Titu
1 Mo Paulu, kpan u Aôndo man apostoli u Yesu Kristu, m na jighjigh a ityesen i mba Aôndo a tsough ve la kpa ve ne jighjigh a mi la, shi m ngu a mfe u vough u ityesen i mimi i sha kwagh u civir Aôndo, 2 man kwagh ne cii har sha ishimaverenkeghen i uma u tsôron, u ngise je Aôndo u a eren aie ga la tôndo zwa u nan la. 3 Kpa shighe u ver la va kom yô, a na sha u ior ve ungwa loho na ne sha tom u pasen kwagh, u i wem sha ikyev sha iniezwa i Aôndo, Oryiman wase la; 4 m ngu ngeren hen Titu, wan wam u mimi u nan jighjigh a mo imôngo:
Aôndo Ter man Kristu Yesu, Oryiman wase, ve̱ tese u erdoo u sha mhôôn shi ve̱ na u bem.
5 Yange m undu u ken Kerete sha er u sôr akaa a yange nzughul* la shi u zende sha agar agar u ver mbatamen yô, er yange m kaa u nahan, mer: 6 i̱ de lu or u nan lu a iti i bo ga, aluer ka or u nan er ivaa yô, nana̱ lu a kwase môm, ônov mba nan ve lu mbananjighjigh mba i nengen ve ér ve wa dang ga shin ve taver ityough ga yô. 7 Gadia er orkuran nan lu or u nengen sha ya u Aôndo yô, gba keng u nana lu a iti i bo ga; nana̱ de lu or u sendegh sha kwagh ga, nana̱ de lu or u nyoon ishima fefa ga, nana̱ de lu or u hunden msôrom ga, nana̱ de lu ipilaor* ga, nana̱ de lu or u eren hua sha u keren mtsera sha anyighe ga, 8 kpa nana̱ lu or u ngohol ior sar sar, or u soon ieren i dedoo, or u eren kwagh sha kwaghfan,* orperapera, or u eren kwagh a ior mba nan sha mimi, or u kôron iyol tsaha, 9 i̱ lu or u nan tesen ior sha gbenda u u tese ér nan var a mkaanem ma* mimi yô, sha er nana fatyô u taver mbagenev ishima* sha ityesen i wang* shi kôôm mba ve ôr kwagh u kahan kposo yô.
10 Gadia mbahembanato ngee, kua mba ôron akaa a wasen ga, man mbatsughunior, hemban je yô mba ve hanger sha kwagh u icôngo la. 11 Gba keng u a cir ambaaior la zwa, sha ci u ka ve je ve lu vihin uya mba iorov cii sha u tesen akaa a ma ve tese ga, sha ci u keren mtsera sha anyighe ye. 12 Or ve ugen u a lu profeti yô, kaa ér: “Mbakerete ka ior mba wan aie, ka inyamkyume i vihin tu, ka ior mba teman a tema* mba ve soo kwaghyan kpishi yô.”
13 Shiada ne ka u mimi. Sha ityôkyaa ne yô, za hemen u kôôm ve taveraa, sha er jighjigh u nan ve una taver yô. 14 De keghen ato sha ukwaghhir mba Mbayuda shin atindi a ior mba ve undu mimi la ga. 15 Mba ve lu wang yô, mba nengen akaa cii ér nga wang, kpa mba ve hôngor shi ve lu a jighjigh u nan ga yô, kwagh môm lun ve wang ga, gadia mbamhen vev hôngor, shi imoshima ve kpa ngi wang ga. 16 Ka ve ôron ken igbar ér ve fa Aôndo, kpa ve eren akaa a tesen ér ve fa un ga, sha ci u ve ndôhôr ishima shi mba ongo kwagh ga shi i lumun ve u eren ma tom u dedoo môm ga.