2 Mbakorinte
8 Nahan, anmgbianev, se soo ser fa nen kwagh u erdoo u sha mhôôn u Aôndo u i tese mba sha atôônanongo a ken Masedonia la. 2 Yange ve lu yan ican zum u ve tagher a imeen tsung yô. Kpa saan ve iyol kpishi shi ve na iyua mgbeghaa, shin er ve lu ken ibanave tsung nahan kpaa. 3 Gadia lu sha er tahav vev kuma la, man jighilii yô, me kaa mer yange hemba tahav vev ken inya je kpaa, 4 man lu ve ayol a ve je ve lu zamber a vese kpoghuloo ér ma ve zough a ian i nan iyua, sha er ve kpa vea na kwagh sha ci u tom u wasen uicighanmbaiorov la ye. 5 Man ve er kwagh ne je hemba er yange se ver ishima la, sha ci u ve hii nan Ter kua se kpaa ayol a ve, sha ishima i Aôndo. 6 Nahan se taver Titu ishima ser, er yange hii u eren tom u kohol iyua i ne lu nan saan saan la hen atô wen yô, shi a̱ er u a̱ kure. 7 Nahan kpa, ne mba a hanma kwagh mgbeghaa, er jighjigh u nan man tahav mbu ôron kwagh kua mfe man isharen i eren hanma kwagh sha gbashima nahan, shi ior doo ne ishima kpishi, er ne kpa ne doo se ishima nahan, yô, iyua kpa ma ne ne mgbeghaa.
8 Kwagh u m lu ôron ne, ka tindi m lu wan ne ga, kpa ka sha u fa nen isharen i mbagenev ve lu a mi i eren akaa cii sha gbashima la, man sha u karen fan aluer dooshima wen la ka u mimi yô. 9 Gadia ne fa erdoo u sha mhôôn u Ter wase Yesu Kristu tese la; yange lu yôughyôugh, kpa va hingir oribanave sha ci wen, sha u ne̱ hingir yôughyôugh sha ibanave na la.
10 Nahan, mnenge wam sha kwagh ne yô, ka un ne: Kwagh ne ka sha ci u iwasen yen, gadia yange ne due a mhen u kohol iyua la, inyom kar hegen, kpa saa heela ga, shi ne tese ner sar ne u eren nahan. 11 Sha nahan yô, shi er nen kwagh u yange ne hii u eren la kure nen, sha er kwagh u ne fetyô u nan er tahav enev mbu kom la una tese ér yange ne kegh iyol u nan yô. 12 Gadia or ka nana̱ hii keghen iyol u nan iyua yô, ka i̱ je Aôndo ka a ngohol ye, sha ci u ka a ver ishima ér or nana̱ na kwagh u nan lu a mi la, ka kwagh u nan lu a mi ga la ga. 13 Gadia m soo u heghem mbagenev ikyav, geman seer ne ikyav ga; 14 kpa ka sha u akaa a ne lu a mi hegen kpishi la ma a wase ve sha mbamgbe vev, shi ve kpa a ve lu a mi kpishi la ma a wase ne sha a ne ban a mi la, sha er ikyav mbia hemba yuhwan mbagen a mbagenev ga yô. 15 Ka vough er i nger nahan, ér: “Yange or a̱ kura kpishi kpa, nan lu a mi i ngee i gande ga, shi or a̱ kura kpuaa kpa, nan lu a mi i yina ga.”
16 Nahan i̱ wuese Aôndo er a ne Titu kpa a lu a gbashima sha kwagh wen er se nahan yô, 17 sha ci u, mimi je, a er kwagh sha ishimataver i a zough a mi la, kpa er i sar un kpishi u wasen yô, a tsua a ishima na u van hen a ven. 18 Kpa se mba tindin anmgbian ugen vea na, ka anmgbian u i lu wuese un sha kwagh u loho u dedoo sha atôônanongo cii yô. 19 Ka nahan tseegh ga, atôônanongo shi tsua un ér a zenden vea vese sha u van a iyua i i ne sar sar ne. Se mba karen iyua ne sha ci u icivir i Ter, man sha u tesen ser se kegh iyol u wasen. 20 Nahan se soo ser or môm nana zua se a mshi sha kwagh u iyua i i ne mgbeghaa, i se lu van a mi ne ga. 21 Gadia ka se ‘nôngon ser se er hanma kwagh sha mimi, sha ishigh ki Yehova* tseegh ga, kua sha ishigh ki iorough kpaa.’
22 Shi se mba tindin anmgbian wase ugen vea ve, ka anmgbian u se kar un acin imôngo shi se nenge ser ngu a gbashima sha akaa kpishi yô, kpa hemba ngun a gbashima hegen cii, sha ci u vangertiôr u a lu a mi ken a ven kpishi la. 23 Nahan kpa, aluer kwagh shi or sha kwagh u Titu yô, un zenden vea mo,* shi se mba eren tom imôngo sha ci u iwasen yen; shin aluer kwagh shi or sha kwagh u anmgbianev asev mba ve lu vea na mbara yô, mba mbaapostoli mba atôônanongo man iengem i Kristu. 24 Nahan tese nen ve ner ve doo ne ishima, shi tese nen atôônanongo a̱ nenge er i hii ve se kaa ihyagh sha kwagh wen yô.