Mbaefese

2 Heela tseegh ga, Aôndo na ne mba uma, shin er yange ne lu kpenegh sha atindi a peren man sha asorabo nahan kpaa. 2 Yange ne zenden sha inja i* ior i tar ne, sha inja i tor u tahav mbu mbu lu sha ahumbe la, ka jijingi u a lu eren tom ken ônov mba hemban ato je la. 3 Jighilii yô, se cii yange se eren kwagh sha asaren a iyolough a ase, er ambaaior la nahan; se lu eren kwagh u iyol yase i soo la man sha mbamhen asev, nahan sha marami wase je, se lu ônov mba ve kom u iyugh i Aôndo ia va sha a ve yô, vough er mbagenev cii nahan. 4 Kpa er Aôndo a mgbough a mhôônom ma zungwen shi se doo un ishima kpishi yô, 5 a na se hide se mba uma vea Kristu imôngo, shin er yange se lu kpenegh sha atindi a peren nahan kpaa—Aôndo yima ne sha erdoo na u sha mhôôn la. 6 Heela tseegh ga, a nder se vea Kristu Yesu imôngo se mba uma, shi a ver se se tema sha ajiir a sha ken mzough vea na, 7 sha u ken tar u u* lu van la, una tese erdoo na u sha mhôôn u a ngee kpishi la, sha ci u doo un a vese, se mba se lu ken mzough vea Kristu Yesu ne.

8 Ka sha erdoo u sha mhôôn ne kpa i yima ne ye, sha ci u jighjigh u ne ne la; ka sha iniôngon yen ga, kpa ka iyua Aôndo a ne ne ye. 9 Mimi je, ka sha ityom i ne eren la ga, sha er or môm nana zua a atôakyaa a kaan ihyagh ga yô. 10 Se mba tomaveegh u Aôndo,* shi yange i gba se ken Kristu Yesu sha u se er ityom i dedoo, i Aôndo vande veren ishima ér se va er la.

11 Sha nahan yô, umbur nen ner ngise la, mba i yer ve ér “mbacôngov” la yilan ne mba ne dugh ken akuraior agen la ér, “mbapyusuv,” man icôngo ka kwagh u sha iyol, u i eren sha ave a ior yô. 12 Sha shighe la, ne lu a Kristu ga, ne lu paleghaa a tar u Iserael, ne lu ken uikyuryan mba sha kwagh u ityendezwa la ga; ne lu a ishimaverenkeghen kpaa ga, shi ne lu a Aôndo shin tar ga. 13 Kpa hegen Kristu Yesu na yô, ne mba yange ne gba ica a na la kpa ne kporom ikyua a na, sha awambe a Kristu. 14 Gadia un ka bem wase, un u a ne iniongo i ihiar la i hingir nongo môm, shi a hembe kpekpe u yange pav i la. 15 A na nagh sha iyol na, nahan kwagh u a ve a ihyom la bee, ka Atindi kua kwagh u atindi a kaa la je la, sha er una na iniongo i ihiar ne i lu ken mzough vea na, i hingir nongo môm u he,* sha u van a bem, 16 shi una hime ior mba ken iniongo i ihiar ne cii, sha u ve̱ hingir iyol i môm sha ci u Aôndo, sha ku u yange kpe sha kon* la yô; gadia a na yô, kwagh u a ve a ihyom la bee, sha nagh ku a ne sha iyol na la. 17 Shi yange va yôô loho u dedoo u bem hen ne mba ne gba ica a Aôndo la, man u bem hen mba ve lu ikyua a na la kpaa, 18 sha ci u ka sha a na ior mba ken iniongo i ihiar ne cii, ve zough a ian gbanger gbanger i zan hen Ter sha jijingi môm ye.

19 Nahan ne kera mba mba van a va man ushirmbaiorov ga, kpa ne mba marnya er uicighanmbaiorov mbagenev cii nahan, shi ne mba ior mba ken ya u Aôndo, 20 shi i maa ne sha imaagh ki i we sha mbaapostoli man uprofeti la, Kristu Yesu iyol na gema ka iwen i sha zongough ku imaagh ki i we la. 21 Ka ken a na man i lu zuan kwaghmaan la jimin cii, yemen a mi sha u a̱ hingir icighan tempel u Yehova* ye. 22 Ka ken a na ne kpa i lu maan ne imôngo vea mbagenev sha u ne̱ hingir ijiir i Aôndo una tema her sha jijingi na ye.