ፈተና ንምቅዋም ካብ የሆዋ ሓገዝ ለምን። ዘይፍጹማት ሰባት ስለ ዝዀንና፡ ምስቲ ጌጋ ኽንገብር ዚቐርበልና ፈተና ወትሩ ንቃለስ ኢና። ሰይጣን ድማ ነቲ ቓልሲ እቲ ብእተኻእለ መጠን ንምኽባድ ሒዅ እዩ ዚብል ዘሎ። ሓደ ኻብቲ ንኣተሓሳስባና ንምብልሻው ዚጽዕረሉ መገዲ፡ ብርኹስ መዘናግዒ ኣቢሉ እዩ። ከምዚ ዝኣመሰለ መዘናግዒ ንኣእምሮና ብርኹስ ሓሳባት ኪመልኦ ይኽእል እዩ። እዚ ሓሳባት እዚ ድማ ንውሽጣዊ ስብእናና ኼበላሽዎ፡ ናብ ከቢድ ሓጢኣት እውን ኪመርሓና ይኽእል እዩ። (ማር. 7:21-23፣ ያእ. 1:14, 15) ጌጋ ንምግባር ንዚቐርበልና ፈተናታት ንምስጋር፡ ሓገዝ የሆዋ የድልየና እዩ። የሱስ ኣብቲ ኣብነት ዚዀነና ጸሎቱ፡ “ካብቲ እኩይ ኣድሕነና እምበር፡ ኣብ ፈተና ኣይተእትወና” ዚብል ልማኖ ኣእትዩ ኣሎ። (ማቴ. 6:13) የሆዋ ኺረድኣና ይደሊ እዩ፣ ኰይኑ ግና፡ ንሕና ሓገዙ ኽንልምን ኣሎና። ምስ ጸሎትና ተሰማሚዕና እውን ክንመላለስ ኣሎና። w23.05 6-7 ¶15-17

ሰብ ሓዳር ነቲ ምስ ሰማያዊ ኣቦኦም ዘለዎም ምሕዝነት ኣኽቢሮም ዚርእይዎ እንተ ዀይኖም፡ ንምኽሩ ብቕሊሉ እዮም ዚቕበልዎ። እዚ ድማ ኣብ መንጎኦም ዘላ ፍቕሪ ኸም እትዝሕል ኪገብር ካብ ዚኽእል ጸገማት ይሰትሮም እዩ። ብዘይካዚ፡ መንፈሳውያን ሰባት ንየሆዋ ኺመስልዎ እዮም ዚጽዕሩ። ከም ለውሃትን ትዕግስትን ይቕረ ምባልን ዝኣመሰለ ባህርያት እውን የማዕብሉ እዮም። (ኤፌ. 4:32–5:1) እዚ ባህርያት እዚ ዘለዎም ሰብ ሓዳር ከኣ፡ ብቐሊሉ እዮም ፍቕሪ ዜማዕብሉ። ካብ እትምርዖ ልዕሊ 25 ዓመት ዝገበረት ሊና ዝስማ ሓብቲ፡ “ንመንፈሳዊ ሰብ ብቐሊሉ ኢኻ እተፍቅሮን እተኽብሮን” ትብል። ኣብ መጽሓፍ ቅዱስ ዚርከብ ኣብነት እስከ ንርአ። የሆዋ ነቲ ናይ መጻኢ መሲሕ ወለዱ ዚዀኑ ሰብ ሓዳር ኪሓሪ ኸሎ፡ ካብ ብዙሓት ዘርኢ ዳዊት ንዮሴፍን ንማርያምን እዩ ሓርዩ። ስለምንታይ፧ ክልቲኦም ምስ የሆዋ ብሕታዊ ርክብ ነይርዎም እዩ፣ ሓዳሮም ከኣ ኣብቲ ንዕኡ ዘለዎም ፍቕሪ እተመስረተ ኸም ዚኸውን ይፈልጥ ነይሩ እዩ። w23.05 21 ¶3-4

እቲ መራሒና ዝዀነ የሱስ ፍጹም እኳ እንተ ዀነ፡ እቶም ንዓና ንምምራሕ ኣብ ምድሪ ዚጥቀመሎም ሰባት ግና ፍጹማት ኣይኰኑን። ምናዳ ኽንገብሮ ዘይንደሊ ምስ ዚእዝዙና፡ ተኣዛዝነት የጸግመና እዩ። ንኣብነት፡ ሃዋርያ ጴጥሮስ ተኣዛዝነት ዝኸበዶ እዋን ነይሩ እዩ። ኣብ ትሕቲ ሕጊ ሙሴ ርኹሳት ዝዀኑ እንስሳታት ኪበልዕ ካብ መልኣኽ መምርሒ ምስ ተዋህቦ፡ ሓንሳእ ጥራይ ዘይኰነስ፡ ሰለስተ ሳዕ እዩ ኣብዩ። (ግብ. 10:9-16) ስለምንታይ፧ ነቲ ሓድሽ መምርሒ ኺርድኦ ኣይከኣለን። በቲ ኻልእ ሸነኽ ድማ፡ ሃዋርያ ጳውሎስ እቶም ኣብ የሩሳሌም ዝነበሩ ክርስትያን ሽማግለታት፡ ንሱ ንሕጊ ሙሴ ኸም ዚሕሉ ምእንቲ ኼርኢ ኣርባዕተ ሰብኡት ናብታ ቤተ መቕደስ ኪማላእ እሞ ምሳታቶም ኪነጽህ መምርሒ ምስ ሃብዎ ተኣዚዙ እዩ። ጳውሎስ፡ ክርስትያናት ኣብ ትሕቲ ሕጊ ሙሴ ኸም ዘይኰኑ ይፈልጥ ነይሩ እዩ። ዋላ ሓንቲ ጌጋ እውን ኣይገበረን ነይሩ። ኰይኑ ግና፡ ከምቲ እተባህሎ ገበረ፡ “ነቶም ሰብኡት ሒዙ ንጽብሒቱ ምሳታቶም ነጽሀ።” (ግብ. 21:23, 24, 26) እዚ ተኣዛዝነቱ ድማ ንሓድነት ኣበርክቶ ገበረ።—ሮሜ 14:19, 21። w23.10 10 ¶15-16