Aerenakaa
21 Yange kôr se iyol u undun ve, kpa se taver ishima se nyôr tso, se va jighilii se va ar hen Kos. Mba ker ken sev mbugen yô, se va ar hen Rode. Se mough her maa se va nyôr hen Patara. 2 Se va zua a tso u peren yemen Finishia, maa se nyôr se gba yemen. 3 Se mba va te ashe se mba nengen a icile i Shiperu yô, se undu i ken imese,* se kar jighilii se va ken Shiria se va nyôr hen Tiru, pe lu u tso la una dugh ikyav la. 4 Se ker mbahenen se mba zough a ve yô, se tsa her ayange ataankarahar. Kpa jijingi mgbegha ve ve ôr a Paulu var var ér a de te nguhar ken Yerusalem ga. 5 Nahan shighe wase hen ijiir la va been yô, se mough se gba yemen. Kpa ve cii, a kasev kua mbayev kpaa, ve ver se gbenda zan zan se kar duen ken gar. Se va gure inya shin kpemnger se er msen, 6 maa se kua ve cii se kaa ser, saa shighe ugen. Tsô se nyôr shin tso, ve di ve hide ve yem hen uya vev.
7 Tso la mough a vese hen Tiru va nyôr hen Potolomai, maa se kure zende wase u shin tso her. Se sugh anmgbianev shi se tsa her vea ve iyange i môm. 8 Mba ker ken sev mbugen yô, se mough se va hen Sesaria, se va nyôr hen ya u orivangeli Filibu, u lu môm ken iorov mba utaankaruhar mba yange i tsua la, se lu vea na her. 9 Or ne lu a ônov mba kasev unyiin mba ve lu a er noov ga yô,* ve ôron kwaghôron u profeti. 10 Kpa se mba tse her ayange imôngo yô, profeti ugen, i yilan un ér Agabu, za mough sha Yudia va. 11 A va hen a vese a va tôô kwange u Paulu, a kange ave na a mi kua angahar, maa a kaa ér: “Icighan jijingi ngu kaan nahan ér, ‘Kape Mbayuda mba ken Yerusalem vea kange or u kwange ne u lu u nan la je ne, shi vea na nan sha ikyev i ior mba ken akuraior.’” 12 Nahan se mba ongo kwagh ne yô, se kua mba ve lu her la se gba zamber a Paulu ser a̱ de ze sha Yerusalem ga. 13 Kpa Paulu kaa ér: “Er nan ne vaan, ne nôngon u nan mo iyolkpene? Fa nen ner, m lumun ka u i kangem tseegh ga, a lu ku kpa me za kpe sha Yerusalem sha ci u iti i Ter Yesu.” 14 Se mba fetyô u yangen un ga yô, se de u vendan a na, se kaa ser: “I̱ er ishima i Yehova.”*
15 Ken masejime yô, se wa ikyav se mough se gba yemen sha Yerusalem. 16 Mbahenen mbagenev ken Sesaria kpa lu yemen vea vese imôngo, ve za a vese hen Manisôn, or u ken Shiperu, u lu môm ken mbahenen mba hiihii, u lu u se za tsa hen ya na la. 17 Se mba za nyer sha Yerusalem yô, anmgbianev ngohol se saan saan. 18 Kpa mba ker ken sev mbugen yô, Paulu za vea vese hen Yakobu, mbatamen kpa lu her cii. 19 A sugh ve, maa a gba ôron ve akaa a Aôndo a er ken akuraior agen sha tom na la vighe vighe.
