Yohane

6 Ken masejime yô, Yesu per Zegemnger u Galilia, u i yilan kpaa ér Zegemnger u Tiberia la. 2 Ikpelaior i vesen dondo un ijime, sha ci u ve lu nengen er lu been ior iangev sha ivande yô. 3 Nahan Yesu za unde tema sha uwo vea mbahenen nav. 4 Hen shighe ne Paseka, iniongo i Mbayuda zurum. 5 Tsô Yesu ta ashe za nenge ikpelaior lu van her a na, nahan a pine Filibu ér: “Ka han se yam beredi se na ior mban vea ya?” 6 A pine nahan kpa lu u karen un a kar, sha ci u un iyol na fa kwagh u un sôôn eren yô. 7 Filibu gema kaa ér: “Aluer se yam beredi sha udenariu* deri uhar, se na hanma ve cuku cuku je kpa, una tser sha a ve cii ga.” 8 Nahan orhenen na ugen, iti na ér Anderia, anmgbian u Shimon Peteru, kaa a na ér: 9 “Wanye ugen ngu heen a ikpenberedi itian, i i er sha barli yô, kua ishu ihiar. Kpa ngula di nahan kuma u nan ikpelaioro?”

10 Yesu gema kaa ér: “Kaa nen ior ve tema inya.” Toho gema lu hen ijiir la kpishi. Tsô ior mbara tema her, nomso kuma er 5,000 nahan. 11 Yesu tôô beredi la, a er msen,* maa a kar mba ve tema her la; ishu i kiriki la kpa a er nahan. Tsô ve ya sha ishima ve. 12 Kpa mba ye ka kom ve cii yô, a kaa a mbahenen nav ér: “Kohol nen avur a a neer her la, kwagh môm a de saan ishe ga.” 13 Tsô ve kohol avur a ikpenberedi i itian i sha barli, i ior mbara ya neer her la, iv akese 12 poo poo.

14 Zum u ior nenge ivande i Yesu er ne yô, ve gba kaan ér: “Mimi je ka Profeti u yange i tsenga ôron ér ngu van shin tar je ne.” 15 Yesu fe ér mba nôngon vea kôr un sha apera vea na un tor yô, a kar her kera, a hide a unde sha uwo un tswen.

16 Ka va hingir aikighe yô, mbahenen nav sen shin kpezegemnger, 17 ve za nyôr tso ve lu peren zegemnger la vea yem ken Kapenaum. Shighe ne nahan, ime wa, kpa Yesu lu a va kohol ve ga. 18 Shi zegemnger la lu kpianger sha utaha sha ci u ahumbe a taver lu eren. 19 Nahan kpa, mba nahan tso mba yemen ka kom er umai utar shin unyiin* nahan yô, ve nenge Yesu lu zenden sha zegemnger van ikyua a tso la, nahan mciem gba ve iyol. 20 Kpa a kaa a ve ér: “Ka mo; de cie nen ga!” 21 Tsô ve sase nyôron a na shin tso la. Fese nahan maa tso za ar sha kpetar, ape ve lu zan la.

22 Mba ker ken sev mbu gen yô, ikpelaior i i lu zegemnger yande shon la, kera nenge a tso ugen her ga, saa antso u cuku môm tseegh, shi ve nenge Yesu kpa yem shin tso vea mbahenen nav ga, kpa mbahenen nav yem ve tseegh. 23 Nahan kpa, utso mba ken Tiberia va nyôr ikyua a ijiir i yange Ter er msen* sha beredi, maa na ve ve ya la. 24 Nahan er ikpelaior la kera nenge a Yesu shin mbahenen nav hen ijiir la ga yô, ve nyôr utso vev ve va ken Kapenaum sha u va keren Yesu.

25 Mba va zough a na zegemnger yande ne yô, ve kaa a na ér: “Rabi, ka hanma shighe u ve heene?” 26 Yesu kaa a ve ér: “Mimi mimi je* me kaa ne, ne mba keren mo ka sha ci u uivande mba ne nenge la ga, kpa ka sha ci u ne ya ikpenberedi la ne ide. 27 De eren nen tom sha ci u kwaghyan u ka a saa ishe ne ga, kpa er nen tom sha ci u kwaghyan u una lu her zan zan una kar nan uma u tsôron, u Wan u or una na ne la; gadia Ter, Aôndo iyol na, ver un ikyav i tesen ér a lumun un.”

28 Tsô ve pine un ér: “Ka nyi ityom i gbe u se er ve Aôndo una lumun se?” 29 Yesu gema kaa a ve ér: “Kwagh u Aôndo a soo yô, ka u ne na un u a tindi la jighjigh.” 30 Maa ve kaa a na ér: “Ka nyi ivande u lu a mi u eren wer se nenge, se na u jighjigh? Ka tom u nyi u lu a mi u erene? 31 Ngise uter asev mba tsev ya mana ken taaikyôngo, vough er i nger nahan, ér: ‘A na ve kwaghyan* u a dugh sha yô.’” 32 Yesu gema kaa a ve ér: “Mimi mimi je me kaa ne, Mose yange na ne kwaghyan u a dugh sha la ga, kpa ka Terem a lu nan ne kwaghyan u mimi u a dugh sha la hegen ye. 33 Gadia kwaghyan u Aôndo ne ka u a dugh sha, shi a lu nan tar cii uma yô.” 34 Tsô ve kaa a na ér: “Tere, naan se kwaghyan ne hanma shighe cii.”

