2 Mbatesalonika

1 Mo Paulu, m ngu vea Sivanu* man Timoteu, m ngu ngeren hen tiônnongo u Mbatesalonika u a lu ken mzough vea Aôndo Ter wase man Ter Yesu Kristu la:

2 Aôndo Ter man Ter Yesu Kristu ve̱ tese ne erdoo u sha mhôôn shi ve̱ na ne bem.

3 Gba u se sughun Aôndo sha kwagh wen hanma shighe cii, anmgbianev. Doo u se er nahan, sha ci u jighjigh u nan wen ngu hemban seer a seer shi dooshima u hanma wen nan lu tesen hanma or hen atô wen la ngu seer a seer. 4 Kwagh ne na yô, se ayol a ase se mba kaan ihyagh sha kwagh wen a atôônanongo a Aôndo, sha ci u ne mba wan ishima shi ne tile sha jighjigh u nan wen, shin er i lu tôvon ne a ican shi ne lu tagher a mbamtaver* nahan kpaa. 5 Kwagh ne tese er ijirôron i Aôndo i lu i perapera yô, man ka nahan je i nenge ne ér ne kuma u yan dyako u Tartor u Aôndo, ú u lu ityôkyaa jighilii i ne lu yan ican la ye.

6 Kwagh ne tese ér Aôndo nenge ka un kwagh u perapera u van a ican sha mbara mba ve lu eren ne ican la. 7 Kpa ne mba ne lu yan ican la yô, a nyôr a ven ken mmem a vese imôngo shighe u Ter Yesu una ande sha vea mbatyomov nav mba ageev 8 ken nomborusu, zum u una va a iyev i oron sha mbafan Aôndo ga man mba ve we loho u dedoo u sha kwagh u Ter wase Yesu ikyo ga la. 9 A tsaha ve mban sha mtim u tsôron, a kar a ve sha ishigh ki Ter man iengem i agee a na kera 10 sha shighe u una va u ngohol iengem sha kwagh u uicighanmbaiorov nav man sha u mba ve ne un jighjigh la ve̱ nenge i kpiligh ve iyol yô, sha ci u ne na shiada u se er hen a ven la jighjigh.

11 Ka sha ityôkyaa ne jim je ka se eren msen sha ci wen hanma shighe ye, ser Aôndo wase ma a ne ma ne kuma sha kwagh u yange i yila ne la, shi ma a er hanma kwagh u dedoo u a nenge i doo un cii sha tahav nav ma a kure vough, kua hanma tom u jighjigh u nan wen a mgbegha ne u eren la. 12 Kwagh ne ngu nahan sha er iti i Ter wase Yesu ia zua a icivir ken a ven shi ne kpa ne zua a icivir ken mzough vea na, sha erdoo u sha mhôôn u Aôndo wase man u Ter Yesu Kristu yô.