20 Mba ongo kwagh ne yô, ve gba wuese Aôndo, kpa ve kaa a na ér: “Nenge ase, anmgbian, ior udubu imôngo ken mba ve ne jighjigh la ka Mbayuda, man ve cii gba ve ishima u kuran Atindi. 21 Kpa ve ungwa i kaa ér u ngu tesen Mbayuda mba ken akuraior cii wer ve̱ undu atindi a Mose, kaan wer ve̱ de tsôngon ônov vev ga, shin ve̱ de dondon aeren a uter ga. 22 Nahan ka nyi se er sha kwagh ne? Ka keng vea ungwa ér u va nyôr. 23 Yô, er kwagh u se lu kaan we ne: Se mba a nomsombaiorov unyiin, mba ve er iceghzwa yô. 24 Yem a ior mban za wanger iyol you a ve imôngo, shi er ve akaa a i gbe u vea er sha inyar la, i hondo ve ityouv. Nahan hanma or nana fa ér akaa a i er sha a we la cii mimi ngu ker ga, kpa u ngu eren kwagh sha inja sha inja shi u ngu kuran Atindi kpaa. 25 Mbananjighjigh mba ken akuraior agen yô, se vande ngeren ve washika se pase ve kwagh u se tsough yô, ser ve nyagh akaa a i senge sha ci u akombo yô, kua awambe man akaa a i senge a sôngo ga* yô, man idya.”*
26 Tsô mba ker ken sev mbugen yô, Paulu yem a nomsombaiorov mbara za wanger iyol na a ve imôngo, maa kar yem ken tempel sha u una za ôr shighe u ayange a wanger iyol la aa bee yô, shi una kaa i na nagh sha ityough ki hanmô ve.
27 Nahan ayange a ataankarahar la nga va zurum u been yô, Mbayuda mba ken Ashia va nenge a na ken tempel, maa ve tor ikpelaior la cii asema, ve tsehe ve kôr un, 28 ve gba ôron genger genger ér: “Ior i Iserael, va nenoo! Ka or u hanma ijiir cii a lu tesen hanma or akaa a vihin sha ior asev man Atindi a ase kua ijiir ne je ne. Shi kwagh u hemban vihin yô, a va nyôr a Mbagrika je kpaa ken tempel, a hôngor a icighanjiir ne.” 29 Gadia ve sember nengen a Terofimu, or u ken Efese vea Paulu ken gar, maa ve tôô ér Paulu va nyôr a na ken tempel. 30 Tsô gar cii num kpugh; ior tsehe gba yevese van, ve va kôr Paulu ve due a na ken tempel kera, maa fese je i wuhe ihinda. 31 Mba gbe nôngon u wuan un yô, loho za nyôr a kurutya u kweshojaa ér Yerusalem cii num. 32 Nahan fese je a mough a ushoja kua ushoja mba vesen vev, a sen ayem a va pe ve lu la. Mba nengen a kurutya u kweshojaa la kua ushoja mbara yô, ve de u gbidyen Paulu.
33 Tsô kurutya u kweshojaa la kporom va kôr Paulu, shi na wada i kange un sha mshirim mhar; maa a pine un or u a lu, man kwagh u a er yô. 34 Kpa mbagenev ken ikpelaior la gba ngoron ôron akaa kposo kposo. Er ayôôso la na kera fatyô u fan kwagh u lu zayol la jighilii ga yô, a na wada ér i yem a na hen iyaagh ki shoja. 35 Kpa za aren hen tsembe u unden yemen sha iyaagh ki shoja la yô, ushoja mbara kôr un zengaa, sha ci u ikpelaior la soo u bulan un, 36 gadia ikpelaior la lu van ve ken ijime, ôron genger genger ér: “Bee a na sha!”
37 Mba gbe nôngon u vea yem a Paulu hen iyaagh ki shoja yô, a pine kurutya u kweshojaa la ér: “Ú lumun wer m lam a we je kpa?” A gema a pine ér: “U fa zwa Grikaa? 38 Kera ka we Origipiti u yange u tuur ior shighe ugen la wer ve hendan a gomoti, u hemen iorov 4,000 mba nôngon num sha ahô, u yem a ve ken taaikyôngo ne gaa?” 39 Paulu gema kaa ér: “Jighilii yô, m ngu Oryuda, i maren hen Tarsu, ken Shilishia; m ngu marnya hen gar u i fe un wuee la. Nahan wea lumun yô, de m lam a ior mban.” 40 Ne Paulu ian yô, Paulu tile sha tsembe la, kure ior mbara uwegh. Mba huan ving yô, a lam a ve ken zwa Heberu, a kaa ér: