1 Mbatesalonika

2 Anmgbianev, ne ayol a en ne fa dedoo er mve wase hen a ven lu gbilinkwagh ga yô. 2 Gadia yange se hii yan ican shi i er kwagh a vese sha ilyahan hen Filipi, er ne vande fan nahan, kpa Aôndo wase na yô, se taver ishima se pase ne loho u dedoo u Aôndo, shin er se tagher a ahendan kpishi nahan kpaa.* 3 Gadia akaawan a ne lu ungwan sha zwa wase la ka mbaaie ga, shi se mba wan ne a, a awashima u bo shin sha u tsughun ne ga, 4 kpa er Aôndo a lumun se, a we se loho u dedoo sha ikyev yô, se mba ôron kwagh sha u doon ityough a ior ga, kpa ka u i doo Aôndo, un u a tôvon asema a ase la.

5 Jighilii yô, ne kpa ne fa er ma shighe môm kpa se ôr kwagh sha zwanyohon ga yô, shi se er ma kwagh sha ikpam-ashe sha u keren mtsera wase ga; Aôndo ngu se shiada! 6 Shi se lu keren icivir hen ior ga, hen a ven shin hen mbagenev kpaa ga, shin er yange ma se yuhwa ne ikyav ser se mba mbaapostoli mba Kristu nahan kpaa. 7 Kpa se gema se lu eren kwagh a ven kundu kundu, er ngô ka nan naan ônov mba nan atumba, nan eren a ve kundu kundu* nahan. 8 Nahan er ne doo se ishima kpishi yô, se kange ishima u ôron ne loho u dedoo u Aôndo tseegh ga, kpa kua u nan ayol a ase* sha ci wen, gadia ne hingir mba doon se ishima tsung je.

9 Anmgbianev, ka keng ne umbur tom u yange se er kpoghuloo sha ican la. Se lu eren tom tugh man atetan, sha er se yuhwa mô wen ikyav zum u se lu pasen ne loho u dedoo u Aôndo la ga yô. 10 Ne mba se shiada, Aôndo kpaa, er yange se lu eren kwagh a ven, ne mbananjighjigh, sha mimi man sha perapera man a acôghor shio yô. 11 Ne fa dedoo er yange se lu wan ne kwagh shi surun ne asema shi taver hanmô wen ishima yô, vough er ter ka nan eren a ônov mba nan nahan, 12 sha er ne zenden sha gbenda u doon Aôndo, un u a lu yilan ne ken Tartor man iengem na la yô.

13 Jighilii yô, ka sha ci u kwagh ne kpa se mem u sughun Aôndo ga ye, sha ci u zum u ne ngohol loho u Aôndo u ne ungwa hen a vese la, ne lumun u ner ka mkaanem ma or ga, kpa ka mkaanem ma Aôndo, man kape i lu vough je la; shi ka u kpa u lu eren tom ken ne mbananjighjigh ye. 14 Gadia, anmgbianev, yange ne hingir mba eren kwagh er atôônanongo a Aôndo a ken Yudia a a lu ken mzough vea Kristu Yesu la nahan, sha ci u ne ya ican sha ikyev i ior mba ken tar wen, sha akaa a ve kpa ve lu yan ican sha mi sha ikyev i Mbayuda, 15 mba Ter Yesu je kpa yange ve wua kua uprofeti, shi ve tôv se a ican la. Heela tseegh ga, mba eren kwagh u doon Aôndo ga, kpa mba yangen ior cii kwagh u dedoo, 16 sha ci u ve soo ér i̱ yima ior mba ken akuraior agen ga, nahan mba nôngon ér vea yange se u lamen a ve. Sha nahan yô, hanma shighe ka ve seer a seer asorabo a ve ayol a ve. Kpa iyugh na va sha a ve hegen.

17 Kpa, anmgbianev, zum u i pav se a ven* sha anshighe kpuaa (sha iyol, lu ken asema a ase ga) la, se nôngo sha afatyô wase cii ser ma se zough ishigh a ven, sha ci u sar se tsung u nengen a ven. 18 Ka nahan ve yange se soo u van hen a ven ye, man mo Paulu je yô, m nôngo mer me va, kwa môm tseegh ga, kuma kwa har; kpa Satan yisa se gbenda. 19 Gadia ishimaverenkeghen yase shin iember yase shin iyua i nan se iember sha ishigh ki Ter wase Yesu sha shighe u una lu vea vese imôngo la yô, ka nyi? Jighilii yô, ka ne gaa? 20 Ka ne jighilii ne lu iengem man iember yase ye.