Mbaefese

1 Mo Paulu, i yilam ér m lu apostoli u Kristu Yesu sha ishima i Aôndo; m ngu ngeren washika ne hen uicighanmbaiorov mba ken Efese, mba ve til sha mimi ken mzough vea Kristu Yesu la:

2 Aôndo Ter wase man Ter Yesu Kristu ve̱ tese ne erdoo u sha mhôôn shi ve̱ na ne bem.

3 I̱ wuese Aôndo, Ter u Ter wase Yesu Kristu, gadia a na se averen a ken jijingi cii, a sha ajiir a sha la, se mba se lu ken mzough vea Kristu ne. 4 Yange tsua se ér se̱ lu ken mzough vea na,* er i lu a hii u gban tar* ga la je, sha u se̱ tesen dooshima, nahan se̱ lu wang sha ishigh nagh, a acôghor shio yô. 5 Gadia a vande tseghan se sha ikyev i Yesu Kristu tsuaa je, sha u una lumun se se hingir ônov nav; yange doo un tsung u eren nahan, shi lu sha awashima na, 6 sha er a wuese Aôndo sha ci u iengem i erdoo na u sha mhôôn u a tese se kpishi, sha wan na u ishima ishima la yô. 7 Ka sha wan na shon i paa se se kera lu uikyangen ga ye. Jighilii yô, i de se akaabo a ase sha awambe a un shon la. Sha kpôô yô, erdoo u sha mhôôn u Aôndo la ngee!

8 Aôndo tese se erdoo na u sha mhôôn ne wuee, a er kwagh ne a hanma kwaghfan man mkav* cii, 9 sha u pasen se icighan kwaghmyer u a we ishima u eren yô. Doo un u eren kwagh ne, nahan a wa ishima ér 10 una bugh gbenda u kohol* akaa, zum u shighe u a ver la una kuma vough yô; una kohol akaa a sha man a shin tar cii sha ikyev i Kristu. Ka sha a na, 11 un u se lu ken mzough vea na shi i ne se ian i lun mbayandyako vea na la, yange i tsegha se ye, man i er nahan tsuaa je sha awashima u un u a eren akaa cii, u ka a tsua u eren kwagh er a soo la. 12 Ka sha u se mba se lu mbahiihii mba lun a ishimaverenkeghen sha kwagh u Kristu la, se̱ er tom sha ci u icivir man iwuese na. 13 Shi ne kpa yange ne lu a ishimaverenkeghen sha kwagh na zum u ne ungwa kwaghôron u mimi la yô, ka loho u dedoo u sha kwagh u myom wen je la. Ne mba ne jighjigh yô, i ver ne ikyav sha icighan jijingi u yange i tôndo zwa u nan ne la, 14 jijingi la ka ibumun i i tsenga nan se sha kwagh u dyako wase, sha u i paa mba ve lu kwagh u Aôndo la ve de kera lu uikyangen ga, sha ci u iengem i icivir na la.

15 Ka nahan ve, mo kpa, er m ungwa kwagh u jighjigh u ne ne Ter wase Yesu la, kua dooshima u ne lu tesen uicighanmbaiorov cii la yô, 16 m mem u sughun Aôndo sha kwagh wen mayange ga ye. M ngu teren ne ken mbamsen av her, 17 mer Aôndo u Ter wase Yesu Kristu, u a lu Ter u icivirigh la, a̱ na ne jijingi na sha er ne lu a kwaghfan shi ne kav mbampase nav, nahan ne zua a mfe u vough sha kwagh na yô. 18 A bugh ne ashe a ishima wang sha er ne kav ishimaverenkeghen i a yila ne sha u ne̱ lu a mi la, shi ne̱ fa er dyako u a ver sha ci u uicighanmbaiorov la i lu kwagh u icivirigh tsung, 19 shi ne̱ fa tahav nav mbu hemban cii mbu a tese se mbananjighjigh la yô. Ka sha gbenda u a eren kwagh a tahav nav mbu hemban cii mbura i nenge a agee na a hemban, 20 a yange tese sha kwagh u Kristu, zum u a nder un shin ku a za ver un tema ken uwegh nagh ku yanegh sha ajiir a sha la ye. 21 A kende a na sha hemba hanma gomoti kua mbautahav, man mbahemenev man utor kua hanma iti cii, ken tar* ne tseegh ga, kua ken u u lu van la kpaa. 22 Shi a gema akaa cii a wa sha ikyev* na, shi a ver un ngu ityough sha akaa cii ken tiônnongo, 23 u a lu iyol na, i i iv a hanma kwagh na, un shon u a lu ivin hanma kwagh ken akaa cii la.