1 Mbakorinte

3 Nahan, anmgbianev, yange m fatyô u lamen a ven er ka ior mba jijingi u Aôndo a hemen ve nahan ga, kpa m lam a ven sha inja i ne mba a mhen u iyolough, shi ne mba anikyundanev sha kwagh u Kristu. 2 M koso ne sha atumba, lu sha kwaghyan u taver ga, sha ci u ne lu a taver ga. Jighilii yô, hegen je kpa ne mba a taver i kuma ga, 3 gadia ne mba a mhen u iyolough her. Er iyuhwe man ayôôso a lu hen atô wen yô, tese ér ka mhen u iyolough ne lu a mi ye gaa? Shi tese ér ne mba eren kwagh er ka ior mba ken tar nahan gaa? 4 Gadia aluer or ngu kaan ér, “Mo m ngu or u Paulu,” orgen di ér, “Mo m ngu or u Apolo” yô, tese ér ne mba eren kwagh er ior mba ken tar nahan ga zee?

5 Nahan, ka an nan lu Apolo? Man ka nyi Paulu a lu? Se mba mbaeren tom u Ter a ne se di tsô; se mba mbawasen tom mba se ne ne hingir u nan jighjigh di tsô. 6 Yange m lôô, Apolo gema ur, kpa ka Aôndo a lu nan mvese ye, 7 sha er or u lôôn la shin or u urun la nana ya icivir ga, kpa a lu Aôndo u ka a na mvese la tseegh yô. 8 Nahan or u lôôn man or u urun cii mba eren ka tom môm,* kpa hanma or nana ngohol injar sha tom u nan er la. 9 Gadia se mba mbaeren tom a Aôndo imôngo. Ne di ne mba sule u Aôndo, u a lu kahan yô, ne mba imaagh ki Aôndo.

10 Aôndo tesem erdoo na u sha mhôôn la, ka nahan ve m we imaagh er or u fan kwaghmaan* nahan ye; kpa orgen gema ngu maan sha imaagh kira. Kpa hanma or nana̱ ver ishima nana̱ nenge er nan lu maan sha imaagh ki shon la. 11 Gadia or môm nana fatyô u wan imaagh kigen kposo a ki i vande wan la ga, ka Yesu Kristu je la. 12 Nahan aluer or ngu maan zanaria shin azurfa shin awen a injaa, shin ikyon shin toho shin ayia sha imaagh ki shon yô, 13 a va tese er tom u hanma or u lu la ken igbar, sha ci u iyange la ia tese ú, gadia ka sha usu a pase ú ye; usu la ua tese imba kwaghmaan u hanma or nan maa la. 14 Aluer kwagh u or nan maa sha ki la ngu her yô, nana ngohol injar; 15 aluer tom u or nan er la hia kera yô, kwagh a saa nan, kpa nan iyol i nan yô, a yima nan; nahan kpa, a lu inja er nan war usu sha ikyughur nahan.

16 Ne kera fa er ne ayol a en ne lu tempel u Aôndo, man er jijingi u Aôndo a tem ken a ven gaa? 17 Aluer or yôhôr tempel u Aôndo yô, Aôndo una tim nan; gadia tempel u Aôndo ka icighankwagh, man ka ne ne lu tempel shon ye.

18 Or môm nana̱ de tsughun iyol i nan ga: Aluer ma or ken a ven nan hen ér nan fa kwagh ken tar* ne yô, nana̱ hingir ibumeor, sha er nana fa kwagh yô. 19 Gadia kwaghfan u tar ne ka ibumekwagh hen Aôndo, sha ci u i nger ér: “Ka a kôr mbafankwagh sha ayom a ve.” 20 Shi i nger ér: “Yehova* fa er mbamhen mba mbafankwagh ve lu mba gbiliniv yô.” 21 Sha nahan yô, or a de te ihyagh ken ior* ga; gadia akaa cii ka a en, 22 a̱ lu Paulu shin Apolo shin Sifa,* shin a̱ lu tar shin uma shin ku shin akaa a a lu hegen, shin akaa a a lu van ken hemen la kpaa, akaa cii ka a en; 23 ne di ne mba kwagh u Kristu; Kristu di gema ka u Aôndo.