Titu

3 Umbur ve ve̱ za hemen u lun sha ikyev i ugomoti man mbautahav shi ve̱ ungwan imo ve, ve̱ keghen a kegh iyol u eren hanma tom u dedoo, 2 ve̱ de lamen sha ma or dang ga, ve̱ de lu mba zôhôn zwa ga, kpa ve̱ lu mba eren kwagh sha kwaghfan, ve̱ eren kwagh a ior cii sha ishima i legh legh tsung. 3 Gadia se kpa yange se lu abumeaior, se lu mba ungwan kwagh ga, i tsume a vese, se lu ikpan i asaren atô kposo kposo kua akaa a nan msaanyol, se lu eren aferakaa shi gban iyuhwe, se ndôhôr ishima, se lu mba kôron mbagenev ihyom.

4 Nahan kpa, Aôndo, Oryiman wase tese uumace erdoo na kua dooshima na ken igbar. 5 A yima se (lu sha ci u ma tom u injaa u se er ga, kpa lu sha ci u mhôônom nam ma zungwen); yange er kwagh ne zum u na se uma sha u ôôn se shi geman se sha u se̱ hingir hegh sha icighan jijingi la. 6 Yange haa jijingi ne mgbeghaa sha a vese sha ikyev i Yesu Kristu Oryiman wase, 7 sha er zum u una nenge se ér se mba mbaperapera sha erdoo u sha mhôôn u un shon la kera yô, se hingir mba yan dyako u sha kwagh u ishimaverenkeghen i uma u tsôron la yô.

8 Akaaôron ne ka a mimi, shi m soo mer za hemen u ôron akaa ne var var, sha er mba ve ne Aôndo jighjigh la vea za hemen u veren ishima eren ityom i dedoo yô. Akaa ne ka a dedoo shi nga ior a inja.

9 Kpa kwagh môm a de gbe u sha anyimanakaa a ibume man icombor i ôron kua ayôôso man anyiman a gban sha kwagh u Atindi ga, gadia mtsera ngu ken akaa ne ga, ka agbilinakaa tsô. 10 Or u nan paven iniongo yô, wa nan kwagh* kwa u hiihii man kwa u sha uhar, aluer nan ungwa ga yô, pav a nan. 11 Gadia er u fe nahan, imbaor la nan undu gbenda, nan ngu eren isholibo shi nan ya ibo ken ishima i nan.

12 Zum u me tindi Atema gayô Tikiku hen a we yô, nôngo sha afatyô wou cii va kohol mo hen Nikopoli, gadia ka her m lu veren ishima mer me lu zan zan shighe u wuhee una kar been ye. 13 Nôngo tsung na Zena, u a fe Atindi tsema tsema la iwasen, kua Apolo, sha er kwagh a ban ve ken zende ve ga yô. 14 Ior asev kpa ve̱ hen u eren akaa a dedoo her, sha er vea wasen sha shighe u kwagh a gbe gagh yô, sha u vea za hemen u umen atam hanma shighe yô.

15 Mba ve lu heen a mo imôngo la cii mba sughun ne. Sugh mbananjighjigh mba se doo ve ishima la sha ci wam.

Aôndo a̱ za hemen u tesen ne cii erdoo u sha mhôôn.