2 Mbatesalonika

3 U masen yô, anmgbianev, za nen hemen u eren msen sha ci wase, sha er loho u Yehova* ua za hemen u samber fele fele shi a lu ngohol u sha icivir, vough er hen a ven kpa i lu nahan, 2 man sha er a yima se sha ikyev i ubombaiorov man mbaaferev yô, gadia ka ior cii ve lu a jighjigh u nan ga. 3 Kpa Ter ka u jighjigh, una na ne agee shi una kura ne sha ikyev i Iferor. 4 Heela tseegh ga, se mba a vangertiôr ken Ter sha kwagh wen, ser ne mba dondon akaawan a ase, shi ne za hemen u dondon a kpaa. 5 Ter a̱ za hemen u kôôm asema a en doo doo sha er Aôndo una doo ne ishima shi ne lu a ishimawan sha ci u Kristu yô.

6 Anmgbianev, se mba wan ne kwagh ken iti i Ter wase Yesu Kristu ser, hanma anmgbian u nan lu zenden nzughul nzughul, i lu sha ityesen i yange ne* ngohol hen a vese la ga cii yô, de kera luun nen vea nan imôngo ga. 7 Gadia ne ayol a en ne fa kwagh u i gbe u ne eren sha u dondon ikyav yase yô, sha ci u yange se eren kwagh hen atô wen nzughul nzughul ga, 8 shi se ya or kwaghyan gbilin* kpaa ga. Kpa se lu eren tom kpoghuloo sha ican tugh man atetan sha er se yuhwa or wen môm ikyav ga yô. 9 U ngu wer yange se lu a tahav ga ze, kpa se soo ser se na ayol a ase sha u se ver ne ikyav i ne dondo yô. 10 Jighilii yô, shighe u se lu vea ven la, se lu ôron ne kwagh ne var var, ser: “Aluer or soo u eren tom ga yô, kwaghyan kpa nana̱ de ye ga.” 11 Gadia se ungwa ser mbagenev ken a ven mba zenden nzughul nzughul, tom môm kpa mba eren ga, kpa ka ve waan ave sha akaa a a lu a ve ga yô. 12 Se mba kaan a ambaaior la shi wan a kwagh ken Ter Yesu Kristu ser, ve eren tom, ve̱ de keren u wan ave sha akaa a ior ga, shi ve̱ yaan kwaghyan u sha tom u ve er yô.

13 Ne yô, anmgbianev, de gbe nen uwer u eren kwagh u dedoo ga. 14 Kpa aluer ma or wa kwagh u se ôr ken washika ne ikyo ga yô, ver nen nan ikyav shi de nen u lun vea nan imôngo, sha er kunya ua kôr nan a iyol i nan yô. 15 Nahan kpa, de nengen nen nan ner nan ngu orhyom ga, kpa za nen hemen u wan nan kwagh sha inja i anmgbian.

16 Yô, Ter u bem a̱ za hemen u nan ne bem hanma shighe cii man sha hanma gbenda cii. Ter a̱ za hemen u lun a ven cii.

17 Mo Paulu, m ngu ngeren ishughun yam sha uwegh agh. Ka ikyav i hanma washika wam; kape ka m nger kwagh je ne.

18 Ter wase Yesu Kristu a za hemen u tesen ne cii erdoo u sha mhôôn.