2 Timoteu

1 Mo Paulu, i yilam ér m lu apostoli u Kristu Yesu sha ishima i Aôndo, sha kwagh u ityendezwa i uma u ka i zua a mi ken Kristu Yesu la, 2 m ngu ngeren hen Timoteu, wan wam u ishima ishima:

Aôndo Ter man Kristu Yesu Ter wase ve̱ tese u erdoo u sha mhôôn shi ve̱ zungwe u mhôônom shi ve̱ na u bem.

3 M wuese Aôndo, un u m lu eren un icighantom er uter av mba tsev kpa yange ve eren la, shi m ngu eren u a imoshima i wang, m hôr u eren msen zamber sha ci wou tugh man atetan ga. 4 Er m lu umbur mliam ou yô, sarem tsung u nengen a we, sha er me iv a iember yô. 5 Gadia m ngu umbur er u ne jighjigh i lu sha atseregh ga yô, ka jighjigh u nan u ngôu u tamen Loisi man ngôu Yunise yange ve hii lun a mi la; we kpa m ngu a vangertiôr mer u ngu a mi.

6 Sha ityôkyaa ne yô, m ngu umbur we mer, nôngo iyua i Aôndo i yange u zua a mi zum u m penda ave sha a we la i̱ seer ken a we er ka a̱ kende usu ve u seer yeghen nahan. 7 Gadia jijingi u Aôndo a ne se la ka u se̱ lu mbaciankwagh ga, kpa ka u se̱ lu a tahav shi se̱ tesen dooshima shi se̱ eren kwagh sha kwaghfan.* 8 Nahan kunya u de kôron we u eren shiada sha kwagh u Ter, shin mo u m lu ken purusu sha kwagh na ne ga, kpa suur sha tahav mbu Aôndo, nahan lumun u yan ican sha ci u loho u dedoo. 9 A yima se shi a yila se sha u se̱ lu uicighanmbaiorov, ka sha ci u ityom i se er la ga, kpa ka sha ci u awashima na kua erdoo na u sha mhôôn. I na se kwagh ne ken Kristu Yesu ngise ngise je, 10 kpa i nenge a kwagh ne hegen wang, sha ci u Oryiman wase Kristu Yesu due ken igbar, un u a kar a tahav mbu ku u lu a mi la kera, shi a te iwanger sha kwagh u uma man mlu u kpen ga, sha loho u dedoo 11 u yange i tsuam ér m lu orpasen u man apostoli man ortesen u la.

12 Ka sha ityôkyaa ne m lu yan ican sha akaa ne kpaa ye, kpa kunya kôrom a iyol yam ga. Gadia m fa Un u m ne un jighjigh la, shi m ngu a vangertiôr mer una fatyô u kuran akaa a m ne sha ikyev na la zan zan iyange la. 13 Za hemen u dondon ikyav i kwaghôron u dedoo* u yange u ungwa hen a mo la, a jighjigh u nan man dooshima u or ka nana̱ lu ken mzough vea Kristu Yesu ve nan lu a mi la. 14 Kura kwagh u injaa u i we u sha ikyev sha icighan jijingi u a lu ken a vese la.

15 U fa er nomso mba hen tiôntar u Ashia cii ve gem ijime a mo yô, kua Fijelu man Hemojini kpaa. 16 Ter a̱ zungwe ya u Onesiforu mhôônom, gadia yange a shi taver mo ishima, kunya kôr un a iyol na sha ci u purusu u m nyer ne kpaa ga. 17 Kpa shighe u va ken gar u Roma la, a kerem sha gbashima a va zua a mo. 18 Ter Yehova* ma a zungwe un mhôônom sha iyange la. Shi ityom i yange er sha ci wam ken Efese la cii u fa i dedoo.