Mpase

7 Kwagh ne eren kera yô, m nenge mbatyomov unyiin tile sha azongo* a tar a anyiin la, ve kôr ahumbe a ken avegher a tar a anyiin la gbang gbang, sha u a̱ de te sha tar shin sha zegemnger shin sha ma kon ga yô. 2 Tsô m nenge ortyom ugen mough vegher u iyange ka i due la* lu kôndon sha, lu a ikyav i Aôndo u uma; a gba yilan mbatyomov mba unyiin mba i na ve ian i vihin tar kua zegemnger la genger genger, 3 kaan ér: “De vihin nen tar* shin zegemnger shin ikyon ga, zan zan se kar veren ikpan i Aôndo wase ikyav sha atsul a ve been.”

4 Nahan m ungwa iyenge i mba i ver ve ikyav la, lu iorov 144,000; i ver ve ikyav ken hanma ipyaven i ônov mba Iserael cii.

5 Ken ipyaven i Yuda, i ver iorov 12,000 ikyav;

ken ipyaven i Ruben lu iorov 12,000;

ken ipyaven i Gadi lu iorov 12,000;

6 ken ipyaven i Asher lu iorov 12,000;

ken ipyaven i Nafetali lu iorov 12,000;

ken ipyaven i Manase lu iorov 12,000;

7 ken ipyaven i Shimion lu iorov 12,000;

ken ipyaven i Levi lu iorov 12,000;

ken ipyaven i Isakar lu iorov 12,000;

8 ken ipyaven i Sebulon lu iorov 12,000;

ken ipyaven i Yosev lu iorov 12,000;

ken ipyaven i Benyamin, i ver iorov 12,000 ikyav.

9 Kwagh ne eren kera, m kenger yô, nenge! zegeikpelaior, i̱ ma or fatyô u ôron iyenge ve ga, i̱ mba ve due ken hanma ikyurior man hanma ipyaven man hanma nongoior man hanma zwa yô, tile sha ishigh ki ikyônough ki torough kira kua sha ishigh ki Waniyôngo, ve hua akondo a pupuu a lun elemeen; shi ve kôr andar a ivilegh ken ave. 10 Ve lu ôron genger genger ér: “Myom ka hen Aôndo wase a dugh ye, un u a tem sha ikyônough ki torough la, kua hen Waniyôngo.”

11 Mbatyomov cii tile kase ikyônough ki torough kira kua mbatamen mbara man akaauma a anyiin la, ve gba ve cir ishigh inya hen ishigh ki ikyônough ki torough kira, ve gba civir Aôndo, 12 kaan ér: “Amen! Iwuese man iengem man kwaghfan man ishughun man icivir man tahav man agee cii, i̱ lu akaa a Aôndo wase zan zan gbem sha won. Amen.”

13 Tsô môm ken mbatamen mbara gema pinem ér: “Mba ve hua akondo a pupuu a lun elemeen ne ka unô, man ve due hana?” 14 Maa her je m kaa a na mer: “Terem, ka we u fe ye.” Tsô a kaa a mo ér: “Mban ka mba ve due ken zegecan kera yô, ve ôô akondo a ve sha awambe a Waniyôngo la, a hingir pupuu. 15 Ka nahan man ve til sha ishigh ki ikyônough ki torough ki Aôndo ye, mba eren un icighantom ken tempel na atetan man tugh; nahan Un u a tem sha ikyônough ki torough la una samber tenti na sha a ve. 16 Ijen ia kera kôr ve ga, shi imura kpa ia kera kôr ve ga, shi oo ua kera ta ve ga, shi a kera tsee ve iyol ga, 17 sha ci u Waniyôngo, un u a lu hen atô* vea ikyônough ki torough la, una kura ve shi una hemen ve a za a ve hen ihwembe i* mngerem ma uma. Aôndo una ese ve mliam cii sha ashe kera.”