1 Mbakorinte

8 Sha gbaa u kwagh u i senge sha ci u akombo yô: Se cii se fa er se lu a mfe sha mi yô. Mfe ka a na or nan hingir u moron iyol, kpa dooshima yô, seer taver or ishima.* 2 Aluer or ngu henen ér nan fa kwagh yô, nan ngu a fa kwagh shon er i doo u ma nan fe la ga. 3 Kpa Aôndo ka una doo or ishima yô, a fa nan.

4 Nahan sha gbaa u kwagh u i senge sha ci u akombo yô, se fa er akombo a lu gbilinkwagh ken tar ne, shi Aôndo a lu môm tseegh yô. 5 Ior na jighjigh ér mbaaôndo mba sha man shin tar, shi “mbaaôndo” mba kpishi, “uter” kpa mba kpishi, 6 kpa se yô se fa Aôndo u mimi ngu môm tseegh, ka Ter wase, u i lu hen a na akaa cii a dugh, shi a lu sha ci na la; Ter kpa ngu môm, ka Yesu Kristu, u i gbe akaa cii sha ikyev na, shi se kpa i gbe se sha ikyev na la.

7 Nahan kpa, ka ior cii ve fe kwagh ne ga. Kpa mbagenev yange ve civir akombo, nahan ka vea ya kwagh u i senge sha ci u akombo yô, ve hen ér ve mba civir akombo, shi er imoshima ve i taver ga yô, ve hen ér i hôngor.* 8 Kpa kwaghyan una wase se u seer kporom hen Aôndo ga; sea ya kpa, kwagh a saa se ga, sea ya ga kpa, se seer kwagh ga. 9 Kpa wa nen ikyo sha er ian i ne lu a mi i tsuan kwagh u ne soo la ia hingir kwagh u nan mba ve taver ga la gbeev mbu nôngon ga yô. 10 Gadia aluer or nenge a ven, ne mba ne fe kwagh ne la, ne mba yan kwagh u ken iyou-akombo yô, imoshima i or shon u nan taver ga la ia cighir je nana hingir u yan kwagh u i senge sha ci u akombo la ga zee? 11 Nahan or u nan taver ga, u Kristu a kpe sha ci u nan la, mfe wen la gema ngu nan nan ku. 12 Aluer ne mba eren anmgbianev enev kwaghbo sha imba gbenda ne, ne na mba eren kwagh u imoshima ve i i taver ga la i yange ve u eren yô, ka Kristu ne eren un kwaghbo ye. 13 Sha nahan yô, aluer kwagh u m lu yan la ngu nan anmgbian wam gbeev mbu nôngon yô, me kera ya inyam ga kuaa, sha er me na anmgbian wam gbeev mbu nôngon ga yô.