Aerenakaa

27 Yange mba kaan ér se nyôr tso se yem ken Italia yô, i na Paulu kua mbagenev ken purusu sha ikyev i orshoja u vesen ugen ken kweshojaa u Agôsetu, i yilan un ér Yuliôsu. 2 Tsô se nyôr tso u ken Adaramitim, u lu moughon una kar sha ajiir a hen kpezegemnger, a hen tiôntar u Ashia la yô, maa tso mough a vese; Aristareku, Ormasedonia u ken Tesalonika kpa lu a vese imôngo. 3 Mba ker ken sev mbugen yô, se va nyôr hen Shidon, nahan Yuliôsu er a Paulu doo doo, na un ian ér a za hen azende a na shi ve̱ nenge sha a na.

4 Tso la mough a vese her, kpa er ahumbe lu tagher se u zan pe se ver ishigh la yô, se palegh se kar ikyua a icile i Shiperu. 5 Se va ken atô u zegemnger se va kar Shilishia man Pamfilia, se va ar hen ihyongo i Mira, hen tiôntar u Lishia. 6 Maa orshoja u vesen la zua a tso u ken Alekezanderia, u lu yemen ken Italia yô, nahan a nyôr a vese shin tso shon. 7 Tso ne yem a vese kure kure, ayange nga kar imôngo yô, se va nyôr hen Shinidu sha ican. Kpa er ahumbe lu tagher se u zan pe se ver ishigh la yô, se palegh se kar hen kpe u icile i Kerete, ikyua a Salmoni. 8 Se kar hen kpe u icile ne sha ican se va ar hen ijiir igen, i yilan ér Ahongo a Doonashe,* ikyua a gar u Lasea.

9 Tsô er ayange kar kpishi yô, va ar hen shighe u kera doo u nahan tso ga yô, gadia shighe u hôron kwaghyan sha Iyange i Nan Iwom la je kpa kar. Nahan Paulu wa ve kwagh, 10 kaa a ve ér: “Ne nomsombaiorov, m nenge yô, zende ne ua za a doo ga; tso una za ur shi ikyav kpishi mbia saa ishe, shi se kpa alaghga se kpe.” 11 Nahan kpa, orshoja u vesen la wa kwagh u Paulu lu ôron ne ikyo ga, gema ungwa imo i ornahantso kua ortsoo. 12 Er ihyongo la gema doo u lun her sha shighe u wuhee* ga yô, mbagen kpishi kaa ér a̱ fatyô yô, i̱ mough a yem hen Finikia, a za lu her shighe u wuhee la a̱ kar been. Ihyongo ne lu hen Kerete, i̱ ver ishigh vegher u sha ityoughkitaregh.

13 Tsô ahumbe a ken imbusutariyan nga ngur karen teghelee yô, ve hen ér vea fatyô u kuren awashima ve la, nahan ve tsua imandetso, ve gba nahan tso karen hen icile i Kerete, ikyua a kpetar. 14 Nahan kpa, shighe karen kpuaa yô, ijeverahumbe i i yer ér Yuroakwilo* la, za va taveraa va ta sha tso. 15 Er ahumbe la ta sha tso taveraa je tso kera fatyô u veren ishigh sha a ga yô, se de ahumbe shon lu mgbeghan tso yemen. 16 Tsô se va kar ikyua a ancile ugen, i yilan ér Kauda, ape ahumbe la aa tagher se u yemen ga yô. Nahan cii kpa, se ya ican a antso u kiriki* u i zer shin ityôtsoo la tsung ser a de saan ga. 17 Kpa mba kenden a mi mba we shin tso yô, ve nyôôso tso, shi er ve lu cian ér vea va za ta sha waarawa u Shiriti yô, ve shir a ikyor i sha ikyondo i tsoo la shin inya, nahan ahumbe lu masen mgbeghan tso yemen. 18 Mba ker ken sev mbugen yô, ve gba dughun ikyav mbigenev shin tso haan kera ér tso a peese, sha ci u ijeverahumbe la lu daase a vese sha utaha. 19 Sha iyange i sha utar la, ve dugh ikyav mbi tsoo mbigen ayol a ve ve haa kera.

