Aerenakaa

4 Er Peteru man Yohane lu lamen a ior la, upristi man orvesen u mbakuran tempel kua Mbasadushi za va hen a ve. 2 Ishima vihi ve sha ci u mbaapostoli mban lu tesen ior shi yôôn ken igbar ér i nder Yesu shin ku.* 3 Nahan ve kôr ve ve za wuhe ér saa sev mbua av, gadia lu aikighe. 4 Nahan kpa, ior kpishi mba ve ungwa kwaghôron ve la na jighjigh, nahan ingyegh ki nomso seer kuma er 5,000 nahan.

5 Mba ker ken sev mbugen yô, mbahemenev vev kua mbatamen man mbangerenatindi kohol imôngo ken Yerusalem. 6 Anasi, u lu pristi u tamen la kpa lu vea ve, kua Kayafa man Yohane man Alekezanda, man mba ve lu ken tsombor u pristi u tamen la cii. 7 Ve va a Peteru man Yohane hen atô ve, ve gba pinen ve ér: “Ka sha tahav mbu an, shin ka ken iti i an ne er kwagh ne?” 8 Tsô, er Peteru iv a icighan jijingi yô, a kaa a ve ér:

“Ne mbahemenev mba ikyurior ne man mbatamen, 9 aluer mba tôvon se nyian sha kwagh u dedoo u i er a oriwan, shi ne soo u fan or u nan bee or ne iwan yô, 10 ne cii kua ior i Iserael cii fa nen ner, ka ken iti i Yesu Kristu, Ornasareti, u yange ne wua un sha kon, kpa Aôndo nder un shin ku la, ka ken iti na or ne a hingir gbong gbong, a til sha ishigh yenegh heen ye. 11 Un shon la ka ‘iwen i ne mbamaankwagh yange ne laha i la; i hingir iwen i hange hange i sha zongough ku iyoughough.’ 12 Heela tseegh ga, myom ngu hen ma orgen ga, sha ci u iti igen i môm i i ne ior shin tar, i a yima ior sha i ngi ga.”

13 Tsô er ve nenge Peteru man Yohane lu lamen gbar gbar, shi ve kav er ve hen makeranta ga* shi ve lu ior mba sha kwarkyaa ga yô, kpiligh ve iyol. Nahan ve mase kaven er yange ve luun vea Yesu imôngo yô. 14 Shi er ve nenge or u i bee un iwan la tile vea ve yô, ve lu a kwagh u ôron sha ikyaa ne ga. 15 Nahan ve kaa a ve ér ve due ken atejir u Sanhederin la, tsô ve gba lamen ker ayol a ve, 16 kaan ér: “Ka nyi se er a ior mban jimi? Sha ci u, mimi je, ivande i kpilighyol er sha ikyev ve, man ka ikyav hen mba ve tem ken Yerusalem cii, shi ka kwagh u se fatyô u nyiman ga. 17 U kwagh ne a̱ de kera seer samber hen ior ga yô, de se ta ve mciem iyol, se kaa a ve ser ve de kera ôron ma or kwagh ken iti ne mayange ga.”

18 Tsô ve yila ve ve ta ve icin gbang gbang ér mayange ve de kera ôron kwagh shin tesen ken iti i Yesu ga. 19 Kpa Peteru man Yohane gema kaa a ve ér: “Aluer ka kwagh u vough sha ishigh ki Aôndo u se ungwa imo yen, i de lu imo i Aôndo ga yô, kaa nen ase. 20 Kpa se yô, se fatyô u den u ôron akaa a se ongo man a se nenge la ga.” 21 Nahan mba seer tan ve mciem iyol yô, ve pase ve, gadia ve zua a ityôkyaa i môm i tsahan ve ga, shi ve lu cian ior, sha ci u ior cii lu wuese Aôndo sha kwagh u er la. 22 Gadia or u i bee un iwan sha ivande la hemba anyom 40.

23 Mba pasen ve kera yô, ve yem hen ior vev ve za ôr ve akaa a upristi mba tamen man mbatamen ôr a ve la. 24 Mba ongo nahan yô, ve cii ve zua gungur môm, ve er msen hen Aôndo genger genger, ve kaa ér:

“Ter u Hemban Cii, ka We u gbe sha man tar man zegemnger kua akaa a a lu ken a ve cii ye. 25 Shi ka we kpaa yange u ôr kwagh ne sha zwa u Ter wase u tamen Davidi, wanakiriki wou la, sha iwasen i icighan jijingi wou ye, wer: ‘Ka nyi man akuraior a mough ayôôso, man ior ve henen sha agbilinakaa nahana? 26 Utor mba tar ne mough ahendan, mbahemenev kpaa zua sha u hendan kwagh a Yehova* kua un u a tsough la.’* 27 Gadia mimi je, yange Herode man Pontiu Pilatu vea ior mba ken akuraior kua ior i Iserael zua hen gar ne, hendan kwagh a icighan ortom wou Yesu, un u ú tsough la, 28 sha u eren kwagh u ú vande kangen ishima wer a̱ er sha tahav ou man sha awashima wou la. 29 Yô, Yehova,* nenge mciem ma ve lu tan se iyol la, nahan na ikpan you i za hemen u pasen loho wou gbar gbar, 30 shi nalegh uwegh ou her sha u been angev, man u eren uivande kua akaa a kpilighyol ken iti i icighan ortom wou, Yesu.”

31 Mba zamber a Aôndo* yô, ijiir i ve kohol her la tenger, shi ve cii ve iv a icighan jijingi, ve lu pasen loho u Aôndo gbar gbar.

32 Shi ikpelaior i i na jighjigh la cii lu ishima i môm shi uma* ve kpa lu môm, nahan mô ken a ve nan kera nenge ér akaa a nan lu a mi la ka a nan ga, kpa ve cii, ve lu karen akaa a ve cii ker ayol a ve. 33 Shi mbaapostoli lu eren shiada sha utaha je, ér i nder Ter Yesu shin ku, shi Aôndo lu tesen ve cii erdoo na u sha mhôôn la kpishi. 34 Jighilii yô, yange kwagh ban or môm ken a ve ga, sha ci u mba ve lu a inya shin uya la cii, lu teen akaa la van a inyaregh ki sha akaa shon a ve lu teen la, 35 va nan sha ikyev i mbaapostoli. Nahan i lu geman karen ior, hanma or sha mgbe u nan. 36 Nahan Yosev, Orlevi u due ken Shiperu, u mbaapostoli yilan un ér Banaba (inja na yô ér, “Wan u Msurshima”) la, 37 lu a inya, tsô a tee i a va a inyaregh kira a va na sha ikyev i mbaapostoli.