1 Timoteu

6 Mba i ker ve ikpan yô ve̱ za hemen u nan mbavesen vev icivir a ishima i môm, sha er a laha iti i Aôndo kua ityesen ne ga yô. 2 Shi mba ve lu sha ikyev i mbavesen mba ve lu mbananjighjigh la kpa ve̱ de taver ve ityough sha ci u ka anmgbianev yum ga, kpa ve̱ hemban eren ve tom sha gbashima cii, gadia tom ve u dedoo la ngu wasen ka mbananjighjigh man mba doon ve ishima.

Za hemen u tesen akaa ne shi wan ior kwagh sha a. 3 Aluer ma or ngu samber a ityesen igen kposo, man i zua sha ityesen i wang* i i dugh hen Ter Yesu Kristu la ga, shin i zua sha ityesen i sha kwagh u civir Aôndo kpaa ga yô, 4 nan ngu or u moron iyol shi nan fa kwagh môm ga. Nan ngu or u sendegh ayôôso shi gban anyiman sha asemberakaa. Akaa ne nga a va a iyuhwe man ayôôso man iti i vihin ior* kua u hunan ior sha ifer, 5 shi nga a na ior ve zer eren ayôôso sha akaa a kiriki gbem, ka ior mba mhen ve a vihi shi ve te mimi kera je la. Ka ve henen ér u civir Aôndo ka gbenda u zuan a mtsera. 6 Jighilii yô, aluer or ngu civir Aôndo man kwagh u nan lu a mi la kuma nan yô, nana zua a mbamtsera kpishi. 7 Gadia se va a kwagh môm ken tar ne ga, shi se fatyô u tôôn kwagh ken u yemen a mi kpaa ga. 8 Nahan aluer se mba a kwaghyan* man akondo* yô, akaa ne aa kuma se.

9 Kpa mba i hange ve u lun mbanyarev yô, ka ve gba ken imeen man kwaghhônon kua ken asaren a ibume man a bo, a ka a nyôr a ior ken mtim man ku la. 10 Gadia ieren i soon inyaregh la ka mise u hanma kwagh u vihin cii, nahan er i hange mbagenev tsung u zuan a ki yô, i tsume a ve ve undu atesen a ve ne jighjigh a mi la, ve hingir u nyôron ken* atsan kpishi.

11 Nahan yô, we or u Aôndo, yevese akaa ne. Kpa gema nôngon kpoghuloo eren kwagh u perapera shi civir Aôndo shi lu a jighjigh u nan, shi tesen dooshima shi waan ishima shi lu ishima legh legh. 12 Nôngo ityav mbi dedoo mbi sha kwagh u jighjigh u nan, kôr ave gbang sha uma u tsôron u yange i yila u sha mi la; uma u u pase kwagh na doo doo ken igbar sha ishigh ki mbashiada kpishi la.

13 M ngu kaan a we sha ishigh ki Aôndo u a kuran akaa cii sha u a̱ za hemen u lun uma la, man sha ishigh ki Yesu Kristu u yange er shiada u dedoo ken igbar sha ishigh ki Pontiu Pilatu la mer, 14 kuran tindi ne sha gbenda u wang, man sha gbenda u u zua a iti i bo* ga yô, zan zan Ter Yesu Kristu una kar duen ken igbar, 15 ka Ter u sar sar, u a lu U Ageegh tswen la; una tese iyol na ken igbar sha shighe u i ver la. Un ka Tor u utor, man Ter u uter, 16 u i lu un tswen i lu u una kpe mayange ga la; ngu ken iwanger i or a fatyô u mgbôghom a i ga yô, un u or môm nan lu a nenge a na ga, shi i lu u or a fatyô u nengen a na kpaa ga la. Icivir i̱ lu i na kua agee a tsôron. Amen.

17 Wa mba ve lu mbanyarev ken tar* u ainge ne kwagh wer, ve̱ de lu mbawan imanger* ga, shi ve̱ de veren ishima ve sha inyaregh ki ica ka i gba ga tsô ki kar kera ne ga, kpa ve ver ishima sha Aôndo u a nan se akaa cii mgbeghaa, sha ugbayol asev la. 18 Kaa ve ve̱ eren kwagh u dedoo, ve̱ lu mbanyarev sha kwagh u ityom i dedoo, ve̱ naan kwagh mgbeghaa, ve̱ keghen a kegh iyol u nan mbagenev kwagh, 19 nahan vea lu wan imaagh ki dedoo sha ci u mlu ve u ken hemen, sha er vea kôr ave gbang sha uma u a lu uma jim jim la yô.

20 Timoteu, kura kwagh u i we u sha ikyev la, gema palegh alam a gbilinigh a a hendan a icighankwagh la, kua anyimanakaa a ior ve kaan ér ka “mfe,” kpa a hendan a kwagh u mimi la. 21 Mbagenev dondo imba mfe la maa ve undu ityesen i ve ne jighjigh a mi la.

Yô, Aôndo a̱ za hemen u tesen we erdoo u sha mhôôn.