1 Mbakorinte
1 Mo Paulu, i yilam ér m lu apostoli u Kristu Yesu sha ishima i Aôndo, m ngu vea anmgbian wase Sôsetine, 2 m ngu ngeren washika ne hen tiônnongo u Aôndo u ken Korinte, hen ne mba i tsegha ne sha u ne̱ lu ken mzough vea Kristu Yesu, shi i yer ne ér ne̱ lu uicighanmbaiorov la, kua hen mba ve lu hanma ijiir, ve yer sha iti i Ter wase Yesu Kristu la cii; un ka Ter ve man u̱ wase kpaa:
3 Aôndo Ter wase kua Ter Yesu Kristu ve̱ tese ne erdoo u sha mhôôn, shi ve̱ na ne bem.
4 Ka m shi sughun Aôndo wam sha kwagh wen, er a tese ne erdoo u sha mhôôn ken Kristu Yesu yô. 5 Gadia ka sha a na Aôndo a ne ne lu a hanma kwagh mgbeghaa, ne iv a tahav mbu ôron kwagh shi ne iv a mfe kpaa ye, 6 vough er shiada u i er sha kwagh u Kristu la kpa Aôndo a ne a we amise ken a ven taveraa nahan, 7 sha er iyua i môm kpa ne ban a mi ga, er ne lu veren ashe keghen shighe u a va nenge a mve u Ter Yesu Kristu la yô. 8 Shi una na ne tile dông zan zan mkur, sha er a zua a ma ityôkyaa i nan ne ibo sha iyange i Ter wase Yesu Kristu una va la ga yô. 9 Aôndo ka u jighjigh, un u a yer ne sha u ne lu ken mzough* vea Wan na, Yesu Kristu Ter wase la.
10 Anmgbianev, m ngu zamber a ven ken iti i Ter wase Yesu Kristu mer, lu nen zwa môm, mbampav ve de lu her atô wen ga, kpa mhen wen a lu môm kua awashima wen kpaa. 11 Gadia mbagenev ken ya u Kolue ôrom kwagh wen, anmgbianev, ér ayôôso nga hen atô wen. 12 Kwagh u m lu ôron jighilii yô, mer, orgen ken a ven ka nan kaa ér: “Mo m ngu or u Paulu,” orgen di nan kaa ér, “Mo m ngu or u Apolo,” orgen ér, “Mo m ngu or u Sifa,”* orgen di ér, “Mo m ngu or u Kristu.” 13 Nahan Kristu pav ker shinii? Yange i mande Paulu sha kon sha ci wenee? Shin yange i er ne batisema ken iti i Paulu? 14 M wuese Aôndo er yange m er mô wen batisema ga yô, saa di Krisepu man Gayu tseegh, 15 sha er or môm nana kaa ér yange i er ne batisema ken iti yam ga yô. 16 Shi yange m er mba hen ya u Sefana batisema. Mbagenev cii yô, kam er m kera er orgen môm batisema ga nahan. 17 Gadia Kristu tindim ér m er ior batisema ga, kpa ér m yôô loho u dedoo; kpa i̱ de lu sha iliam i mbafantakeda* ga, sha er ku u Kristu kpe sha kon* la ua hingir gbilinkwagh ga yô.
18 Gadia loho u sha kwagh u ku u Yesu kpe sha kon* la ka ibumekwagh hen mba ve lu timin la, kpa hen se mba i lu yiman se ne yô, ngu tesen tahav mbu Aôndo. 19 Gadia i nger ér: “Me na kwaghfan u mbafankwagh una saa ishe, shi me venda* mfe u mbafantakeda.” 20 Orfankwagh ngu hana? Orngerenatindi nan ngu hana? Or u gban anyiman sha akaa a taregh nan ngu hana? Aôndo gema kwaghfan u tar ne* hingir ibumekwagh gaa? 21 Gadia er ior i tar ne i suur sha kwaghfan ve yô, ve fa Aôndo ga. Loho u se pasen la ka ibumekwagh hen mbagenev, kpa ka sha loho shon ne Aôndo a nenge i doo un u yiman mba ve ne jighjigh la ye, man kwagh ne tese kwaghfan u Aôndo la.
22 Gadia Mbayuda mba keren uivande, Mbagrika di mba keren kwaghfan; 23 kpa se mba pasen ser i mande Kristu sha kon; hen Mbayuda yô, kwagh ne ka kwagh u nan gbeev mbu nôngon, kpa hen akuraior agen yô, ka ibumekwagh. 24 Nahan kpa, Mbayuda man Mbagrika mba i yila ve la cii nenge ér Kristu ka tahav mbu Aôndo man kwaghfan u Aôndo. 25 Akaa a Aôndo a ior ve nengen ér ka abumeakaa la, a hemba ior kwaghfan; shi akaa a Aôndo a ior ve nengen ér nga a tahav ga la, a hemba ior tahav.
26 Gadia, anmgbianev, aluer ne nenge yô, ken ne mba i lu yilan ne la, ka ior kpishi ve lu mbafankwagh sha mnenge u orumace* ga, shi ka ior kpishi ve lu sha ian i utaha ga, shi ka ior kpishi i mar ve hen icombor i icivirigh* kpaa ga, 27 kpa Aôndo tsua akaa a tar ne a ior ve nengen ér ka abumeakaa la, sha u heen mbafankwagh; shi a tsua akaa a tar ne a ior ve nengen ér nga a tahav ga la, sha u heen a a lu a tahav la; 28 shi Aôndo tsua akaa a tar ne, a ior ve nengen ér a gba kwagh ga man akaa a ve lahan, ka akaa a a lu ve kwagh ga la je la, sha u una kar a akaa a a lu ve kwagh la kera, 29 sha er or môm nana ta ihyagh sha ishigh ki Aôndo ga yô. 30 Kpa ka un u a ne ne lu ken mzough vea Kristu Yesu la a pase se kwaghfan man perapera u Aôndo ye. Ka sha Yesu se fatyô u hingir wang ye, shi ka un kpaa una yima se sha u paan se duen a vese ken isholibo kera ye, 31 sha er a lu vough er i nger nahan yô, ér: “Aluer or ngu kaan ihyagh yô, nana̱ kaa ihyagh sha kwagh u Yehova.”*