Marku

2 Kpa ayange nga karen yô, a hide a va nyôr ken Kapenaum, nahan agwa samber wuee ér ngu hen ya. 2 Tsô ior va kohol her kpishi je yô, ian kera lu ga, sha hunda je kpa ian lu i nyôron ga. Tsô a gba pasen ve loho u dedoo. 3 Nahan i va un a orkpenalegh; iorov unyiin tôô un. 4 Kpa ve fatyô u van a na hen ape Yesu lu la jighilii ga sha ci u ikpelaior imbishi, nahan ve bugh haav hen ijiir i Yesu lu la jigh jigh, maa ve pev ian, ve sen a orkpenalegh la sha gambe u ve tôô un sha mi la. 5 Yesu nengen er ve ne jighjigh yô, a kaa a orkpenalegh la ér: “Wan wam, i de u asorabo a ou.” 6 Mbangerenatindi mbagenev lu her, ve tema ve lu kaan ken asema a ve ér: 7 “Er nan or ne a ôron kwagh nahana? Ngu lahan Aôndo. Ka an je nana fatyô u den ior asorabo, ka Aôndo tseegh gaa?” 8 Kpa fese je Yesu fa kwagh u ve lu henen la, maa a kaa a ve ér: “Er nan man ne lu henen akaa ne nahan ken asema a ene? 9 Ka nyi i hembe lun zange u ôrono? Ka u kaan a orkpenalegh la ér, ‘I de u asorabo a ou,’ shin ka u kaan ér, ‘Mough sha tôô gambe wou zende’? 10 Kpa ka sha u fa nen ner Wan u or ngu a tahav shin tar mbu den ior asorabo . . .” maa a kaa a orkpenalegh la ér: 11 “M ngu kaan a we mer, Mough sha, tôô gambe wou, yem ken ya wou.” 12 Tsô a mough fese a tôô gambe na, a zende a due sha ashe a ve cii. Nahan kpiligh hanma ve cii iyol, ve gba wuese Aôndo, kaan ér: “Se mba a vande nengen a imba kwagh ne ga!”

13 Shi sha shighe ugen la Yesu due za shin kpe zegemnger, nahan ikpelaior la cii lu van hen a na, maa a gba tesen ve. 14 Va ngur karen yô, a nenge a Levi, wan u Alefeu, tema hen iyou i ngohol kpandegh, maa a kaa a na ér: “Dondom.” Tsô a mough a dondo un. 15 Yesu va ngur yan kwaghyan ken iyou i Levi vea mbahenen nav yô, mbangoholkpandegh man mbaasorabo kpishi gba va yan kwagh vea ve, sha ci u ve kpishi ve lu dondon un ijime. 16 Kpa mbangerenatindi man Mbafarishi mba nengen er a lu yan kwagh vea mbaasorabo man mbangoholkpandegh yô, ve gba pinen mbahenen nav ér: “Ye kwagh vea mbangoholkpandegh man mbaasoraboo?” 17 Yesu ongo nahan yô, a kaa a ve ér: “Ka mba ve lu gbong gbong la kwagh a gbe ve a ortwer ga, kpa ka mba ve lu uange la kwagh a gbe ve a ortwer ye. M va ka sha u yilan mbaperapera ga, kpa ka mbaasorabo.”

18 Mbahenen mba Yohane kua Mbafarishi yange ve hôron kwaghyan, nahan ve va pine un ér: “Er nan ve mbahenen mba Yohane kua mbahenen mba Mbafarishi ve hôron kwaghyan, kpa mbahenen ou yô ve hôron kwaghyan ga?” 19 Yesu kaa a ve ér: “Azende a orkwasehe nga a ityôkyaa i hôron kwaghyan shighe u orkwasehe a lu vea ve imôngo la ga, shin ka nahan ga? Er orkwasehe a lu vea ve je, vea fatyô u hôron kwaghyan ga. 20 Kpa shighe ngu van u a va tôô orkwasehe hen a ve kera yô. Ka sha iyange la vea hôr kwaghyan ye. 21 Mba tee bamberkyondo u he mba we paci a mi sha ikyondo i haan iyol i tse ga. Aluer i er nahan yô, ikyondo i he la ia nyula ia urugh ikyondo i tse la, nahan ia ande a hemba ave a tse. 22 Shi mba hee wain u he ken akpaakôvough a tse ga. Aluer i er nahan yô, wain la una pav akpaakôvough la, nahan wain shon una saa ishe, kua akpaakôvough la cii. Kpa ka i haa wain u he ken akpaakôvough a he.”

23 Kwagen la, lu karen ken ishule i samuyia sha Iyange i Memen. Tsô mbahenen nav gba tôndon asagher a iyiav yemen. 24 Maa Mbafarishi kaa a na ér: “Nenge! Er nan ve eren kwagh u tindi a yange ér i de eren sha Iyange i Memen ga nee?” 25 Kpa a kaa a ve ér: “Ne ôr kwagh u Davidi yange er shighe u kwaghyan bee un ve ijen kôr un kua nomsombaiorov mba ve lu a na imôngo la gaa? 26 Ne umbur er sha ayange a Abiatar, pristi u tamen la, a nyôr ken iyou i Aôndo a za ya ikpenberedi i i ver sha ishigh ki Aôndo,* í tindi tese ér orgen môm nana de ye ga, saa upristi tseegh, kpa un ya shi na nomsombaiorov mbagenev mba ve lu vea na la gaa?” 27 Maa a kaa a ve ér: “I ver Iyange i Memen ka sha ci u or, i er or sha ci u Iyange i Memen ga. 28 Nahan Wan u or ka Ter u Iyange i Memen je kpaa.”