Mbaroma

3 Nahan yô, shi ka a inja u lun Oryuda sha nyi? Shin icôngo yô, ngi a inja sha nyi? 2 Ka a inja kpishi sha hanma gbenda cii. Hiihii yô, yange i wa ve icighan loho u Aôndo sha ikyev. 3 Sha nahan yô, aluer Mbayuda mbagenev mba a jighjigh u nan ga yô, a kaa ér nyi? Er ve ban a jighjigh yô, tese ér ior vea kera fatyô u nan Aôndo jighjigh gaa? 4 Mayange ga! Ior cica cii vea eren aie kpa, kwaghôron u Aôndo yô una lu u mimi, vough er i nger nahan, ér: “Kwaghôron wou una tese ér u ngu u perapera, man shighe u ior ve lu nan we ibo kpaa, u tese er u lu a ishô yô.” 5 Nahan kpa, aluer iferkwagh i se eren la gema na ior nenge er Aôndo a lu u perapera yô, se kaa ser nyi? Aôndo ka una tsaha se yô, i tese ér a er a vese shami gaa? (Kape ior mbagenev ve henen je la.) 6 Ka nahan ga cii! Aluer ka nahan yô, Aôndo una ôr tar ijir nena?

7 Kpa aluer m er aie, man aie la tese ér kwaghôron u Aôndo ka u mimi shi a na ior mba wuese un yô, er nan Aôndo shi a nengen mo ér m ngu orsholibo? 8 Er nan se kaa ser: “De se eren nen akaabo sha u akaa a dedoo a̱ due ker” ga? Ka kwagh u ior mbagenev ka ve wa se iyol ér se mba ôron je la. Sha kpôô yô, ambaaior la kuma mtsaha.

9 Nahan se kaa ser nyi? Kwagh wase ngu guda a u mbagenev shinii? Mayange ga! Gadia se vande ôron ser Mbayuda kua Mbagrika cii mba sha ikyev i isholibo; 10 ka vough er i nger nahan, ér: “Orperapera ngu ga, môm tsô kpaa ga; 11 or môm u lun a mkav nan ngu ga; or môm ngu u nan keren Aôndo ga. 12 Ior cii undu gbenda, ve cii ve kera gba kwagh ga; or u tesen erdoo nan ngu ga, mô tsô kpaa ga.” 13 “Gôngor ve ngu er uwar u u lu ivegher nahan; ve tsugh ior sha iniombor ve.” “Megh ku igbinde ku sha ityumbujôôv ve.” 14 “Zwa ve iv a ityuhwanev man zehe.” 15 “Angahar a ve ka a zaan ayem u za haan awambe inya.” 16 “Mtim man ican mba sha igbenda ve, 17 shi ve fa gbenda u bem ga.” 18 “Mba cie Aôndo ga.”

19 Hegen se fa, hanma kwagh u Atindi a kaa cii, ka sha ci u mba ve lu sha ikyev i Atindi la, sha u hanma or nana̱ cir zwa, shi tar cii u ya ibo sha ishigh ki Aôndo yô. 20 Nahan sha atindi a kuran tseegh yô, or môm kpa a kaa ér nan ngu orperapera sha ishigh nagh ga, gadia ka atindi ka a na i fa isholibo wang ye.

21 Kpa hegen ne, i pase wang ér, dugh atindi sha kpa, or a fatyô u eren kwagh u perapera sha ishigh ki Aôndo. Man ka kwagh u i pase ken Atindi kua Uprofeti* kpaa je la. 22 Se fatyô u eren kwagh u perapera sha ishigh ki Aôndo sha u nan Yesu Kristu jighjigh, man kwagh ne ngu sha ci u hanma or u nan ne jighjigh cii. Gadia i sange a sange ga. 23 Gadia ior cica cii er isholibo, nahan kera mba a iengem i Aôndo ga, 24 kpa Aôndo na ve iyua gbilin, er a zungu ve mhôônom, a kaa ér mba mbaperapera sha u paan ve sha nagh ku ipaan ku Kristu Yesu a kimbi la yô. 25 Aôndo na un ér a lu nagh ku iwom* sha awambe a na la; a hingir gbenda u den mba ve ne un jighjigh la asorabo. Lu sha u una tese perapera na, gadia Aôndo lu vanden wan ishima den asorabo a ior lu eren sha ayange a tsuaa la. 26 Lu sha u una tese perapera na sha ayange ne, sha er zum u una kaa ér or u nan ne Yesu jighjigh la nan ngu orperapera je kpa, a lu vough yô.

27 Nahan se mba a ityôkyaa i kaan ihyagha? Ityôkyaa ngi ga. Ka tindi u han se fatyô u kaan ihyagh a mini? Ka tindi u sha kwagh u aerenee? Mayange ga; ka tindi u sha kwagh u jighjigh u nan. 28 Gadia se nenge ser, mba kaan ér or ngu orperapera ka sha jighjigh u nan, ka sha atindi a kuran ga. 29 Shin un ka Aôndo u Mbayuda tseeghle? Kera ka Aôndo u ior mba ken akuraior agen kpaa gaa? Sha kpôô yô, ka u ior mba ken akuraior agen kpaa. 30 Er Aôndo a lu môm yô, una yila mba i tsôngo ve la ér mbaperapera sha ci u jighjigh ve u nan, shi mbapyusu kpaa una yila ve ér mbaperapera sha ci u jighjigh ve u nan. 31 Nahan yô, se de kwagh u atindi sha ci u se na jighjigh yumuu? Mayange ga! Kpa se mba we atindi ikyo.