Aerenakaa

3 Tsô Peteru vea Yohane gba kôndon zan sha tempel, sha shighe u* msen, er ahwa atar atetan* nahan. 2 Hen shighe la, i gema i tôô orgen u i mar un je fatyô u zenden ga yô. Hanma iyange i va ver un ikyua a hunda u tempel ú i yilan ér Dooashe la, sha er una sônon mba karen nyôron ken tempel kwagh yô. 3 Nengen Peteru man Yohane mba va sôôn u nyôron ken tempel yô, a gba sônon ve kwagh. 4 Kpa Peteru kua Yohane kenger sha a na jighilii, maa ve kaa ér: “Kenger se.” 5 Tsô a gba kenger sha a ve ngegh ngegh, lu henen ér una zua a kwagh hen a ve. 6 Nahan kpa, Peteru kaa ér: “Azurfa man zanaria yô, m ngu a mi ga, kpa ka kwagh u m lu a mi je m lu nan we ne. Mough sha zende ken iti i Yesu Kristu, Ornasareti la!” 7 Maa a za a kôr un uwegh ku yanegh a mough a na sha. Her ave ave je, angahar a na kua ashe-angahar a na taver; 8 tsuen sha angahar a na moughon yô, a gba zenden, maa a nyôr ken tempel a ve imôngo, lu zenden, tsuen wuese Aôndo. 9 Nahan ior cii nenge lu zenden wuese Aôndo. 10 Maa ve hii u kaven er lu un teman hen Hunda u Dooashe keghen sha u sônon ior kwagh yô, nahan kwagh u er un ne kpiligh ve iyol shi doo ve tsung.

11 Er or ne kôr Peteru man Yohane ave, lu a pase ga la je, ior cii num kpugh za kohol ve hen ape i yilan ér Varenda u Solomon la, kpiligh ve iyol je gande. 12 Peteru nengen nahan yô, a kaa a ve ér: “Ne ior i Iserael, er nan man kwagh ne a kpiligh ne iyol yum nahana, man er nan ve ne lu kenger se inja er ka sha tahav asev shin ka sha u civir Aôndo yum la man se er or ne a lu zendene? 13 Aôndo u Aberaham man u Isaka man u Yakob, Aôndo u uter asev mba tsev la, ver Ortom na Yesu sha ian i icivirigh. Ka un u yange ne gema un ne na sha ikyev i ior shi ne venda un sha ishigh ki Pilatu, shin er soo u pasen un nahan kpaa la. 14 Yange ne venda icighanor man orperapera la, ne kaa ner i na ne un u lu orwuanor la, 15 ne gema ne wua Un u i ver un a lu Orvesen u Tamen u nan ior uma la. Kpa Aôndo nder un shin ku, man ka kwagh u se lu eren shiada sha mi je la. 16 Shi ka ken iti na kua jighjigh u se ne ken iti na la, or u ne nenge a na shi ne fe un ne a hingir gbong gbong ye. Jighjigh u se ne un la na yô, or ne hingir dedoo sha ishigh yenegh cii. 17 Nahan hegen yô, anmgbianev, m fa, yange ne er kwagh la sha lan, vough er mbahemenev enev kpa er nahan. 18 Kpa ka sha gbenda ne Aôndo a kure akaa a yange tsenga yôôn sha zwa u uprofeti nav cii la ye, ér Kristu na una ya ican.

19 “Sha nahan yô, gema nen asema, hide nen hen Aôndo, i ese asorabo a en kera, sha er Yehova* iyol na una va ne a ashighe a mmem, 20 shi una tindi un u a tsough ér a lu Kristu sha ci wen la yô, ka Yesu je la. 21 A gba u una lu sha, una kegh zan zan ashighe a sôron akaa cii, a Aôndo ôr sha zwa u uicighanmbaprofeti nav mba tsev la aa kar van. 22 Jighilii yô, Mose yange kaa ér: ‘Yehova* Aôndo wen una tsua or ken anmgbianev enev, nana lu profeti sha ci wen, er mo nahan. Ungwa nen hanma kwagh u nana ôr ne cii. 23 Jighilii yô, hanma or u nana ungwa imo i Profeti la ga cii, a tim nan ken nongoior ne kera gbindigh gbindigh.’ 24 Shi uprofeti cii, hii sha Samuel kua mbagenev kpishi mba ve dondo la kpa yôô kwagh u ayange ne wang. 25 Ne mba ônov mba uprofeti mbara man mba ikyuryan i Aôndo ya a uter enev la, sha ci u yange kaa a Aberaham ér: ‘Man ka sha ikyev i wan* wou je icombor i sha tar cii ia zua a iveren ye.’ 26 Aôndo yange nderen Ortom na shin ku yô, a hii tindin un hen a ven sha u a wase hanma wen nana undu aferakaa a ne eren la, nahan nana zua a iveren.”