Aerenakaa
7 Kpa pristi u vesen pine ér: “Akaa a i ôr ne ka nahan mimii?” 2 Sefanu gema kaa ér: “Ne anmgbianev man uter kpaa, ver nen ato. Aôndo u iengem yange ande hen Ter wase u tamen Aberaham shighe u lu ken Mesopotamia la, cii ve yem twev ken Haran ye. 3 A kaa a na ér: ‘Mough hen tar wou man hen ityô you va ken tar u me tese u yô.’ 4 Tsô a mough hen tar u Mbakaldi a za tema twev hen Haran. Ter na va kpen yô, a mough her sha iniezwa i Aôndo, a va tema hen tar u ne lu her hegen ne. 5 Kpa Aôndo lu a̱ na un ma dyako ken ú ve ga, shin an-inya u gbanger kuman u una penda nguhar her tsô kpaa ga; kpa a tôndo zwa ér una na un ú, shi zum u una kera lu ga kpaa, una na ônov nav* ú, shin er lu a mar wan ga nahan kpaa. 6 Shi Aôndo kaa a na ér ônov nav vea* za lu ushirmbaiorov ken tar ugen, shi ior mbara vea kôr ve ikpan shi vea er ve ican anyom 400. 7 Aôndo kaa ér, ‘Nahan tar u ua kôr ve ikpan la, me ôr u ijir. Shi akaa ne aa karen kera yô, vea due ken u vea va erem icighantom hen ijiir ne.’
8 “Shi a ya ikyur i icôngo a na, nahan va maren Isaka yô, a tsôngo un sha iyange i sha anigheni. Tsô Isaka mar Yakob,* Yakob di mar uter* mba 12 mbara. 9 Tsô uter mban nyôr u eren Yosev iyuhwe, nahan ve tee un ken Igipiti. Kpa Aôndo lu a na, 10 nahan a yima un ken atsan a na cii, shi a na un kwaghfan, shi a na yô, doo Farou, tor u Igipiti a na. Nahan a ver un lu orhemen sha Igipiti kua ya na cii. 11 Kpa ijen va gba ken Igipiti cii kua ken Kanaan, lu zegecan je, nahan uter asev zua a kwagh môm u vea ya ga. 12 Kpa Yakob ungwa ér kwaghyan* ngu ken Igipiti, nahan a tindi uter asev ker, sha kwa u hiihii. 13 Mba va ze kwa u sha uhar yô, Yosev pase iyol na hen anmgbianev nav, nahan Farou hingir u fan tsombor u Yosev. 14 Tsô Yosev tindi ér i za kaa ter na Yakob kua anmgbianev nav cii ve mough hen ijiir la ve va, ve cii ve lu iorov 75. 15 Nahan Yakob sen shin Igipiti, za lu zan zan kar kpen, kua uter asev mba tsev mbara. 16 Yange i tôô ve i va ii hen Shekem ken uwar u Aberaham yam sha inyar* vea ônov mba Hemor, ken Shekem la.
17 “Er shighe lu kuman u a kure ityendezwa i Aôndo yôô sha ato a Aberaham la yô, iyenge i nongoior la lu vesen seer ken Igipiti, 18 zan zan tor ugen kposo va hemen Igipiti, u̱ fa kwagh u Yosev ga yô. 19 Tor ne er kwagh a ior asev sha ayom, shi kighir uter asev mbara sha ifer ér ve undu anikyundanev vev, sha u ve̱ kpe kera yô. 20 Hen shighe la i mar Mose, man doo ishima sha ishigh ki Aôndo je kpaa. Shi i yese un hen ya u ter na iwer itiar. 21 Kpa yange mba undun* un yô, wan u Farou u kwase za tôô un, yese un hingir wan na. 22 Nahan i tese Mose kwaghfan u Mbaigipiti cii. Jim je yô, lu a tahav sha mkaan kua sha ieren.
23 “Shighe u lu anyom 40 la, kende un ken ishima* u za sôron* anmgbianev nav, ônov mba Iserael. 24 Za nengen mba gbe nzughul a ugen ken a ve yô, a ta ikyaa a na, a or iyev sha ci na, a wua Origipiti la. 25 A hen ér anmgbianev nav vea kav er i lu u Aôndo una yima ve sha ikyev na yô, kpa ve kav ga. 26 Kpernan yô, a za ande sha a ve ve lu nôngon num ayol a ve, maa a gba kôron ve num ken bem, kaan ér: ‘Ne nomsombaiorov mban, ne mba anmgbianev, man er nan ne nôngon num ayol a ene?’ 27 Kpa u lu nzughul a anmgbian na la daa un kera, kaa ér: ‘Ka an nan ver u orhemen kua orjir sha a vese? 28 U soo u wuan mo er nyen u wua Origipiti la nahana?’ 29 Mose ongo nahan yô, a yevese a za lu shiror ken tar u Midian, ape za mar ônov mba nomso uhar la.