35 Yesu kaa a ve ér: “Mo m ngu kwaghyan* u nan uma. Hanma or u nan ve her a mo yô, mayange ijen ia kera kôr nan ga, shi hanma or u nan nem jighjigh cii yô, mayange imura ia kera kôr nan ga. 36 Kpa er m vande ôron ne nahan, ne nenge a mo, kpa ne na jighjigh ga. 37 Mba Terem a nem cii vea va hen a mo, shi mayange me zenda or u nan ve hen a mo la ga; 38 gadia m due sha m va ka u va eren ishima yam ga, kpa ka u eren ishima i un u a tindim la. 39 Man ishima i un u a tindim la yô, ka u mba a nem la cii ma or môm ken a ve nana̱ de saan ga, kpa m̱ va nder ve sha iyange i masetyô. 40 Gadia ka ishima i Terem u hanma or u nan ne Wan jighjigh cii yô, nana̱ zua a uma u tsôron, nahan me va nder nan sha iyange i masetyô.”

41 Tsô Mbayuda gba hunan kwagh na, sha ci u a kaa ér: “M ngu kwaghyan* u a dugh sha yô.” 42 Nahan ve gba pinen ér: “Ka Yesu wan u Yosev ne gaa? Se fa ter na kua ngô na, man er nan a lu kaan hegen ér, ‘M due ka sha’?” 43 Yesu gema kaa a ve ér: “De nen u gban ahon ayol a en. 44 Or môm nana fatyô u gban van hen a mo ga, saa Ter u a tindim la una urugh nan, nahan me nder nan sha iyange i masetyô. 45 Uprofeti nger ér: ‘Ve cii vea lu mba Yehova* a tese ve yô.’ Hanma or u nan ongo Ter shi nan hen kwagh yô, nan ve her a mo. 46 Kpa u ngu wer ma or nenge a Ter ga, saa un u a dugh hen Aôndo la tseegh; ka un a nenge a Ter ye. 47 Mimi mimi je me kaa ne, hanma or u nan ne jighjigh yô, nan ngu a uma u tsôron.

48 “Mo m ngu kwaghyan* u nan uma. 49 Ngise uter enev mba tsev ya mana ken taaikyôngo, kpa ve kpe. 50 Kpa kwaghyan ngun due ka sha, nahan hanma or u nan ye un cii nana kpe ga. 51 Mo m ngu kwaghyan u nan uma, u a dugh sha yô. Aluer or ya kwaghyan ne yô, nana lu uma gbem sha won; man jighilii yô, kwaghyan u me na la, ka iyol yam, sha ci u tar u zua a uma.”

52 Tsô Mbayuda gba zôhôn ker ayol a ve, pinen ér: “Or ne una na se iyol na ér se ya inja nena?” 53 Nahan Yesu kaa a ve ér: “Mimi mimi je me kaa ne, saa ne ya iyol i Wan u or shi ne ma awambe a na, gayô uma una lu ken a ven ga. 54 Or u nana ya iyol yam shi nana ma awambe a am cii nana zua a uma u tsôron, nahan me va nder nan sha iyange i masetyô. 55 Gadia iyol yam ka kwaghyan u mimi, shi awambe a am kpaa ka kwaghman u mimi. 56 Hanma or u nana ya iyol yam shi nana ma awambe a am cii nana lu vea mo kôôsôô, shi mo kpa me lu vea nan kôôsôô. 57 Er Ter u uma a tindim, shi m lu uma sha ci u Ter nahan, kape hanma or u nana ya iyol yam kpaa nana lu uma sha ci wam je la. 58 Ngun ka kwaghyan* u a dugh sha yô. Ngu er kwaghyan u ngise uter enev mba tsev ya kpa ve kpe la nahan ga. Or u nana ya kwaghyan ne cii yô, nana lu uma gbem sha won.” 59 Yange ôr akaa ne shighe u lu tesen ken shinagoge* ugen ken Kapenaum yô.

60 Mbahenen nav mbagenev kpishi mba ongo kwagh ne yô, ve kaa ér: “Kwaghôron ne kunda iyol tsôô; ka an je nana kegh ato a mini?” 61 Kpa Yesu fe ér mbahenen nav gba ahon sha kwagh ne yô, a kaa a ve ér: “Kwagh ne na ne gbeev mbu nôngonoo? 62 Man tsô aluer ne nenge Wan u or ngu kôndon yemen ape yange vande lun la di ye? 63 Ka jijingi a ne uma ye; iyol ngi a iwasen sha ma kwagh môm ga. Akaa a m lu lamen a ven sha mi ne ka a ken jijingi, shi ka a nan uma kpaa. 64 Kpa ne mbagenev ne na jighjigh ga.” Gadia sha hiihii la je Yesu fa mba ve na jighjigh ga la, kua un u una va tee un la kpaa. 65 Shi a kaa ér: “Ka nahan ve m kaa a ven mer, or a fatyô u gban van hen a mo ga, saa Terem soo ye.”

66 Kwagh ne na yô, mbahenen nav kpishi hide yem u eren akaa a ve undu la, ve de u zenden vea na. 67 Nahan Yesu pine Mbapuekaruhar mbara ér: “Ne kpa ne soo u yemenee?” 68 Shimon Peteru gema kaa ér: “Tere, ka hen an je shi se zaa? Ka we u lu a akaaôron a nan or uma u tsôron ye. 69 Se na jighjigh, shi se fa er we u lu Icighan u Aôndo yô.” 70 Yesu gema kaa a ve ér: “Yange m tsua ne ne lu puekaruhar gaa? Kpa or môm ken a ven nan hingir diabolo.”* 71 Lu Yuda, wan u Shimon Isekarioti jighilii je lu ôron ye, sha ci u lu u Yuda ne una va tee un, shin er lu môm ken Mbapuekaruhar mbara nahan kpaa.