Marku

13 Ngur duen ken tempel yô, orhenen na ugen va kaa a na ér: “Ortesen, nenge awen ne kua ayou ne cii a doo sha wono!” 2 Kpa Yesu kaa a na ér: “U nenge uzegembaayoughov mban ga̱? Awen ne cii, a va yôhôr a a haa inya. Iwen i môm kpa ia kera tema sha igen ga.”

3 Tsô a za tema sha Uwo u Olev hen ape lu nengen a tempel yô, maa Peteru kua Yakobu man Yohane man Anderia za va ve tseegh, ve va pine un ér: 4 “Ôr ase se yôô, ka hanma shighe akaa ne aa ere? Man ka nyi ia lu ikyav i tesen ér shighe u mkur u akaa ne cii zurumu?” 5 Tsô Yesu gba ôron a ve ér: “Ver nen ishima, or a de tsughun ne ga. 6 Ior kpishi vea va ken iti yam, vea lu kaan ér, ‘Ka mo m lu un ye,’ nahan vea tsugh ior kpishi. 7 Shi aluer ne va ungwa kwagh u ityav mbi nôngon sha ajiir kposo kposo kpa, i de cier ne iyol ga; akaa ne aa er keng, kpa mkur una lu a va ga.

8 “Gadia ikyurior igen ia mough ityav a ikyurior igen, shi tartor ugen ua mough ityav a tartor ugen; tar ua tenger sha ajiir kposo kposo; shi ijen ia gba sha ajiir wue wue. Akaa ne ka di mhii u ican* tsô.

9 “Kpa ne yô, wa nen ikyo sha ayol a en. Ior vea za a ven ken mbaatejir vev, a gbidye ne ken ushinagoge shi a za a ven sha ishigh ki ugomna man utor sha ikyaa yam, sha u i lu shiada hen a ve. 10 Shi a vande pasen loho u dedoo hen akuraior cii. 11 Nahan zum u i lu zan a ven hen atejir yô, ishima i de nyian ne sha kwagh u ne za ôr ga; kpa hanma kwagh u a na ne u ôron hen shighe* la cii yô, ôr nen, sha ci u ka ne ne lamen ga, kpa ka sha iwasen i icighan jijingi ne lamen ye. 12 Heela tseegh ga, or nana na anmgbian u nan ér i wua, ter kpaa nana na wan u nan, shi mbayev vea mough num a mbamaren, vea na a wua ve. 13 Shi ior cii vea kôr ne ihyom sha ci u iti yam. Kpa or u nan* taver ishima zan zan mkur la a yima nan.

14 “Nahan kpa, zum u ne nenge kwaghndôhôrshima u van a mtim una tile hen ijiir i ma a til ga la yô (or u ôron* nana ver ishima sha er nana kav yô), mba ve lu ken Yudia ve hii u yevese yemen sha iwo. 15 Or u nan lu sha ityough ki iyoughough* yô, nana̱ de hongo shin inya shin nana̱ de nyôron ken iyou ér nana tôô ma kwagh ga. 16 Shi or u nan lu ken ityev kpaa nana̱ de hidi ér nana va tôô ikyondo i nan i haan iyol ga. 17 Sha ayange la, kwagh a tser kasev mba ve lu iyav man mba ve lu a anikyundanev sha ave yô! 18 Eren nen msen kwagh ne a̱ de va eren sha shighe u wuhee* ga. 19 Gadia ayange la a lu ayange a ican, man a lu ican i Aôndo a gbe tar je i lu a er ga zan zan saa sha shighe la, shi mayange je ia kera er ga yô. 20 Jighilii yô, luun er Yehova* pande ayange la ga yô, or môm kpa ma i yima nan ga. Kpa sha ci u mba a tsough ve la yô, a pande ayange shon.

21 “Shi hen shighe la, aluer or kaa a ven ér, ‘Nenge! Kristu ngun,’ shin ‘Nenge! Ngula heela la,’ kpa de ne nen jighjigh ga. 22 Sha ci u Ukristu mbaaiev man uprofeti mbaaiev vea due vea er uivande man akaa a kpilighyol, sha u aluer ve fatyô yô, vea tsugh mba i tsough ve la yô. 23 Nahan yô, ver nen ishima. M tsenga ôron ne hanma kwagh.

24 “Kpa sha ayange la, ican la ia karen kera yô, ime ia wa, sha ci u iyange ia kera due ga, shi uwer kpa ua ta ga, 25 shi asan aa lu osough sha gban; shi akaa a a lu sha la aa tenger. 26 Maa vea nenge Wan u or una gba van sha abeen a sha kwavaôndo a tahav mbu kpilighyol man iengem. 27 Tsô una tindi mbatyomov vea kohol ior nav mba a tsough ken avegher a tar a anyiin la cii imôngo, a hii ken akighir a tar zan zan a ar sha akighir a kwavaôndo.

28 “Nahan yô, hen nen kwagh sha kwagh u kon u tur: Ka ua ta gbaa u he shi ikya ia hiin u hômon sha mi yô, ne fa je ner fam zurum. 29 Ne kpa zum u ne nenge akaa ne aa nguren eren yô, fa nen je ner ngu ikyua, sha ihinda je. 30 Mimi je me kaa ne, kov ne ua kar kera ga zan zan akaa ne cii aa kar eren. 31 Sha man tar vea kar kera, kpa kwaghôron wam yô, una kar kera mayange ga.

32 “Kpa iyange la shin ihwa la yô, or môm fa ga, mbatyomov mba shaav kpa fa ga, Wan kpa fa ga, ka Ter tseegh a fe ye. 33 Yô lu nen per, kuran nen, sha ci u ne fa shighe u i ver la ga. 34 Ka inja er or u a lu undun ya na yemen zende ken tar u icaa ve a ne ikpan na tahav, shi a ne hanma ve tom u nana er, maa a kaa a orkuranhunda ér a kuran nahan. 35 Nahan yô, kuran nen, sha ci u ne fa shighe u orya la a lu hiden ga, a̱ lu atetan shin ken atôutu shin a̱ zurum sha use* shin pepe pepe, kpa ne fa ga, 36 sha er a de hiden aburabur, a va kohol ne yaven ga yô. 37 Kpa kwagh u m ôr a ven ne, m ngu ôron ka ior cii, mer: Kuran nen.”