1 Yohane

3 Nenge imba dooshima u Ter a tese se sha u i yilan se ér ônov nav ne sha wono! Man ka kwagh u se lu je la. Ka nahan ve tar u fe se ga ye, sha ci u ú fa un ga. 2 Ne mba doon mo ishima, hegen se mba ônov mba Aôndo, kpa mba a̱ pase kwagh u se va lu la ve ga. Kpa se fa ser shighe u una va tese iyol na ken igbar la, se lu er un nahan, sha ci u se va nenge a na kpôô kpôô. 3 Sha nahan yô, hanma or u nan lu a ishimaverenkeghen ne ken a na cii yô, nan hingir wang, vough er un shon la a lu wang nahan.

4 Hanma or u nan ze hemen u eren isholibo cii yô, nan ngu peren tindi, sha ci u isholibo ka tindi u peren. 5 Shi ne fa er yange i tese un ken igbar sha u a tôô asorabo a ase kera yô, man isholibo ngi ken a na ga. 6 Hanma or u nan lu ken mzough vea na her cii yô, nan ze hemen u eren isholibo ga; or u nan ze hemen u eren isholibo cii yô, nan nenge a na ga shi nan fa un ga. 7 Mbayev av, or a de tsumen a ven ga; or u nan ze hemen u eren perapera cii yô, nan ngu orperapera, vough er un shon la a lu u perapera nahan. 8 Or u nan ze hemen u eren isholibo yô, ka ken Diabolo nan dugh ye, sha ci u Diabolo ndera eren isholibo sha hiihii* je. Gadia ka sha ci u kwagh ne je i tese Wan u Aôndo ken igbar sha u a vihi ityom i Diabolo kera ye.

9 Hanma or u Aôndo a mar nan yô, nan ze hemen u eren isholibo ga, gadia vor* Na ngu ken imbaor la, nahan nana za hemen u eren isholibo ga, sha ci u ka Aôndo a mar nan ye. 10 Ka kwagh u a ne i fe mkposo u ônov mba Aôndo a ônov mba Diabolo je ne: Or u nan eren perapera ga yô, nan due hen Aôndo ga, shi or u anmgbian u nan a doo nan ishima ga la kpa nan due hen a na ga. 11 Gadia ka loho u yange ne ungwa sha hiihii la je ne, ér mbagenev ve doo se ishima. 12 Se lu er Kain, u yange due hen Iferor, nahan ta num sha anmgbian na wua un la nahan ga. Man lu nyi i na ve wua unu? Lu sha ci u ityom na lu i ifer, kpa i anmgbian na la lu i perapera.

13 Anmgbianev, i de kpiligh ne iyol er tar u ker ne ihyom ga. 14 Se fa er yange se lu kpenegh kpa hegen se lu uma yô, sha ci u anmgbianev asev doo se ishima. Or u nan lu a dooshima ga yô, nan ngu kpenegh her. 15 Hanma or u nan ker anmgbian u nan ihyom yô, nan ngu orwuanor, man ne fa er i lu u orwuanor môm nana zua a uma u tsôron ga yô. 16 Ka sha kwagh ne se fe kwagh u a lu dooshima ye, sha ci u un shon la yange lumun u kpen* sha ci wase, nahan gba u se kpa se lumun u kpen* sha ci u anmgbianev asev. 17 Kpa or u nan lu a akaa a iyolough a tar ne man nan nenge anmgbian u nan a lu ken ibanave kpa nan vende u zungwen un mhôônom yô, Aôndo doo nan ishima her sha nyi gbenda? 18 Mbayev av, se tesen nen dooshima sha kwaghôron shin sha zwa* tsô ga, kpa i lu sha ieren man sha mimi.

19 Kwagh ne una na se fa er se lu ken mimi yô, shi ishima ia lu se ker gbar gbar* sha ishigh nagh 20 sha hanma kwagh u ishima ia na se ibo sha mi cii, sha ci u Aôndo hemba ishima yase, shi a fa akaa cii. 21 Ne mba doon mo ishima, aluer ishima ngi nan se ibo ga yô, se fatyô u ôron kwagh a ishima i gbar gbar sha ishigh ki Aôndo; 22 shi nyityôkwagh i se sen cii, ka a na se, sha ci u se mba kuran atindi a na shi eren kwagh u dedoo sha ishigh nagh. 23 Jighilii yô, ka tindi na shon je ne: ér se̱ na jighjigh ken iti i Wan na Yesu Kristu, shi se̱ doo ayol a ase, vough er un shon la* yange wa se tindi nahan. 24 Heela tseegh ga, or u nan kuran atindi a na yô, nan ngu ken mzough vea na her, shi un kpa ngu ken mzough vea imbaor la. Man ka sha jijingi u a ne se la ka se fa ser se mba ken mzough vea na her ye.