2 Mbakorinte

6 Er se lu eren tom vea na imôngo nahan, ne kpa se mba kaan a ven ser de ngohol nen erdoo u Aôndo a tese ne sha mhôôn la a u eren sha awashima u erdoo la shio ga. 2 Gadia a kaa ér: “Yange m ungwa ne hen shighe u tesen erdoo, shi m wase ne sha iyange i myom.” Nenge! Ka hegen i hembe lun shighe u tesen erdoo cii ye. Nenge! Ka iyange i myom je ne.

3 Se mba eren kwagh u nan gbeev mbu nôngon sha ma gbenda môm ga, sha er a zua a ma kwagh u shin sha tom wase ga yô; 4 kpa se mba tesen sha hanma gbenda cii ser se mba mbatomov mba Aôndo, sha u taver ishima ken akaa kpishi, man sha atsan a yan, man sha ashighe a lun ken ibanave, man sha mbamtaver, 5 man sha u yan gbidiv, man sha u nyôron purusu acin imôngo, man sha ashighe a ikpelaior i̱ mough ayôôso a vese, man sha tom u eren kpoghuloo, man sha u tsan per acin imôngo, man sha u lun ijen acin imôngo; 6 sha mlu u wang, man sha mfe, man sha ishimawan, man sha erdoo, man sha icighan jijingi, man sha dooshima u sha atseregh ga, 7 man sha kwaghôron u mimi, man sha tahav mbu Aôndo, a ikyav mbi utyaav mbi perapera ken uwegh ku yanegh* man ku imesegh;* 8 ken icivir man ken ihyeen, ken ibaver i bo man ibaver i dedoo. I nenge se ér se mba mba tsughun ior, nahan kpa se mba mbaôron kwagh sha mimi, 9 se mba er i fa se ga nahan, kpa i fa se; ka inja er se mba sôôn kpen nahan,* kpa nenge! se mba uma; se mba er i tsaha se nahan, kpa i na se ken ku ga; 10 ka inja er se mba zungwen nahan, kpa se mba ember hanma shighe cii; se mba er ka atsanaior nahan, kpa se mba nan ior kpishi mba hingir yôughyôugh; ka inja er se mba a kwagh ga nahan, kpa se mba a akaa cii.

11 Se bugh zwa wase sha u lamen a ven,* ne ior i Korinte, shi se bugh ishima yase gbangelaa. 12 Se mba tesen ne ser ne doo se ishima a ikighir* shio, kpa ne yô, dooshima u ne tesen se la ngu a ikighir. 13 Nahan yô, m ngu ôron kwagh a ven er ka ônov av nahan mer, ne kpa bugh nen asema a en gbangelaa.

14 I̱ de zuan ne* ken mzough u kpeegh vea mbanan jighjigh ga imôngo ga. Gadia ka nyi i zough perapera vea tindi u perene? Shin iwanger zua vea ime sha nyi? 15 Heela tseegh ga, Kristu zua vea Belia* sha nyi? Shin or u nan jighjigh* nan zua vea ornan jighjigh ga sha nyi? 16 Man ka nyi i zough tempel u Aôndo a akombo? Gadia se mba tempel u Aôndo u uma; ka vough er Aôndo a kaa nahan, ér: “Me tema hen atô ve, shi me zenden hen atô ve; me lu Aôndo ve, ve di vea lu ior av.” 17 “‘Sha nahan yô, due nen hen atô ve kera, pav nen a ve,’ kape Yehova* a kaa la, ‘shi de nen u benden a kwagh u hôngorough’”; “‘nahan me ngohol ne.’” 18 “‘Shi me hingir Ter wen, ne di ne hingir ônov av mba nomso man mba kasev,’ kape Yehova,* un u a lu U Hemban Agee Cii la, a kaa la.”