1 Yohane
1 Se mba ngeren ne kwagh sha kwagh u un u sha hiihii je lu la, un u se ungwa iliam na, un u se nenge a na sha ashe ase, un u se kenger un shi se bende un ave iyol la—se mba ngeren ne washika sha kwagh u imo i uma, 2 (jighilii yô, yange i tese uma la ken igbar, nahan se nenge shi se mba eren shiada shi ôron ne kwagh u uma u tsôron shon u lu vea Ter, shi i va tese se un ken igbar la), 3 ka un u se nenge a na shi se ongo iliam na la, shi se lu ôron ne kwagh na ye, sha er ne kpa ne lu ken mzough* a vese imôngo yô. Man se mba ken mzough wase ne vea Ter man vea Wan na Yesu Kristu. 4 Shi se mba ngeren akaa ne sha er iember yase ia iv yô.
5 Ka loho u yange se ungwa hen a na je se lu yôôn hen a ven ne: Aôndo ka iwanger, ime cuku ngi ken a* na ga. 6 Aluer se kaa ser, “Se mba ken mzough vea na,” kpa se gema se mba zenden ken ime her yô, se mba eren aie shi se mba dondon mimi ga. 7 Nahan kpa, aluer se mba zenden ken iwanger er un iyol na a lu ken iwanger nahan yô, se cii se mba ken mzough, nahan awambe a Wan na Yesu aa kire isholibo yase kera cica cii.
8 Aluer se kaa ser, “Se mba a isholibo ga” yô, se mba tsughun ayol a ase shi mimi ngu ken a vese ga. 9 Aluer se pase asorabo a ase yô, un ka u jighjigh man u perapera, nahan una de se asorabo a ase shi una kire se hanma kwaghbo cii. 10 Aluer se kaa ser, “Se er isholibo ga” yô, se mba kaan ser a er aie, shi kwaghôron na ngu ken a vese ga.