepar naijai oni. Emameun ejie, abilibilio naka ikisila, karaida adeka.

17. Lubo angai itajarunio?

¹⁷ Lubo angai ebeit aitajarun? Abu Yesu kotema ebe ‘iirarete itunga kere luejaasi toma atesin ekeporoto kosodete alomun.’ (Yokana 5:28, 29) Ido elimokinit oni Apukokinio 20:13 ebe: “Kijaik angolol lukatwak lukejaasi tomakeng, Atwanare da ka Okatwak kijaikis lukatwak lukejaasi tomakec.” Eebo, ejarunete bobo lukatwak. Abala bobo ekiyakia Paul ebe “ejaun ajarun naka luedolito ka lumam edolito da.” (Kosiom Aswamisio 24:15.) Inyoin apolou kanu?

18. Lubo angai “luedolito” lueponio aitajarun?

¹⁸ “Luedolito” imoriaritos ikejaanakinak luka Edeke Yawe luamunoko luajaasi eroko Yesu ebuno toma akwap. Itunga kwape nat Noa, Aburaam, Sara, Musa, Rusi ka Esita eponio aitajarun kosodete aijar kakwap. Ipedori ijo aisiom nuipu nuikamunitos icekakesi kotoma oitabo loka Iburanian esula 11. Do bo do ejaanakinak luka Edeke Yawe luemunokina kosodete atwakare kapakiowok? Eraasi kesi da “luedolito,” kanuka ngun itajarunio kesi da.

19. Lubo angai ngun “lumam edolito”? Inyoin arereng na einakini Yawe kesi?

¹⁹ Itunga “lumam edolito” imoriaritos ibillionin lukaitunga lumam edumunitos arereng na aisisiaun nuipu nuikamunitos Yawe. Karaida ketwakito kesi, mam Yawe imurokinit kesi. Itajaruni Yawe kesi, ido einakinio kesi da arereng naka aisisia nuipu nuikamunitos Yawe ka aijaanakin nges.

20. Kanukinyo mam itajarunere itunga kere?

²⁰ Erai kereka ebe itajarunio itunga kere luetwakito? Mam. Abala Yesu ebe mam itunga ice itajarunio. (Luka 12:5) Ingai bo itutubi arai ibusakinit itunganan aitajarunio araibo mam? Yawe ngesi ekatubon lokapolon kakere, konye ijaikinit ngesi Yesu apedorosio nuka araut ‘Ekatubon loka ikajarak ka ikatwak da.’ (Aswamisio 10:42) Ngul luejeni ngesi ebe eraasi luarokok ido komam ekotos aijulakin mam itajarunio.​—Koany Nuengesete 19.

AJARUN NAKA ALOSIT KUJU

21, 22. (a) Akuan bo anyoin itajarunere ngul luelosete toma akuj? (b) Ingai losodit aitajarunio kanuka alosit kuju?

²¹ Isisianakini bobo oni Ebaibuli ebe itajarunio icetunga kanuka alosit toma akuj. Mam itunganan yenitajarunio kanuka alosit toma akuj elosi kakekuan. Itajarunio ngesi kwape etunganan lomoyo kanuka aijar nako toma akuj.

²² Yesu nges losodit adumun atajarunio naka epone kalo. (Yokana 3:13) Ketuboros apaarasia 3 akaulo naarere Yesu, abu Yawe kitajaru ngesi. (Isabulin 16:10; Aswamisio 13:34, 35) Mam Yesu etajarunitai keda akuan. Itetemit ekiyakia Petero nuikamunitos Yesu ebe “nakearere akuanake konye koinakinai aijar kotoma omoyo.” (1 Petero 3:18) Aponi kitajarunai Yesu kwape etunganan lomoyo ka lokapedor! (1 Ikorinton 15:3-6) Konye ebala Ebaibuli ebe edumunete ice da aitajarunio naka epone kalo mam erai Yesu bon.

23, 24. Lubo angai eraasi “esipan loedit” loenerit Yesu, ido imwaasi bo kesi ai?

²³ Eroko Yesu ketwana, abu ngesi kolimoki ikekesisiak atiar: “Alosi aitemokin yes aibois.” (Yokana 14:2) Apolouke ebe itajarunio ikesisiak luka Yesu ice alosit toma akuj. Eraasi bo kesi imwaasi ai? Elimunit Yesu ebe edite ekecetiai, ido enyarit ngesi kesi kwape “esipan loedit.” (Luka 12:32) Abu ekiyakia Yokana koanyu etiai lokangul ebwoete ka Yesu “komoru Sion [toma akuj] . . . itunga ilukumin akwatat ka akaisaongon ka luongon.”​—Apukokinio 14:1.

²⁴ Iwori bo itajarunere ikristayon lu 144,000 alosit kuju? Ebala Ebaibuli ebe itajarunio kesi kapak naegeunia Kristo aipuga kotoma akuj. (1 Ikorinton 15:23) Kijai oni apaarasia ngun kwape kwana, ido luipu kotunga 144,000 etajarun alosit toma akuj. Ngun lueroko ideuna kotoma akwap kwape kwana kapaarasiawok ketwakata erasakino aitajarun alosite toma akuj. Konye, Itunga luipu itajarunio aijar kotoma Paradais kakwap koingaren.

25. Anyoika nuibuni oni aisisia kosula loetupakini?

²⁵ Katipet, ebuni Yawe alakun oni kotoma atwanere ido ebuni ngesi alemar atwanare ikar kere! (Kosiom Isaia 25:8.) Konye inyoin elosete itunga ngun aswam toma akuj? Itetemit Ebaibuli ebe epote kesi aipuga keda Yesu kotoma apugan naka Ajakanut. Isisiauni oni nuipu nuikamunitos ngun kosula loetupakini.