Mateu

18 Tsô hen shighe la mbahenen va, va pine Yesu ér: “Ka an jim nan hembe ken Tartor u sha?” 2 Maa a yila wanye u cuku va tile hen atô ve. 3 A kaa ér: “Mimi je me kaa ne, saa ne gema mhen wen ne hingir er mbayev mba kiriki nahan, gayô mayange je ne nyôr ken Tartor u sha ga. 4 Sha nahan yô, hanma or u nana hide a iyol i nan ijime nana lu er wan u cuku ne nahan yô, ka nan je nan hembe ken Tartor u sha ye. 5 Man hanma or u nana ngohol wanye u cuku er ngun nahan ken iti yam yô, ka mo je nan ngohol ye. 6 Kpa hanma or u nana na môm ken mba hiden a iyol ijime mba ve nem jighjigh la gbeev mbu nôngon yô, guda u ma i zer imbaor la zegenase sha mon, ma i gbihi nan shin zegemnger u a ze kpishi yô.

7 “Kwagh a tser ior i tar ne sha ci u akaa a nan gbeev mbu nôngon! Ka keng, akaa a nan gbeev mbu nôngon aa va, kpa kwagh a tser or u nana va a kwagh u nan gbeev mbu nôngon la! 8 Nahan aluer uwegh ou shin nguhar wou ku nan we gbeev mbu nôngon yô, tôndo ku ta kera. Guda war a uwegh môm shin nguhar môm, a u i gbihi u a ave ou ahar shin angahar a ou ahar cii ken usu u pirin mayange ga* la. 9 Shi aluer ishe you ngi nan we gbeev mbu nôngon yô, dugh i ta kera. Guda war a ishe i môm, a u i gbihi u a ashe ou ahar cii ken usu u Gehena* la. 10 Ver nen ishima sha er ne laha môm ken mba hiden a iyol ijime mban ga yô. Gadia m ngu kaan ne, mbatyomov mba shaav mba ve nengen sha a ve la mba nengen a ishigh ki Terem u a lu sha la hanma shighe cii. 11 *——

12 “Ne nenge nena? Aluer or ngu a iyôngo 100 man iyôngo i môm ker tsume yô, nana kera undu i 99 la sha iwo, nana yem a za ker i môm i̱ i̱ tsum la gaa? 13 Man aluer nan za zua a i̱ yô, mimi je me kaa ne, nana hemba ember sha kwagh u i̱, a i 99 i i tsum ga la. 14 Kape Terem* u a lu sha la kpa i sar un u or môm ken mba hiden a iyol ijime mban tsô kpa nana tim ga je la.

15 “Man shi aluer anmgbian wou nan er u kwaghbo yô, za pase nan ibo i nan,* we vea nan tseegh. Aluer nan kegh ato a we yô, u wase anmgbian wou la hide sha gbenda u vough je ve. 16 Kpa aluer nan venda u keghen ato a we yô, hide za vea or môm shin iorov uhar, sha er shiada u sha zwa u iorov uhar shin utar una wanger hanma kwagh yô. 17 Aluer nan venda u keghen ato a ve yô, lam a tiônnongo.* Man aluer tiônnongo je kpa nan venda u keghen ato a na yô, nana̱ hingir we vough er ka or u ken tar shin orngoholkpandegh nahan.

18 “Mimi je me kaa ne, nyityôkwagh i ne kange shin tar cii, a lu kwagh u i vande kangen sha yô, shi nyityôkwagh i ne sagh shin tar cii, a lu kwagh u i vande saghen sha yô. 19 Shi me kaa ne, mimi je, aluer iorov uhar ken a ven shin tar ne zua zwa sha u sônon ma kwagh u a lu hange hange yô, Terem u sha la una er ve kwagh shon. 20 Gadia hen ape iorov uhar shin utar ve kohol imôngo ken iti yam yô, me lu hen atô ve.”

21 Tsô Peteru va pine un ér: “Tere, ka kwa me i gbe u anmgbian wam nana erem kwaghbo ve me de nana? Ka kwa taankaruhara?” 22 Yesu gema kaa a na ér: “Me kaa u, ka kwa taankaruhar tseegh ga, kpa ka kwa 77.

23 “Sha nahan yô, a fatyô u tôôn Tartor u sha karen sha kwagh u tor ugen u soo ér ikpan na i kimbi un anzô a yange na ve yô. 24 Mba ngur kimbin un yô, i va un a kpan na ugen u lu un a injô i kuman utalenti 10,000* yô. 25 Kpa er lu a gbenda u kimbin injô la ga yô, orvesen na la na zwa ér i tôô un man kwase na man ônov nav kua akaa a na cii i za tee, i va kimbi un injô na. 26 Tsô kpan la gba inya gba zamber a na kaan ér, ‘Wa ishima a mo; me kimbi u hanma kwagh cii.’ 27 Maa kunya kôr orvesen na la a na, nahan a kaa ér a yem, shi a de un a injô la. 28 Kpan ne yemen yô, a za zua a kpan ugen u lu un a injô i kuman udenariu* 100 yô. Tsô a kôr un, a sende un ave hen ikyer, a kaa ér, ‘Kimbim hanma kwagh u u lum a mi cii.’ 29 Tsô kpan shon gba inya gba zamber a na kaan ér: ‘Wa ishima a mo; me kimbi u hanma kwagh cii.’ 30 Kpa a lumun ga, a gema a yem a na, a za na ér i wuhe un ken purusu, a lu ker zan zan, saa una kimbi un kwagh u a lu un a mi la. 31 Ikpan igen la ngi nengen kwagh u za hemen la yô, ishima vihi ve tsung. Nahan ve yem ve za ôr orvesen ve la hanma kwagh u er la cii. 32 Tsô orvesen na yila un kaa a na ér: ‘We kpan u wan ifer ne, yange m de u a injô you la cii, zum u u zamber mo la. 33 Nahan we kpa doo u ma u zungu kpan ugen la mhôônom er yange m zungwe u mhôônom nahan gaa?’ 34 Tsô ishima vihi orvesen na la pev, maa a na un sha ikyev i mba wuhen ior, ér ve za wuhe un ken purusu, a lu ker zan zan saa una kimbi hanma kwagh u a lu un a mi la cii. 35 Kape Terem u sha kpa una er a hanmô wen je la, aluer nan ngu den anmgbian u nan kwaghbo sha mimi ga yô.”