Marku

6 A mough heregh a va hen ijiir na, mbahenen nav dondo un ijime. 2 Ka va nyer sha Iyange i Memen yô, a gba tesen ken shinagoge, nahan kpiligh ior kpishi mba ve ungwa ityesen na la iyol, ve kaa ér: “Ka han or ne a zough a akaa nee? Man er nan ve i ne un imba kwaghfan ne, kua tahav mbu eren ityom i kpilighyol ingin nahana? 3 Ka orkapinta, wan u Maria ne gaa? Anmgbianev nav mba nomso ka Yakobu man Yosev man Yuda kua Shimon gaa? Shi anmgbianev nav mba kasev kpa mba a vese heen imôngo gaa?” Nahan kwagh ne hingir u nan ve gbeev mbu nôngon. 4 Kpa Yesu gema kaa a ve ér: “Profeti banen a icivir ga, saa hen ijiir i nan man hen ior mba nan kua hen ya u nan tsô nan lu a mi ga ye.” 5 Maa a kera fatyô u eren ma tom u kpilighyol her ga, saa di u pendan ave sha mbauangev kpuaa been ve angev tsô. 6 Jighilii yô, kpiligh un iyol er ve ban a jighjigh u nan yum yô. Tsô a zende a tese ior sha agar a kiriki a hen ningir la cii.

7 Tsô a yila Mbapuekaruhar mbara, a hii u tindin ve uhar uhar, shi a na ve tahav mbu zendan ujijingi mba bov* ken ior kera. 8 Shi a kaa a ve ér ve̱ de tôôn kwagh môm sha ci u zende la ga, saa gbough tseegh; beredi ga, ikpa i wan kwaghyan ga, shi ve de tôôn inyaregh ken akpa a inyar* a ve kpaa ga. 9 Kpa ve wa akôv* shi ve de huan akondo ahar* kpaa ga. 10 Shi a kaa a ve ér: “Hanma ijiir i ne ze cii, nea za nyôr hen ma ya yô, lu nen her zan zan ne kar moughon hen ijiir la. 11 Man aluer i ngohol ne hen ijiir igen ga, shin i kegh ato a ven her ga, man ne mba moughon hen ijiir shon yô, kure nen ihyundu i i lu ne shin angahar la, nahan i lu shiada hen a ve.” 12 Tsô ve due ve gba pasen kwagh kaan a ior ér ve gema asema, 13 shi ve zenda azôv kpishi ken ior kera, shi ve shighe mbauangev kpishi mkurem, ve bee ve angev.

14 Tor Herode va ungwa kwagh ne, sha ci u iti i Yesu za gwa kpishi, nahan ior lu kaan ér: “I nder Yohane u Eren Batisema shin ku, ka nahan ve a lu eren ityom i kpilighyol ne ye.” 15 Kpa mbagenev lu kaan ér: “Ka Eliya.” Mbagen di lu kaan ér: “Ka profeti, er mô ken uprofeti mba ngise mbara nahan.” 16 Kpa zum u Herode ungwa kwagh ne yô, a kaa ér: “Ka Yohane u yange m gber un ityough la je i nder un shin ku ye.” 17 Sha ci u Herode yange tindi i za kôr Yohane i haa un ahye i wuhe ken purusu sha ikyaa i Herodia, kwase u Filibu, sha ci u Herode vôso un. Filibu lu anmgbian u Herode. 18 Ityôkyaa yô, Yohane zer kaan a Herode ér: “U vôso kwase u anmgbian wou ka shami ga.” 19 Nahan Herodia wa kwagh ishima a na shi lu keren u wuan un, kpa lu fan ityô ga. 20 Herode yange cian Yohane, sha ci u fa er a lu orperapera shi a lu icighanor yô, nahan lu kuran un. Yange una ungwa kwaghôron u Yohane yô, a kera fa kwagh u una er a na ga. Kpa za hemen u keghen ato a na saan saan.

21 Kpa ian va due sha iyange igen la, zum u Herode er iniongo aikighe sha iyangemar na sha ci u mbatomov nav mba tagher tagher man ukurmbautyaav nav kua ashagbaaior a ken Galilia a duen ati yô. 22 Tsô wan u Herodia u kwase va nyôr vine amar doo Herode kua mba ve lu yan kwaghyan a na imôngo la. Nahan tor kaa a wankwase la ér: “Ôrom nyityôkwagh i u soo cii, me na u.” 23 Je shi a bum a na ér: “Nyityôkwagh i u sônom cii, me na u, a lu vegher u tartor wam je kpaa.” 24 Tsô a due a za pine ngô na ér: “M̱ sôn nyi?” A kaa a na ér: “Ityough ki Yohane u Eren Batisema.” 25 Maa a hide fese a nyôr a za sôn tor kwagh u soo la, a kaa ér: “M soo mer nam ityough ki Yohane u Eren Batisema sha pelengi hegen je.” 26 Tor ure kpishi, kpa gema soo u vendan kwagh u sôn la ga, sha ci u uiceghzwa mba er sha ishigh ki mbavannya nav la.* 27 Nahan fese je tor tindi or u kuran un, kaa a na ér a za va a ityough ki Yohane. Tsô a yem a za gber un ityough ken purusu 28 a va a ki sha pelengi, a va na wankwase la, wankwase la di za a mi za na ngô na. 29 Mbahenen mba Yohane mba ongo nahan yô, ve va tôô ikyom na ve za ii un ken uwar.

