Marku

5 Tsô ve per zegemnger ve gba yande la hen haregh u Mbagerasene. 2 Yesu dugh shin tso yô, fese je maa orgen u lu a jijingi u bo* yô, za due hen iwar i mbakpenev va kohol un. 3 Or ne tsaan hen iwar i mbakpenev, man zan zan hen shighe la kpa, kwagh môm u a̱ kange un a mi ve orti a sagh ga je kpa lu ga, a̱ lu ishiligh je kpaa. 4 Yange i shi haan un ahye shi kangen un sha mshirim, kpa a̱ er nahan je a tôndo mshirim mara kua ahye la cii; or môm lu a agee a hemban un ga. 5 Shi yange a zer ngoron tugh kua atetan hen iwar la kua sha iwo, shi a kômbon iyol na sha awen. 6 Kpa nengen a Yesu ken ica je maa, a yevese a va gure un inya. 7 A ôr genger genger ér: “Yesu, Wan u Aôndo U Hemban Cii, ka nyi i zuam a wee? Bum Aôndo wer u erem ican ga.” 8 A ôr nahan sha ci u Yesu lu kaan a na ér: “Due ken or ne kera, we jijingi u bo ne.” 9 Kpa Yesu pine un ér: “Iti you ér ana?” A kaa a na ér: “Iti yam ér Ikpela, sha ci u se mba kpishi.” 10 Nahan a zer zamber a Yesu ér a de zendan ve ken tar la kera ga.

11 Ikpela-igyo gema lu yan kwagh hen ijiir la sha uwo. 12 Nahan ujijingi mbara zamber a na ér: “Na se ian i nyôron ken igyo la, nahan se̱ za nyôr ken i.” 13 Tsô a na ve ian. Nahan ujijingi mba bov mbara due za nyôr ken ikpela-igyo la, maa igyo shon cii hembe ayem za osough sha kurugh ku ijem haa shin zegemnger; igyo i kuman er 2000 nahan, saa shin zegemnger la. 14 Kpa mbakuranigyo mbara yevese za ôr ken gar kua hen ningir la cii, nahan ior va u va nengen kwagh u er la. 15 Mba ve hen Yesu yô, ve nenge or u azôv nzughul a na, u yange lu a ikpela i ujijingi mba bov la, tema a akondo iyol, lu eren kwagh sha inja, nahan cier ve iyol. 16 Shi mba ve nenge kwagh ne sha ashe a ve la ôr ve er i hii man kwagh a er or shon u azôv nzughul a na ne kua igyo la nahan yô. 17 Tsô ve gba zamber a Yesu ér a due hen haregh ve kera.

18 Za ngur nyôron tso yô, or u azôv yange nzughul a na la gba zamber ér ma un yem vea na. 19 Kpa a lumun ga, a kaa a na ér: “Yem ken ya wou za ôr ior ou akaa a Yehova* a er a we la cii, kua mhôônom ma a zungu u la kpaa.” 20 Or ne maa yem ken Dekapoli* gba za pasen akaa a Yesu er a na la cii, nahan kpiligh ior cii iyol.

21 Yesu nyer tso hidi peren yande la yô, ikpelaior va kohol her a na kpishi, lu hen kpe zegemnger. 22 Orgen ken mba hemen shinagoge, i yilan un ér Yairu, za va, va nengen a na yô, a gba hen angahar a na. 23 A zamber a na acin imôngo, a kaa ér: “Wan wam u kwase u kiriki gba angev je ngu nôngon ku. Wea lumun yô, va bende un ave iyol sha er angev mbua bee un, una lu uma yô.” 24 Tsô Yesu kar gba zan vea na, maa ikpelaior dondo un ijime shi ve lu imbishi un.

25 Kwase ugen gema lu, u tsa a angev mbu duen awambe anyom 12 yô. 26 Yange ya ican tsung sha ikyev i mbatwerev kpishi shi vihi inyaregh nagh cii, kpa zua a guda ga, hemba gban a gba kera. 27 Ongo ibaver sha kwagh u Yesu yô, a za va un ken ijime ken ikpelaior la a va bende a ikyondo na i haa iyol la, 28 sha ci u lu kaan ken ishima na ér: “Aluer m bende a akondo a a hee iyol la tseegh kpa, angev av mbua bee.” 29 Her ave ave je awambe a na la tôndo, maa a kav ken iyol na er angev nav mbu vihin tsung mbura mbu bee yô.

30 Fese je maa Yesu kav er tahav mbu dugh ken iyol na yô, maa a gema a kenger ikpelaior i i kase un la, a pine ér: “Ka an nan bende a akondo a m hee iyol nee?” 31 Kpa mbahenen nav kaa a na ér: “U nenge ikpelaior ngi imbishi we, kpa u ngu pinen wer, ‘Ka an nan bende a moo?’” 32 Kpa lu yengen una nenge or u nan er kwagh la yô. 33 Kwase la fa kwagh u er un yô, nahan cier un iyol je lu kunden ikyarkyase. Tsô a va gba inya sha ishigh nagh, a ôr un hanma kwagh sha mimi. 34 Yesu kaa a na ér: “Wan wam, ka sha jighjigh u nan wou la angev ou mbu bee ye. Yem bem bem, er angev ou mbu vihin tsung mbura mbu bee hegen yô.”

35 Er lu ôron kwagh zan a mi ave la je, ior mbagenev ken ya u orhemen u shinagoge la va kaa ér: “Wan wou u kwase la kpe! Shi ityôkyaa ngi i zan Ortesen iyolo?” 36 Kpa Yesu ongo kwagh u ve ôr la yô, a kaa a orhemen u shinagoge la ér: “I de ze u iyol ga,* tese wer u na jighjigh tsô.” 37 Maa a lumun ér orgen môm nana dondo un ijime ga, saa Peteru man Yakobu vea anmgbian na Yohane tseegh.

38 Mba ve hen ya u orhemen u shinagoge la yô, a nenge ior lu vaan genger genger shi ngoron, nahan ayôôso lu kpishi. 39 Nyer ker yô, a kaa a ve ér: “Er nan ne lu vaan shi eren ayôôso kpishi nahana? Wan la kpe ga, kpa ka mnyam a lu yaven ye.” 40 Maa ve gba sen un inja er a bume nahan. Kpa kaan ve cii mba dugh ken won yô, a kar vea ter u wan la kua ngô na man mba ve lu a na imôngo la, a nyôr ape wan la lu la. 41 A za a kôr wan la sha uwe, maa a kaa a na ér: “Talita kumi,” inja na yô ér: “Wankwase, m ngu kaan a we mer, mough sha!” 42 Her ave ave la je wankwase la mough sha gba zenden. (Yange lu anyom 12.) Nahan saan ve iyol her je, ve gba ember tsung. 43 Kpa a ta ve icin var var* ér ve de ôron or môm kwagh sha mi ga, maa a kaa ér i na un kwagh a ya.