Mbaroma

10 Anmgbianev, kwagh u a sarem ken ishima shi m lu zamber Aôndo sha ci ve jighilii yô mer, ma i yima ve. 2 Gadia m ngu eren ve shiada mer, mba a gbashima sha kwagh u Aôndo, kpa gema mba a mfe u vough sha kwagh na ga. 3 Gadia ve fa perapera u Aôndo a lumun a mi la ga, gema mba keren u tesen perapera ve, ve lumun a perapera u Aôndo a soo la ga. 4 Gadia Atindi cii kure sha Kristu, sha er hanma or u nan ne un jighjigh cii, a nenge nan ér nan ngu orperapera yô.

5 Gadia Mose nger kwagh sha kwagh u perapera u a har sha Atindi a kuran la ér: “Or u nan eren akaa ne yô, nana lu uma sha a.” 6 Kpa sha kwagh u perapera u a har sha jighjigh u nan la yô, mkaanem ma Aôndo kaa ér: “De pinen ken ishima you wer, ‘Ka an nana kôndo sha?’ ga, ka u kôndon za van a Kristu je la, 7 shin de pinen wer, ‘Ka an nana sen shin ihyungwa i zan kweng laa?’ ga, ka u senen za duen a* Kristu shin ku je la.” 8 Kpa ma kaa ér nyi? Ma kaa ér: “Loho la ngu ikyua a we; ken zwa wou kua ken ishima you”; ka “loho” u i lu pasen sha u ior ve na jighjigh la je la. 9 Gadia aluer u pase sha zwa wou ken igbar wer Yesu ka Ter, shi u na jighjigh ken ishima you wer Aôndo nder un shin ku yô, a yima u. 10 Gadia ka ken ishima or ka nan na jighjigh ve nan hingir orperapera ye, kpa gema ka sha zwa or ka nan pase ken igbar sha u zuan a myom ye.

11 Ruamabera kaa ér: “Hanma or u nan ne un jighjigh cii yô, nana va ahenge ga.” 12 Gadia Oryuda ngu kposo a Orgrika ga. Ior cii mba a Ter môm, man un ne mba ve yilan sha iti na la cii akaa a dedoo kpishi. 13 Gadia “hanma or u nan yer sha iti i Yehova* yô, a yima nan.” 14 Nahan kpa, a er nan man vea yila sha iti na, aluer ve na un jighjigh ga yôô? Man a er nan ve vea na un jighjigh, un u ve lu a ungwa kwagh na ga laa? Shi a er nan vea ungwa, aluer or pase ve ga yôô? 15 Man a er nan ve vea pase kwagh, saa a tindi ve ga zee? Ka vough er i nger nahan, ér: “Angahar a mba yôôn loho u dedoo la doo tsô.”

16 Nahan kpa, ka ve cii ve ngohol loho u dedoo la ga. Gadia Yesaia kaa ér: “Yehova,* ka an nan ne jighjigh a kwagh u i ongo* hen a vese laa?” 17 Nahan ka i ungwa kwagh ve i na jighjigh a mi ye. Kwagh u ka i ungwa la di gema ka u ken loho u sha kwagh u Kristu. 18 Kpa m ngu pinen mer, Yange ve ungwa ga shinii? Jighilii yô, ve ungwa, gadia “imo la samber sha tar cii, shi i ungwa loho la sha akighir a tar je.” 19 Kpa m ngu pinen mer, Iserael yange fa ga shinii? Hiihii yô, Mose kaa ér: “Me na ne gba iyuhwe sha kwagh u ior mba ve lu ikyurior ga la; shi me na ishima ia vihi ne tsung sha kwagh u ikyurior i lanen kwagh.” 20 Kpa Yesaia ôr gbar gbar ér: “Mba yange ve kerem ga la gema zua a mo; mba yange ve pinen kwagh wam ga la hingir u fan mo.” 21 Kpa Iserael yô, a ôr kwagh na ér: “Ka m shi samber ave a am sha nongoior u hemban ato man u cighir ishima ayange ayange.”