Mbaroma

14 Ngohol or u jighjigh u nan a taver ga la, kpa de ôron or ijir* sha ci u mnenge u nan kaha a u wou ga.* 2 Or u jighjigh u nan a taver yô, ka nan ya akaa cii, kpa or u jighjigh u nan a taver ga yô, nan ye ikyaiue tseegh. 3 Or u nan ye akaa cii la nana̱ de puun or u nan ye ga la ga, shi or u nan ye ga la kpa, nana̱ de ôron or u nan ye la ijir ga, gadia Aôndo ngohol nan. 4 U ngu di nyi ve u ôron wanye u orgen ijiri? Aluer nan tile shin nan gba yô, ka orvesen u nan una kaa ye gaa? Jighilii yô, nana fatyô u tilen, Yehova* una wase nan nana tile.

5 Orgen ka nan nenge ér iyange igen hemba igen, orgen di nan nenge ér ayange cii nga kwaghmôm, nahan or môm nana̱ de te akperan ken ishima sha kwagh u nan ne jighjigh a mi la ga. 6 Or u nan ver ishima sha kwagh u iyange yô, nan ngu eren nahan sha ci u Yehova.* Shi or u nan lu yan ma kwagh kpaa, nan ngu yan un sha ci u Yehova,* gadia ka nan sugh Aôndo; man or u nan lu yan ma kwagh ga kpaa, nan ngu yan ga ka sha ci u Yehova,* shi ka nan sugh Aôndo. 7 Jighilii yô, or wase môm kpa nan lun uma sha ci u nan iyol i nan ga, shi or môm kpa nan kpen sha ci u nan iyol i nan ga. 8 Gadia aluer se mba uma yô, se mba uma ka sha ci u Yehova,* man aluer se kpe kpaa, se kpe ka sha ci u Yehova.* Nahan aluer se mba uma shin se kpe kpaa, se mba kwagh u Yehova.* 9 Ka sha ci u nahan Kristu yange kpe shi i nder un, a hide a lu uma ye, sha er una lu Ter u mbakpenev man u mbaumav cii yô.

10 Kpa er nan u ôron anmgbian wou ijiri? Shin er nan u puun anmgbian wouwe? Gadia se cii se va tile sha ishigh ki ikyônough ki ijirigh ki Aôndo. 11 Gadia i nger ér: “Yehova* ngu kaan ér, ‘Er m lu u uma ne, hanma inyu ia gure sha ishigh yagh, shi hanma nombor ua pase ken igbar er m lu Aôndo yô.’” 12 Sha nahan yô, hanma wase nana va ôr Aôndo kwagh u nan iyol i nan.

13 Nahan se de nen u ôron mbagenev ijir, se gema se kange ishima u eren kwagh u una tagher anmgbian shin una na nan gbeev mbu nôngon ga yô. 14 M fa, shi m na jighjigh ken Ter Yesu mer, sha gbaaôndo yô, hanma kwagh ngu wang, saa ape or nan nenge ér kwagh ngu wang ga ve, kwagh shon una lu nan kwagh u wang ga ye. 15 Aluer kwagh u ú yan la na anmgbian wou ishimavihin yô, u kera ngu zenden sha dooshima ga. De vihin jighjigh u nan u anmgbian wou u Kristu a kpe sha ci na la sha ci u kwaghyan wou ga. 16 Sha nahan yô, de ne wer i lam sha kwagh u dedoo u u eren la inja er ka kwagh u dang ga. 17 Gadia Tartor u Aôndo har sha kwaghyan man kwaghman ga, kpa u har ka sha kwagh u perapera man u bem man iember kua icighan jijingi. 18 Hanma or u nan shiren Kristu tom sha gbenda ne yô, Aôndo lumun nan, shi doo ior a nan.

19 Sha nahan yô, se nôngo nen tsung se eren nen akaa a van a bem man akaa a seer taver mbagenev asema. 20 De vihin tom u Aôndo sha ikyaa i kwaghyan ga. Ka mimi, akaa cii nga wang, kpa aluer ka u or a ya kwagh man kwagh shon una na orgen gbeev mbu nôngon yô, ka shami ga. 21 Doo u u ya inyam shin u ma wain shin u er nyityôkwagh i ia na anmgbian wou gbeev mbu nôngon ga. 22 Kwagh u u ne jighjigh a mi la, eren un sha ishigh ki Aôndo. Or u nan eren kwagh u nan lumun a mi, shi nan ne iyol i nan ibo sha mi ga la cii yô, saan nan iyol. 23 Kpa aluer nan ta akperan yô, nan ya ibo kera je ve, aluer nan ya kwagh shon yô, sha ci u nan ngu yan ka sha jighjigh u nan ga. Jighilii yô, hanma kwagh u a har sha jighjigh u nan ga cii, ka isholibo.