Luka

15 Tsô mbangoholkpandegh man mbaasorabo cii gba va kohol hen a na, ungwan kwaghôron na. 2 Nahan Mbafarishi man mbangerenatindi zer lamen sha a na ivarvase kaan ér: “Or ne ka a ngohol mbaasorabo shi a yaan kwagh vea ve.” 3 Nahan a ôr ve injakwagh ne, a kaa ér: 4 “Ka an or ken a ven nana lu a iyôngo 100, man i môm ker ia saa ve, nana de undun i 99 la ken taaikyôngo, hiden za keren i môm i̱ i̱ saa la zan zan zuan a ii? 5 Man aluer nan zua a i̱ yô, nana tôô i̱ sha akende, shi a saan nan iyol. 6 Nana za nyôron ken ya yô, nana yila azende a nan kua mba wan ndor a nan, nana kaa a ve ér, ‘Va ember nen a mo imôngo, gadia m zua a iyôngo yam i̱ i̱ saa la.’ 7 Me kaa ne, kape orisholibo môm kpa aluer nan gema ishima yô, a ember sha, sha kwagh u nan a hemba mbaperapera 99 mba ityôkyaa i lu i vea gema ishima ga la je la.

8 “Shin ka hanma kwase nana lu a agbenger a uderakema* pue, man derakema* môm ker una saa ve, nana de tsaren imenger shi esen iyou i nan keren un sha gbashima zan zan zuan a mini? 9 Nana zuan a mi yô, nana yila azende a nan kua mba wan ndor a nan vea va zua, nana kaa ér, ‘Ember nen a mo imôngo, gadia m zua a gbenger derakema* u a saam la.’ 10 Me kaa ne, kape ka i saan mbatyomov mba Aôndo iyol sha kwagh u orsholibo môm u nan gem ishima je la.”

11 Shi a kaa ér: “Orgen lu a ônov mba nomso uhar. 12 U kiriki la kaa a ter na ér, ‘Baba, nam dyako wam ken akaa a u lu a mi la.’ Nahan a pav akaa a na, a kar ve. 13 Ayange nga kar kpuaa yô, u kiriki la kohol akaa a na cii mough yem zende ken tar u icaa, za nyôr dang u eren, vihi akaa a na cii. 14 Kera lun a kwagh ga yô, zegejen gba ken tar la cii, maa a nyôr ken ican. 15 Je yô, a mough a za kohol orgen u lu marnya u tar la yô, nahan or la tindi un ken sule na ér a za nengen un sha igyo. 16 Lu saren un u yan kwagh u igyo la lu yan la, kpa or môm na un ga.

17 “Va kaven ibumegh nagh yô, a kaa ér, ‘Ior mba ve eren terem tom sha inyar cii mba a kwaghyan* kpishi, man mo m gema m ngu nôngon u kpen ijen heen! 18 Me mough me yem hen terem, me za kaa a na mer: “Baba, m er Aôndo u sha la kwaghbo, kua we kpaa. 19 M kera kuma u a yilam ér wan wou ga. Gemam m hingir or u eren we tom sha inyar.”’ 20 Maa a mough a gba yemen hen ter na. Kpa er lu van ken ica la je, ter na ta ashe za nenge a na, tsô kunya kôr un, nahan a yevese a za kuve un, a gba susen un zwa. 21 Tsô wan la kaa a na ér, ‘Baba, m er Aôndo u sha la kwaghbo, kua we kpaa. M kera kuma u a yilam ér wan wou ga.’ 22 Kpa ter la gema kaa a ikpan na ér, ‘Za va nen a ikyondo i hemban doon la fese, va haa un nen, shi wa un nen kunya ken uwe, shi wa un nen akôv* shin angahar. 23 Shi za sagh nen bua u a hembe kehen la, sôngo, se ya nen kwagh se ember nen. 24 Gadia wan wam ne yange kpe, kpa a nder; yange saa, kpa i zua a na.’ Tsô ve gba yan kwagh ember.

25 “Hen shighe ne, wan na u vesen la lu ken ityev. Tsô a mough u kurun, va zurum a ya yô, a ungwa i lu kuhwan ityogholough shi vinen amar. 26 Nahan a yila môm ken mba shiren ter na, a pine un kwagh u a lu zan hemen yô. 27 Ngula kaa a na ér, ‘Anmgbian wou hide, nahan teru sôngo zege gumbua, sha ci u a hide gbang gbang.’* 28 Kpa ishima vihi un a venda u nyôron ken ya. Tsô ter na due gba va zamber a na. 29 Kpa a kaa a ter na ér, ‘Nenge! M er u tom anyom kpishi hegen, shi ma shighe môm kpa m hemba u ato ga, man kwa môm tsô kpa u nam anivo wer m ya vea azende am ga. 30 Kpa wan wou u a za vihi akaa a ou sha mbaagbaga ne za hidi va nyer a nyôr nahan maa, u wua un zege gumbua.’ 31 Tsô a kaa a na ér, ‘Wan wam, u lun vea mo hanma shighe cii, shi akaa am cii ka a ou. 32 Kpa gba u se ya kwagh se ember, sha ci u anmgbian wou ne yange kpe, kpa a nder; yange saa, kpa i zua a na.’”