Luka

12 Hen shighe la, ikpelaior kohol udubu imôngo je i lu ndyaren mbagenev, tsô a gba kaan a mbahenen nav ér: “Wa nen ikyo sha kwa u Mbafarishi, ka atseregh je la. 2 Kpa ma kwagh u i yer kpile kpile, u a va pase un ken igbar ga je kpa ngu ga. Shi kwaghmyer môm u a va fa un ga je kpa ngu ga. 3 Sha nahan yô, nyityôkwagh i ne ôr ken ime cii, a ungwa ken iwanger. Shi kwagh u ne ôr ivarvase ken ayou a en kpaa, a pase sha ityouv mbi iyoughouv je. 4 Nahan kpa, azende a am, me kaa ne, de cian nen mba ka ve wua iyol tseegh, kpa ve gema ve kanshio u eren kwagh hemban nahan la ga. 5 Kpa me tese ne or u ne cia yô: Cia nen Un u ka a wua iyol, shi a lu a tahav mbu kenden ken Gehena* la. Me kaa ne, ka Un cia nen ye. 6 Ka i tee mbaatsator utaan sha an-inyar u cuku u agbenger ahar* gaa? Nahan kpa Aôndo hungur mô ve môm ga. 7 Shi ice yen i sha ityou je kpa a fa iyenge i i cii. De cian nen ga; ne gba kwagh hemba mbaatsator imôngo.

8 “Me kaa ne, hanma or u nan pasen kwagh wam sha ishigh ki iorough yô, Wan u or kpa una pase kwagh u nan sha ishigh ki mbatyomov mba Aôndo. 9 Kpa or u nan vendam sha ishigh ki iorough yô, a venda nan sha ishigh ki mbatyomov mba Aôndo. 10 Shi hanma or u nana ôr kwagh sha Wan u or dang yô, a de nan isholibo la, kpa or u nan laha icighan jijingi yô, a de nan isholibo la ga. 11 Shighe u i ze a ven hen mkohol u ior cii shin hen mbatomov mba gomoti shin hen mbautahav yô, ishima i de nyian ne sha kwagh u ne ôr man er ne ôr kwagh shon sha u palegh iyol yen la ga, 12 sha ci u hen shighe* la je, icighan jijingi una tese ne kwagh u ne ôr yô.”

13 Tsô orgen ken ikpelaior la kaa a na ér: “Ortesen, ôr anmgbian wam a kar dyako vea mo.” 14 Yesu gema kaa a na ér: “Nomsoor, ka an nan verem orjir shin or u karen ne kwara?” 15 Maa a kaa a ve ér: “Wa nen ikyo shi kura nen ayol a en sha hanma inja hua cii, sha ci u aluer or ngu a kwagh kpishi je kpa, ka akaa a nan lu a mi la a ne nan uma ga.” 16 Tsô a ôr ve injakwagh igen, a kaa ér: “Sule u ornyar ugen yange u doo tsung. 17 Nahan a gba kaan ken ishima na ér, ‘Man me er nan hegen er m lu a ijiir i ombon iyiav ga nee?’ 18 Maa a kaa ér, ‘M fa kwagh u me er kpaa: Me hembe ayou am a koson iyiav la, me hide me maa a kehen hemban a, nahan me kohol iyiav yav kua ikyav yav cii me ombo ker. 19 Maa me kaa a iyol yam mer: “U koso akaa a doon kpishi a aa tsa anyom imôngo yô; de ze iyol you iyol ga, ya kwagh, ma kwagh, i saan we iyol.”’ 20 Kpa Aôndo kaa a na ér, ‘We ibumeor ne, mba keren we* a ku hen tugh mbun je. Nahan ka an nana tôô akaa a u koso laa?’ 21 Kape kwagh u or u nan koso akaa sha ci u nan, kpa nan lu ornyar sha ishigh ki Aôndo ga la una za je la.”

22 Maa a kaa a mbahenen nav ér: “Ka sha nahan man m lu ôron ne ye, mer, ishima i de u nyian ne sha ci u uma wen, sha kwagh u ne ya shin sha kwagh u ne ma la. Shi ishima i de u nyian ne sha ci u iyol yen, sha kwagh u ne zer la. 23 Sha ci u uma hemba kwaghyan, shi iyol kpa hemba ikyondo. 24 Hen ase nen sha kwagh u ugugôô: Mba lôôn iyiav shin mba sundan ga, shi mba a una shin iyou i koson akaa ga, kpa Aôndo koson ve. Ne hemba gban kwagh a inyon ica je gaa? 25 Ka an ken a ven sha ishimanyian i nan la, nana fatyô u seer miniti môm* sha ayange a uma u nana? 26 Nahan aluer ka u ne fatyô u eren ankwagh u cuku ngun kpaa ga yô, er nan ve ishima i lu nyian ne sha akaa agen laa? 27 Nenge nen er ufaluwa ka ve vese yô: Mba eren tom ga, shi mba te mou kpaa ga. Kpa me kaa ne, Solomon a iengem na cii je kpa, mayange i wuha un iyol er mô ve nahan ga. 28 Aluer imendenev mbi ken toho mbi ka mbi lu uma nyian, kper i kende mbi ken usu la je kpa, Aôndo ngu wuhan mbi iyol nahan yô, una hemba wuhan ne iyol cii! Jighjigh wen u nan vese ga tsôô! 29 Nahan de nen u keren kwagh u ne ya kua kwagh u ne ma yô, shi ishima i de u nyian ne kpishi. 30 Akaa ne cii ka akaa a akuraior a tar ne a* lu keren sha gbashima yô. Ter wen fa er kwagh a gbe ne a akaa ne yô. 31 Kpa gema za nen hemen u keren Tartor na, tsô a seer ne akaa ne.

