Yohane
20 Ka va nyer sha iyange i hiihii ken kasua* yô, Maria Madalina va hen uwar la pepe pepe, shighe u sev lu a wanger ga yô. Nengen yô, i menger iwen sha uwar la kera. 2 Nahan a yevese a va hen Shimon Peteru man orhenen ugen, u yange doo Yesu ishima la, a va kaa a ve ér: “I dugh Ter hen uwar la kera, man m fa ape i za ver un ga.”
3 Tsô Peteru man orhenen la mough gba yemen hen uwar la. 4 Ve uhar cii ve gba yevese imôngo, kpa orhenen shon lu hemban yevese a Peteru, nahan za vande aren hen uwar la. 5 Ngurum gbirin ashe yô, a nenge akondo la lu ker, kpa a nyôr ker ga. 6 Shimon Peteru u lu van un ken ijime la kpa va sôôn, maa kar nyôr ken uwar la. Nahan a nenge a akondo la her. 7 Ikyondo i yange i kange Yesu ityough a mi la lu ijiir i môm a akondo agen a i kange un iyol la ga, kpa i̱ hure i̱ lu ijiir igen kposo. 8 Maa orhenen u vande aren hen uwar shon la kpa nyôr ker, nenge shi na jighjigh. 9 Gadia ve lu a kav kwagh u ruamabera kaa ér gba keng u una nder shin ku la ga. 10 Tsô mbahenen mbara hide yem ken uya vev.
11 Kpa Maria tile ken won ikyua a uwar la lu her, lu vaan. Er lu vaan la, a ngurum a gbir ashe ken uwar shon, 12 tsô a nenge mbatyomov uhar lu a akondo a pupuu iyol, ve tema ape yange i gbir ikyom i Yesu la, u môm tema vegher u sha ityou, ugen tema vegher u shin angahar. 13 Tsô ve pine un ér: “Kwase, er nan u vaana?” A kaa a ve ér: “I tôô Terem i yem a mi, man m fa ape i za ver un ga.” 14 Ôron nahan yô, a gema ashe ken ijime, maa a nenge Yesu tile her, kpa fa er lu Yesu ga. 15 Yesu pine un ér: “Kwase, er nan u vaana? Ka an u kerene?” Kpa a hen ér ka orsule, nahan a kaa a na ér: “Orvesen, a lu we u tôô un yô, kaam ape u ver un la, sha er me za tôô un yô.” 16 Yesu kaa a na ér: “Maria!” Gem yô, a kaa a na ken zwa Heberu ér: “Raboni!” (inja na yô ér “Ortesen!”) 17 Yesu kaa a na ér: “De kôron mo ave iyol ga, gadia m ngu a kôndo m yem hen Ter ga. Kpa za hen anmgbianev av za kaa a ve wer, ‘M ngu kôndon yemen hen Terem man Ter wen, kua hen Aôndo wam man Aôndo wen.’” 18 Tsô Maria Madalina va ôr mbahenen loho la, ér: “M nenge a Ter!” Shi a ôr ve kwagh u ôr a na la.
19 Tsô iyange i hiihii ken kasua shon va zurum u been yô, mbahenen kohol imôngo ken iyou, shi i senda ihinda, sha ci u ve lu cian Mbayuda. Tsô Yesu va tile hen atô ve, kaa a ve ér: “Bem a lu sha a ven.” 20 Er nahan yô, a tese ve ave na kua ihyan na. Mbahenen mbara mba nengen a Ter yô, ve ember. 21 Yesu shi kaa a ve ér: “Bem a lu sha a ven. Er Ter a tindim nahan, mo kpa m ngu tindin ne.” 22 Er kwagh ne yô, a fehe humbe sha a ve, maa a kaa a ve ér: “Ngohol nen icighan jijingi. 23 Aluer ne de or akaabo a nan yô, i de nan a; man aluer ne de or akaabo a nan ga yô, i de nan a ga.”
24 Kpa Toma, u lu môm ken Mbapuekaruhar, u i yilan ér Ahina* la, lu vea ve shighe u Yesu va hen a ve la ga. 25 Nahan mbahenen mbagenev mbara lu kaan a na ér: “Se nenge a Ter!” Kpa a kaa a ve ér: “Saa me nenge a ajiir* a yange i mande un ukusa ken ave la, shi me bende ihyôwe ape yange i mande un ukusa la, shi me bende un uwegh ken ihyan, gayô mayange me na jighjigh ga.”
26 Ayange nga kar anigheni yô, mbahenen nav shi kohol ken iyou, shi Toma kpa lu vea ve. Er i senda ihinda nahan kpa, Yesu va tile hen atô ve, kaa ér: “Bem a lu sha a ven.” 27 Maa a kaa a Toma ér: “Bende ihyôwe heen nenge ave am, shi za uwegh bendem ken ihyan, nahan de u tan akperan, kpa na jighjigh.” 28 Toma gema kaa a na ér: “Terem man Aôndo wam!” 29 Yesu kaa a na ér: “Er u nenge a mo yô, u na jighjigh zee? Saan mba ve nenge ga kpa ve ne jighjigh la iyol.”
30 Jighilii yô, Yesu yange er uivande mbagenev kpishi sha ishigh ki mbahenen nav, mba i nger ken ihyurenruamabera ne ga yô. 31 Kpa i nger angan inya sha er ne na jighjigh ner Yesu ka Kristu, Wan u Aôndo, man sha er ne zua a uma sha jighjigh u ne ne ken iti na la yô.