Mpase
15 Tsô m nenge a ikyav igen sha, lu i̱ vesen shi i̱ kpilighyol; mbatyomov utaankaruhar lu a atsan ataankarahar. Atsan ne ka a masetyô, sha ci u aa been yô, iyugh i Aôndo kpa ia kure.
2 Tsô m nenge a kwagh lu er ka zege gelase u lun a mngerem shimi kua usu nahan; mba ve hemba inyamkyume la man eev mbu i̱ la, kua mba ve lumun ér i ver ve ikyav sha namba u iti i i̱ ga la cii, tile hen kpe u zege gelase u lun a mngerem shimi la, ve kôr mbaadigyuve mba Aôndo. 3 Ve lu wan icam i Mose, kpan u Aôndo, kua icam i Waniyôngo kaan ér:
“Ityom you vese shi i kpilighyol, we Yehova* Aôndo U Hemban Agee Cii. Ityom you ka i perapera man i mimi, we Tor u tsôron. 4 Ka an je nana cia u ga, Yehova,* man ka an je nana wuese iti you ga? Gadia ka we tswen u eren kwagh a ior ou sha mimi ye. Gadia akuraior cii aa va civir we sha ishigh you, sha ci u i pase atindi* a ou a perapera la ken igbar.”
5 Kwagh ne eren kera yô, m nenge i lu bughun icighanjiir u ken tenti u eren shiada, u sha la, 6 nahan mbatyomov utaankaruhar mba ve lu a atsan a ataankarahar la due ken icighanjiir la, ve hua akondo a wang man a mondon, shi hanma ve kange tsar u zanaria sha vanger. 7 Môm ken akaauma a anyiin la na mbatyomov mba utaankaruhar mbara agbande a sha zanaria, a iv a iyugh i Aôndo, un u a lu lun uma zan zan gbem sha won la. 8 Tsô icighanjiir la iv a mnyim sha ci u iengem i Aôndo man sha ci u tahav nav, nahan or môm fatyô u nyôron ken icighanjiir la ga zan zan atsan a ataankarahar a mbatyomov mba utaankaruhar la kar been.