Aerenakaa

14 Er ve lu ken Ikonium la, ve za nyôr ken shinagoge u Mbayuda ugen imôngo, man gbenda u ve lam la na yô, ikpelaior kpishi, Mbayuda kua Mbagrika cii, na jighjigh. 2 Kpa Mbayuda mbagenev mba ve na jighjigh ga la tor ior mba ken akuraior agen mbara asema shi vihi ve ityough a anmgbianev. 3 Nahan ve tôô shighe gôgônan ve lam gbar gbar sha tahav mbu Yehova,* u a er shiada sha loho u sha kwagh u erdoo na u sha mhôôn, sha ian i a ne ve i eren uivande man akaa a kpilighyol la. 4 Nahan kpa, ikpelaior i ken gar la pav ker; mbagenev lu tan ikyaa ken Mbayuda, kpa mbagenev di lu tan ikyaa ken mbaapostoli. 5 Zum u ior mba ken akuraior agen man Mbayuda kua mbahemenev vev lu keren u nzughul a ve shi tan ve awen yô, 6 i va ôr ve kwagh sha mi, nahan ve yevese ve yem hen gar u Likeonia man gar u Lisetera man gar u Derebe, kua agar a kiriki a a kase agar ne la. 7 Ve lu za yôôn loho u dedoo sha ajiir la cii.

8 Orgen gema lu ken Lisetera, u̱ kpe angahar yô. Yange i mar un a iwan, nahan mayange zende ga. Or ne tema inya. 9 Er Paulu lu lamen la, or shon lu ungwan. Tsô Paulu gema kenger sha a na jighilii, nengen ér a na jighjigh kuma u a bee un iwan yô, 10 a ôr genger genger ér: “Mough tile sha.” Or ne maa kighir saghela mough, gba zenden. 11 Ikpelaior nengen kwagh u Paulu er ne yô, ve gba ôron ken zwa Likeonia genger genger ér: “Mbaaôndo hingir uumace, sen va hen a vese!” 12 Maa ve gba yilan Banaba ér Zuusu, kpa Paulu yô, ve lu yilan un ér Hereme, sha ci u lu hemban lamen. 13 Nahan pristi u aôndo u Zuusu, u tempel na lu hen hunda u gar la, va a anomabua man ufaluwa mba i tume yô, sha ihinda i gar la, soo ér una na iniav vea ikpelaior imôngo.

14 Nahan kpa, mbaapostoli mban, Banaba man Paulu, mba ongo kwagh ne yô, ve ande akondo a ve, ve nure ve nyôr ken ikpelaior la, ve ôr genger genger ér: 15 “Anmgbianev, ka nyi ne eren kwagh nahana? Se kpa se mba uumace, se yina er ne nahan. Se mba yôôn loho u dedoo hen a ven, sha u de nen agbilinakaa ne, civir nen Aôndo, u a gbe sha man tar man zegemnger kua akaa a a lu ken a ve cii la. 16 Ken ikyov i ken ijime la, a de akuraior cii lu eren akaa sha asema a ve, 17 nahan kpa, a de u pasen kwagh na sha akaa a dedoo a a er la ga, nôôn ne ura, nan ne iyiav mgbeghaa sha ashighe a mbi, shi nan ne kwaghyan kpishi, shi ivin asema a en a msaanyol.” 18 Er ve ôr akaa ne nahan cii kpa, ve nôngo kwagh tsung ve, ve yange ikpelaior la u nan ve iniav ye.

19 Kpa Mbayuda za mough ken Antiôki man Ikonium va gema ikpelaior la asema, nahan ve ta Paulu awen, ve kpela un ve due a na ken won gar, ve lu henen ér a kpe. 20 Nahan kpa, mbahenen mba va kasen un yô, a mough a nyôr ken gar. Mba ker ken sev mbu gen yô, a yem ken Derebe vea Banaba. 21 Mba za yôôn loho u dedoo hen gar la shi mba gem ior kpishi mba hingir mbahenen yô, ve hide ve va hen Lisetera man Ikonium kua Antiôki. 22 Ve lu taver mbahenen asema, wan ve kwagh ér ve za hemen u nan jighjigh, kaan ér: “Gba keng u se ya atsan kpishi ve se nyôr ken Tartor u Aôndo ye.” 23 Shi ve lu tsuan ior veren ve mbatamen sha ci u mbahenen ken hanma tiônnongo,* eren msen shi hôron kwaghyan, wan ve sha ikyev i Yehova,* u ve va hingir u nan un jighjigh la.

24 Tsô ve kar ken Pisidia ve va ken Pamfilia, 25 mba va pasen loho hen Perga kera yô, ve sen shin Atalia. 26 Ve mough her maa ve nyôr tso ve hide hen Antiôki, hen ape yange i vande sônon Aôndo sha u a̱ tese ve erdoo na u sha mhôôn sha ci u tom ve u ve er ve kure doo doo la.

27 Ve va nyôr ve kohol tiônnongo la cii ijiir i môm, ve ôr ve akaa kpishi a Aôndo a er sha ikyev ve yô, man er a bugh gbenda sha u akuraior agen kpa a na jighjigh yô. 28 Tsô ve lu her vea mbahenen mbara ayange kpishi.