32 “De cie nen ga, ne ankyumile u kpuaa, sha ci u Ter wen lumun u nan ne Tartor la. 33 Tee nen akaa a en gema er nen mbaatsanev iyua. Kor nen akpa a inyar a a ye tsegh ga la, ka kwagh u injaa u been mayange ga u a lu sha, ape ormbaiv nan ze ikyua ga shi ivina kpa i vihin ga yô. 34 Gadia ape kwagh u injaa wen a lu la, ka her asema a en kpa aa lu ye.

35 “Wa nen iyol keghen nen a kegh,* shi tsar nen amenger a en ver nen a ver. 36 Lu nen er ior mba ve lu keghen shighe u orvesen ve una hide iniongo i ivesegh nahan, sha er una hide a va mande uwegh kwa môm je maa vea bugh un yô. 37 A saan ikpan i orvesen la a hidi a va kohol i kuran la iyol! Mimi je me kaa ne, una hua ikyondo i tom, una kaa ve vea tema hen tebul, maa una due ve a iwer. 38 Man aluer a za va ahwa ataankaranyiin utu shin ahwa atar sha use je kpa, una kohol ve keghen yô, a saan ve iyol! 39 Kpa fa nen kwagh ne: Aluer orya fa ihwa i ormbaiv nana va yô, orya la nana de ér i va pev nan iyou i nyôr ga. 40 Ne kpaa wa nen iyol keghen nen a kegh, gadia ka hen ihwa i ne ver ishima ga la je, Wan u or una va ye.”

41 Tsô Peteru pine ér: “Tere, ka se tseegh u lu ôron se injakwagh ne yee, shin u ngu ôron ka ior ciili?” 42 Ter gema kaa ér: “Ka an jighilii nan lu or u nengen sha ya, u jighjigh man u fan kwagh, u orvesen u nan una wa nan mbashirentom* mba hen ya na cii sha ikyev, ér nana̱ naan ve kwaghyan ve sha shighe voughlo? 43 A saan wanakiriki* la iyol, aluer orvesen u nan hide va kohol nan u eren nahan yô! 44 Mimi je me kaa ne, orvesen la una gema akaa a na cii una wa nan sha ikyev. 45 Kpa aluer wanakiriki la nana kaa ken ishima i nan ér, ‘Orvesen wam timbir u van yum,’ maa nana hii u gbidyen mbashirentom mba nomso man mba kasev, yan kwagh shi man kwagh je hunden yô, 46 orvesen u wanakiriki la una za hide sha iyange i a ver ishima ga yô, shi a lu hen ihwa i a fe ga yô, nahan una tsaha un je a doo ato ga,* una ver un ape mba mimi ga ve lu la. 47 Nahan wanakiriki u a fe ishima i orvesen na, kpa a we iyol a lu keghen a kegh ga shin a er kwagh u i kaa un la ga yô, a gbidye un mbaakpa kpishi. 48 Kpa u a fe ishima i orvesen na ga, kpa a er akaa a a kom gbidiv yô, á gbidye un mbaakpa kpuaa. Jighilii yô, hanma or u i ne nan kwagh kpishi yô, a pine kwagh hen a nan kpishi; u i we nan akaa sha ikyev kpishi kpaa, a hemba pinen kwagh hen a nan.

49 “M va sha u va nanden usu shin tar, man aluer u vande yeghen kera yô, ka nyi shi m kerene? 50 Jighilii yô, batisema ngu u i gbe u a erem yô, man ishima ia zam iyol zan zan a kar eren mo un! 51 Ne hen ner m va ka u me va na bem a lu sha tara? Ei, me kaa ne, ka bem ga, kpa ka mpav. 52 Hii hegen zan zan, mpav una lu hen tsombor. Aluer iorov utaan mba hen tsombor yô, mba utar vea zuan vea mba uhar ga, mba uhar di kpaa vea zuan vea mba utar ga. 53 Mpav una lu hen atô ve, ter nana pav a wan u nan u nomso, wan u nomso di a ter u nan, ngô a wan u nan u kwase, wan u kwase di a ngô u nan. Ngô nana pav a kwase u wan u nan, kwase di a ngô u nom u nan.”

54 Shi a kaa a ikpelaior la ér: “Ka nea nenge ibyeenegh ki ilen kia mough vegher u shin ityôtar kia vaan yô, fese je ne kaa ner, ‘uraahumbe ngu van,’ shi i lu di nahan. 55 Shi ka nea nenge ahumbe a ken imbusutariyan aa karen yô, ne kaa ner, ‘A va tsee iyol,’ shi i lu di nahan. 56 Ne mbawanatseregh, ne fa u tôvon sha mluashe u tar kua kwavaôndo, kpa er nan ne fe u tôvon fan shighe u ne lu ker ne ga? 57 Shi er nan ve ne tôv ne fe kwagh u a lu u perapera la iyol yen ga? 58 U tesen ikyav yô, shighe u or nan lu zan vea we u za yilan we ijir hen ma orhemen yô, nôngo sôr zayol la vea nan sha gbenda je, sha er nana za kar a yem a we hen orjir, orjir la di nana gema u nana na orwasen nan tom, orwasen nan tom la di nana za wuhe u ken purusu ga yô. 59 Me kaa u, u due ken purusu la ga zan zan u kimbi inyaregh kira cica cii, u kera shi a kwagh ga.”*