30 “Anyom nga karen 40 yô, ortyom ande hen a na ken taaikyôngo ikyua a Uwo u Senai, ken nomborusu u u lu yeghen ken ageva yô. 31 Mose nengen a mi yô, kpiligh un iyol. Kpa ngur kporom una nenge tsembelee yô, a ungwa Yehova* ôr kwagh, kaa ér: 32 ‘Mo m ngu Aôndo u uter ou, Aôndo u Aberaham man u Isaka man u Yakob.’ Tsô ikyarkyase gba gbidyen Mose iyol, a kera cihi a za ikyua her ga. 33 Yehova* kaa a na ér: ‘Tsua akôv* shin angahar a ou kera, gadia ijiir i u til her ne ka icighanjiir. 34 M nenge ican i i lu eren ior av mba ve lu ken Igipiti la, shi m ungwa er ve lu toghor yô, nahan m sen mer me va yima ve. Yô, va m tindi u ken Igipiti.’ 35 Mose shon u yange ve venda un, ve kaa ér: ‘Ka an nan ver u orhemen man orjir?’ ne, ka un je Aôndo yange tindi un hemen ve shi yima ve sha uwegh ku ortyom u ande hen a na ken ageva la ye. 36 Or ne yange hemen ve due a ve, shi er akaa a kpilighyol man uivande ken Igipiti man hen Zegemnger u Nyian kua ken taaikyôngo anyom 40.
37 “Ka Mose shon ne yange ôr kwagh ne a ônov mba Iserael ye, ér: ‘Aôndo una tsua or ken anmgbianev enev, nana lu profeti sha ci wen, er mo nahan.’ 38 Ka un shon ne yange va hingir u lun ken taaikyôngo vea nongoior ne kua ortyom u a ôr kwagh a na man uter asev mba tsev sha Uwo u Senai, shi ngohol icighan loho u nan uma la va na se ye. 39 Uter asev mba tsev mbara yange ve venda u ungwan un, a gba ve kwagh ga, shi asema a ve hide yem ken Igipiti, 40 ve kaa a Aron ér: ‘Er se mbaaôndo mba vea hemen se yô. Gadia Mose shon u a due a vese ken Igipiti ne yô, se fa kwagh u a za er un ga.’ 41 Tsô ve er eev mbu gumbua sha ayange la, shi ve va a iniav mbi nan eev mbu shon, ve er iniongo ve gba ember kwagh u ve er sha ave ve ne. 42 Nahan Aôndo gema ijime a ve, de ér ve civir ikyum i akaa a sha, vough er i nger ken takeda u Uprofeti nahan, ér: ‘Lu mo ne nam uiyua kua iniaav ken taaikyôngo anyom 40 ga, we ya u Iserael, shin lu mo? 43 Kpa lu tenti u Moloko kua ishan i aôndo u Rifan ne tôô ye, ieev mbi yange ne er ne lu civir la. Nahan yô, me de a kura ne a yem a ven ica je, a kar Babilon.’
44 “Uter asev mba tsev lu a tenti u shiada ken taaikyôngo, vough er zum u Aôndo lu lamen a Mose ve, na zwa ér a er un a lu er i tese un nahan la. 45 Nahan uter asev mba tsev ya dyako na, ve kua Yosua ve tôô un ve nyôr a mi ken tar u akuraior agen lu ker, a Aôndo zenda a sha ishigh ki uter asev la; tenti shon mase lun heen zan zan ar sha ayange a Davidi la. 46 Yange doo Aôndo a na, nahan a pine ian ér ma un maa iyou sha ci u Aôndo u Yakob. 47 Kpa gema lu Solomon va maa un iyou ye. 48 Nahan cii kpa, U Hemban Cii la tem ken ayou a i maa sha ave ga, vough er uprofeti ve kaa nahan, ér: 49 ‘Sha ka ikyônough ki torough yagh, tar gema ka kpenga* wam u panden angahar sha mi. Yehova* kaa ér, ka nyi iyou je ne maama? Man ijiir yam i memen ka hana? 50 Ka uwegh agh ku er akaa ne cii gaa?’
51 “Ne ior i taver ityough, tsôngon ishima ga shi kondon ato ne, ka ne shi hendan a icighan jijingi. Er uter enev mba tsev eren nahan, kape ne kpa ne eren je la. 52 Ka profeti u han je ve uter enev mba tsev tôv nan a ican ga? Yange ve wua mba ve tsenga yôôn mve u un u a lu orperapera, u hegen ne hingir mbateen un man mbawuan un la; 53 ne mba yange ne ngohol Atindi a i na sha ikyev i mbatyomov, kpa ne vende u kuran a ne.”
54 Mba ongo akaa ne yô, asema usa ve ker, ve gba kenger un wuan anyi.* 55 Kpa er iv a icighan jijingi yô, a kenger sha, a nenge a iengem i Aôndo man i Yesu, shi Yesu tile ken uwegh ku yanegh ku Aôndo, 56 maa a kaa ér: “Nenge! M nenge i bugh usha, man Wan u or tile ken uwegh ku yanegh ku Aôndo.” 57 Mba ongo nahan yô, ve ngor taver taver shi ve cir ave sha ato, maa ve cii ve usa ve va sha a na. 58 Mba duen a na ken gar mba kenden ken won yô, ve gba tan un awen. Mba ve lu eren shiada u aiegh sha a na la, ver akondo a ve a haan iyol hen ikyum i gumor ugen, i yilan un ér Saulu. 59 Er ve lu tan Sefanu awen la, a zamber ér: “Ter Yesu, ngohol jijingi* wam.” 60 Tsô a gure inya, a ôr taver taver ér: “Yehova,* de ne ve ibo sha isholibo ne ga.” Ôron kwagh ne yô, a sule.