Mateu

15 Tsô Mbafarishi man mbangerenatindi mbagenev mough ken Yerusalem va hen Yesu, va pine un ér: 2 “Er nan ve mbahenen ou ve lu dondon aeren a ior mba ngise la ga? U tesen ikyav yô, mba ôôn ave* cii man ve ye kwagh ga.”

3 A gema a kaa a ve ér: “Ne di er nan ka ne per tindi u Aôndo sha ci u aeren a en a ityôô? 4 U tesen ikyav yô, Aôndo kaa ér, ‘Naan teru man ngôu icivir,’ shi ‘Or u nan lam a ter u nan shin ngô u nan dang* yô, i wua nan.’ 5 Kpa ka ne kaa ner, ‘Aluer or kaa a ter u nan shin ngô u nan ér: “Kwagh u m lu a mi u ma m wase u a mi la cii, m ver sha u nan Aôndo iyua a mi” yô, 6 ityôkyaa kera ngi i nana wase ter u nan shin ngô u nan ga.’ Sha nahan yô, ne gema kwaghôron u Aôndo hingir gbilinkwagh sha ci u aeren a en a ityôô. 7 Ne mbawanatseregh, kwagh u Yesaia yange tsenga ôron sha a ven la zua sha ieren yen vough, ér: 8 ‘Ior mban mba nem icivir ka sha zwa, kpa ishima ve yô ngi ica a mo. 9 Ka gbilin tsô ve civir mo ye, gadia ka atindi a ior ve tesen ye.’” 10 Tsô a yila ikpelaior va ikyua a na, maa a kaa a ve ér: “Ungwa nen shi kav nen inja i kwagh ne: 11 Ka kwagh u or nan we ken zwa u nan la ka a hôngor nan ga, kpa ka kwagh u a dugh ken zwa u nan la ka a hôngor nan ye.”

12 Tsô mbahenen nav va kaa a na ér: “U fa er kwagh u u ôr la a ne Mbafarishi ishimavihin* kpa?” 13 A gema a kaa a ve ér: “Hanma imendenegh ki Terem u sha a lee ga cii a wuhe ki kera. 14 Kwagh a de gbe ne a ve ga. Ka mbaapirashe mba hemen ior gbenda. Man aluer orapirashe hemen orapirashe ugen gbenda yô, ve cii vea za gba shin ihyungwa.” 15 Peteru gema kaa ér: “Pase se injakwagh la wang se fa.” 16 Nahan a kaa ér: “Ne kpa ne mba a kav gaa? 17 Ne fa er hanma kwagh u or nan ye cii yô, ka a kar a yem shin uya, nan za dugh un nan haa shin ihyungwa gaa? 18 Kpa kwagh u a dugh ken zwa u or yô, ka ken ishima je ka a due ye, man ka akaa ne je ka a hôngor or ye. 19 U tesen ikyav yô, ka ken ishima or ka nan due a mbamhen mba eren aferakaa er, u wuan or shin eren idya shin ijimba,* shin iin shin eren shiada u aiegh shin lahan Aôndo nahan ye. 20 Ka akaa a a hôngor or je la. Ka u ôôn ave* ga yan kwagh la a hôngor or ga.”

21 Yesu moughon heela yô, a yem hen haregh u Tiru man Shidon. 22 Tsô kwase Finishia* ugen hen ijiir la gba va vaan kaan ér: “Zungwem mhôônom Tere, Wan u Davidi. Azôv nga nzughul a wan wam u kwase je doo ga.” 23 Kpa Yesu bugh zwa a na ga. Nahan mbahenen nav gba va kaan a na ér: “Ôr un a̱ yem, á zer vaan van se ijime gbem yum.” 24 A gema a kaa ér: “I tindim hen ma orgen kposo ga, kpa ka hen iyôngo i ya u Iserael i i saa la tseegh.” 25 Kpa kwase la va gure un inya kaa a na ér: “Tere, wasem!” 26 A gema a kaa a na ér: “Doo u tôôn kwaghyan u mbayev kenden ônov mba iwaav ga.” 27 Kwase la gema kaa ér: “Tere, u ôr ka mimi, kpa nenge ase, ônov mba iwaav ka ve yaan avur a kwaghyan a a lu osough sha tebul u ior vev haan shin inya la.” 28 Yesu gema kaa a na ér: “Kwase, u ngu a jighjigh u nan kpishi. Nahan yô, i er a we er i sar u la.” Nahan hen shighe* la je, angev bee wan na u kwase la.

29 Yesu moughon heela yô, a za ikyua a zegemnger u Galilia, a kar a za unde sha uwo a tema sha mi. 30 Tsô ikpelaior i vesen due gba van hen a na, ve lu van a mbaawanev man mbasombon man mbaapirashe man mbakondonikyer kua mbauangev mbagenev kpishi. Ve va ver ve hen ishigh nagh, nahan a bee ve cii iangev vev. 31 Nahan kpiligh ikpelaior la iyol kpishi, zum u ve nenge mbakondonikyer lu lamen shi mbasombon hingir dedoo shi mbaawanev lu zenden tsembelee shi mbaapirashe lu nengen yô. Tsô ve gba wuese Aôndo u Iserael.

32 Kpa Yesu yila mbahenen nav kaa a ve ér: “Kunya kôrom a ikpelaior ne, sha ci u mba vea mo ka ayange atar je ne, man mba a kwagh môm u vea ya ga.* Kam pe nan ve gbenda mer ve yem ijen ga, vea va za gba ijen sha gbenda.” 33 Kpa mbahenen kaa a na ér: “Ka han se zua a ikpenberedi ken ikyôngo heen se na ikpelaior ne ve, vea ya a kuma ve sha wono?” 34 Tsô Yesu pine ve ér: “Ka ikpenberedi ime ne lu a mini?” Ve kaa ér: “Ka itiankarihiar, man anishuuv mba kiriki kpuaa.” 35 Nahan a kaa ikpelaior la i tema inya, 36 maa a tôô ikpenberedi i itiankarihiar kua ishu la, a er msen,* maa a coon a gba nan mbahenen, mbahenen di gema na ikpelaior la. 37 Nahan hanma or ya ide, avur neer, ve kohol a iv akese* a vesen ataankarahar. 38 Mba ve ya la cii, nomso kuma er 4,000 nahan, i wa iyenge i kasev man mbayev ker ga. 39 Tsô a na ikpelaior la gbenda, mba yemen yô, un di nyôr tso yem hen haregh u Magadan.