30 Mbaapostoli mba Yesu mba za hidi hen a na yô, ve ôr un akaa a ve za er la cii kua a ve tese ior la kpaa. 31 Tsô a kaa a ve ér: “Va nen ne tseegh hen ape or nan lu ga yô, va mem nen kpuaa.” Sha ci u ior kpishi lu van ape ve lu la shi hiden yemen, nahan ve lu zuan a shighe u memen shin yan kwaghyan tsô kpaa ga. 32 Tsô ve za nyôr tso ve tseegh, ve yem hen ijiir igen i or lu her ga yô. 33 Kpa ior nenge er ve lu yemen yô, nahan ior kpishi mba va fe nahan yô, ve due ken agar cii ve yevese angahar ve za vande nyôron hen ijiir la a ve. 34 Va dugh shin tso yô, a nenge a ikpelaior i vesen, tsô kunya kôr un a ve, sha ci u ve lu er iyôngo i i lu a or u kuran i ga nahan. Maa a gba tesen ve akaa kpishi.

35 Shighe ze yô, mbahenen nav va kaa a na ér: “Gar ngu ikyua heen ga, man shighe kpa za hegen. 36 Yô na ve gbenda ve yem ken uya man agar a kiriki a hen ningir ne, ve za yam kwagh u vea ya yô.” 37 Kpa a kaa a ve ér: “Ne, na nen ve kwagh ve ya.” Ve gema ve kaa a na ér: “Se̱ za yam beredi sha udenariu* 200 se̱ va na ior mban ve yaa?” 38 A kaa a ve ér: “Ka ikpenberedi ime ne lu a mini? Za nenge nen!” Mba za nengen yô, ve kaa ér: “Ka itian man ishu ihiar.” 39 Tsô a kaa a ior mbara cii ér ve tema akum akum sha toho u ndor la. 40 Tsô ve tema akum akum; akum agen lu iorov 100, agen lu iorov 50. 41 Tôôn ikpenberedi i itian la man ishu i ihiar la yô, a gema a kenger sha aôndo a er msen.* Maa a coon ikpenberedi la a gba nan mbahenen nav ér ve za na ior, shi ishu i ihiar la kpa a na i kar ior cii. 42 Nahan ior cii ya kuma ve, 43 shi ve kohol avur a a neer yô, iv akese 12 poo poo, i wa ishu ker ga. 44 Ken mba ve ya ikpenberedi la, nomso lu 5,000.

45 Tsô a kera ngôôr ga je maa a kaa a mbahenen nav ér ve za nyôr tso ve hemen a na, ve per yande la, vegher u ken Beteseida la, un una na ikpelaior la gbenda ve yem. 46 Kpa ne ve gbenda yô, a kar a yem sha uwo u za eren msen. 47 Ka va hingir aikighe yô, tso la lu ken atô u zegemnger, kpa un lu sha tar tswen. 48 Tsô a nenge ve lu nahan tso sha ican, sha ci u ve ver ishigh sha ahumbe. Nahan ka va kom sha use* yô, a gba zenden sha zegemnger van ape ve lu la, kpa lu van er a soo u karen ve yemen nahan. 49 Mba nengen a na zenden sha zegemnger yô, ve gba pinen ér: “Ka mnyamciem shinii?” Tsô ve gba ngoron. 50 Sha ci u ve cii ve nenge a na, nahan ishima ta ve kwe. Kpa fese je a ôr kwagh a ve a kaa ér: “Taver nen ishima! Ka mo; de cie nen ga.” 51 Karen nyer shin tso yô, ahumbe la maa de. Nahan kwagh ne kpiligh ve iyol tsung, 52 gadia shin er un u na ior ikpenberedi la lu a tahav mbu shi eren ivande ne nahan kpa, ve kav ga, sha ci u asema lu a bugh ve u kaven nahan ga.

53 Mba peren mba za ar ken Genesareti yô, ve zer tso her ikyua. 54 Kpa mba dugh shin tso yô, fese je ior nenge a na fa. 55 Nahan ve yevese ve za ôr mba hen ijiir la cii, maa ve gba van a mba ve lu dedoo ga la sha ugambe hen ape ve ungwa ér ngu la. 56 Shi hanma gar u kiriki man gar u vesen kua uya mba ken agar, mba yange una nyôr her cii yô, i ver mbauangev sha ityembekasua, ve zamber a na ér ma ve bende a tsumbur u ikyondo i a hee iyol la di tseegh tsô. Nahan mba ve bende a mi la cii, iangev vev bee.