2 Mbakorinte

7 Nahan yô, ne mba doon mo ishima, er i er uityendezwa mban a vese yô, se kire nen hanma kwagh u hôngorough u sha iyol man u ken jijingi* ken a vese kera, se nôngo se hemba lun nen wang cii, er se lu mbacian Aôndo yô.

2 Ngohol nen se ken asema a en. Se er ma or kwaghbo ga, se vihi or môm kpaa ga, shi se tsugh or sha u keren mtsera wase ga. 3 M ngu ôron kwagh ne sha u nan ne ibo ga. Gadia m vande kaan je mer se mba a ven ken ishima, sea̱ lu uma shin sea̱ kpe kpaa. 4 Me fatyô u lamen a ven a ishima i gbar gbar. M ngu tan ihyagh kpishi sha kwagh wen. M zua a ishimasurun kpishi; ken ican yase cii kpa, m ngu ember tsung.

5 Jighilii yô, zum u se va nyôr ken Masedonia la, se zua a mmem ken ayol a ase ga, kpa se za hemen u yan ican sha hanma gbenda cii—ken won lu ayôôso, kimi di lu mciem. 6 Kpa Aôndo u a surun mba ve zungwen la asema la, yange sur se ishima zum u Titu va kohol se yô; 7 man lu sha mve na la tseegh ga, kpa kua sha ishimasurun i zua a mi sha kwagh wen la kpaa. Gadia yange hide va ôr se er i sar ne tsung u nengen a mo, man er ne ure kpishi, shi ishima i ze ne iyol tsung sha kwagh wam* yô; nahan hemba saan mo iyol cii.

8 Gadia aluer washika u yange m nger ne la na ne ijungwen je kpa, m vaa afanyô sha mi ga. Aluer yange mea vaa afanyô sha mi sha hiihii je kpa, (er m nenge mer washika la na ne ijungwen, shin er i lu sha anshighe kpuaa nahan kpa), 9 hegen yô, m ngu ember, ka sha ci u yange ne zungwe tseegh tsô ga, kpa ka sha ci u ijungwen yen la na ne gema ishima. Gadia yange ne zungwe sha gbenda u doon Aôndo, nahan se na ma kwagh saa ne ga. 10 Gadia or ka nana̱ zungwe sha gbenda u doon Aôndo yô, kwagh la a na nan gema ishima, nahan nan zua a myom, nan kera vaa afanyô ga; kpa or ka nana̱ zungwe sha inja i taregh yô, nan zua a ku. 11 Gadia nenge nen er ne zungwe sha gbenda u doon Aôndo ve ne lu sha wono: ne mba a gbashima tsung, ne mba sôron iti yen, ishima vihi ne, shi ne mba a mciem, ne mba a isharen tsung, ne mba a ishima i tseen, shi ne mba sôron kwagh u ne er shami ga yô! Ne tese sha hanma gbenda cii ner ne mba wang sha kwagh ne. 12 Shin er yange m nger ne washika nahan kpa, m nger lu sha ci u or u nan er kwaghbo la ga, shi lu sha ci u or u i er nan kwaghbo la kpaa ga, kpa lu sha u gbashima u ne lu a mi sha kwagh wase la a̱ due ken igbar hen atô wen sha ishigh ki Aôndo. 13 Ka nahan ve se zough a ishimasurun ye.

Kpa dugh ishimasurun yase kera yô, se seer zuan a iember sha ci u iember i Titu la, gadia ne cii yange ne taver un ishima. 14 Gadia aluer m kaa ihyagh a na sha kwagh wen kpa, m hee ga; kpa, er akaa a yange se ôr ne la cii lu akaa a mimi nahan, kape ihyagh i se lu kaan a Titu la kpa i lu mimi je la. 15 Heela tseegh ga, ka una umbur er ne cii ne lu mbaungwan kwagh, man er yange ne ngohol un a mciem man ikyarkyase iyol yô, ne hemba doon un ishima cii. 16 Saan mo iyol kpishi er i lu u me fatyô u lun a vangertiôr ken a ven* sha hanma gbenda cii yô.