20 Er iyange man asan kera due ga ayange imôngo, shi ijeverahumbe lu tan sha a vese taveraa yô, se kera gba nengen a gbenda u waren ga. 21 Er ve lu ijen shighe gôgônan yô, Paulu mough tile hen atô ve kaa ér: “Ne nomsombaiorov, yange ma ne ungwa kwaghwan wam, ma ne kera mough a tso hen Kerete ga, nahan ma i va hingir u se ya ican shin se dugh ma kwagh se kende ken mnger imba ne ga. 22 Nahan kpa, m ngu kaan a ven mer, taver nen ishima, gadia or wen môm nana saa ga, a lu tso tseegh. 23 Ortyom u Aôndo u m lu u na shi m eren un icighantom la, nyen va tile ikyua a mo tugh 24 kaa ér: ‘De cie ga, Paulu. U za tile sha ishigh ki Shisar keng, man nenge! Aôndo una yima u kua mba ve lu shin tso a we imôngo ne cii.’ 25 Nahan yô, taver nen ishima nomsombaiorov, gadia m na Aôndo jighjigh mer kwagh la una er vough er i kaam nahan. 26 Nahan kpa, ka keng tso una za ur a vese hen kpe u icile igen.”

27 Ahumbe daase a vese hen Zegemnger u Aderia zan zan ka va lun atôutu sha iyange i sha 14 yô, mbanahantso mbara hii u nengen ér ve mba zurum sha tar. 28 Nahan ve kar ve nenge mngerem mara za kuma er angahar 120 nahan,* shi mba kporom ken hemen daalaa yô, ve kar ve nenge ma za kuma er angahar 90 nahan.* 29 Er ve lu cian ér alaghga tso a va za ta sha avande yô, ve shir a amandeatsoo anyiin a shin ityôtsoo la shin mnger, maa ve gba tômon ér sev ma mbu av. 30 Kpa mbanahantso mbara gba nôngon ér vea yevese a undu tso; ve lu hungwan a antso u kiriki la shin zegemnger, eren inja er ve soo u za shirin a amandeatsoo a sha ityough ki tsoo la shin mnger nahan, 31 Paulu maa ôr a orshoja u vesen la kua ushoja mbara ér: “Saa ior mban vea lu shin tso, gayô ne fatyô u waren ga.” 32 Ushoja mbara maa tôndo ikyor i sha antso u kiriki la, maa a gba shin mnger.

33 Sev mbu va zurum u aven yô, Paulu taver ve cii asema ér ve ya kwagh, a kaa ér: “Ne kegh a ishimanyian zan zan nyian ka ayange 14 je ne, man ankwaghyan cuku tsô kpa ne ya ga. 34 M ngu zamber a ven mer ya nen kwagh; ne er nahan yô, kwagh la una wase ne u waren, gadia gwarce u sha ityough ki mô wen môm kpa una saa ga.” 35 Ôron kwagh ne kera yô, a tôô beredi, a er msen hen Aôndo* sha ishigh vev cii, maa a coon, a gba yan. 36 Tsô ve cii ishima taver ve, ve gba yan kwagh. 37 Se cii se lu iorov 276 shin tso la. 38 Mba ye kwagh ka kom ve yô, ve dugh alakema ve haa shin zegemnger, ve heghem tso ikyav.

39 Sev mbu aven yô, ve kav tar u ve lu her la ga, kpa ve gema ve nenge a ihyongo igen i waarawa lu sha kpe yô, nahan ve lu nôngon kpoghuloo sha u vea̱ fatyô yô, vea za tile a tso her. 40 Nahan ve tôndo ikyor i sha amandeatsoo kera, amande la gba shin zegemnger, shi ve oghom ikyor i sha ikpande i nahan tso la. Mba kenden a ikyondo i sha ityough ki tsoo la vegher u ken ahumbe yô, tso gba yemen vegher u waarawa lu la. 41 Tso la za ar hen ijiir i waarawa kohol kpishi, mngerem za her ga yô, maa a kema shin inya, ityough ki tsoo hange shin inya, tso kera lu yemen ga. Kpa agôndoamnger gema lu tan shin ityôtsoo sha agee, maa ityôtsoo gba hemben. 42 Ushoja mbara maa kaa ér vea wua mba ken purusu mba ve lu yemen a ve la, sha er mô ve nana tsue a tume ken mnger nana ôô uwe nana yevese a yem ga yô. 43 Kpa orshoja u vesen la kange ishima ér una yima Paulu, nahan a yange ve u eren kwagh u ve soo u eren ne. A na wada ér mba ve fetyô u ôôn uwe la ve tsue ve gba shin zegemnger, ve za vande duen sha tar, 44 maa mbagenev cii ve̱ mase duen, mbagen sha ikpande, mbagenev di sha abamber a tsoo. Nahan se cii se due sha tar, kwagh er se ga.