Mpase
10 Tsô m nenge ortyom u taver iyol ugen due sha lu senen, a cir ibyeenegh iyol, ikyume lu un sha ityou, shi ishigh nagh lu er ka iyange nahan, angahar a na lu er mtôm nahan, mtôm ma shon lu er ka usu nahan, 2 shi lu a ihyurenruamabera u cuku ken uwe, i samber un. Tsô a penda nguhar nagh ku yanegh sha zegemnger, ku imesegh sha tar, 3 maa a ngor genger genger, hura er begha ka una taan kume nahan. Ngoron yô, m ungwa amo a idyuran itiankarihiar.
4 Nahan m ungwan amo a idyuran i itiankarihiar la yô, m wa iyol u ngeren kwagh shon, kpa m ungwa imo due sha, kaa ér: “Yer* akaa a idyuran i itiankarihiar la i ôr la, shi de ngeren a inya ga.” 5 Ortyom u m nenge tile sha zegemnger man tar la, kende uwegh nagh ku yanegh sha, 6 a bum Un u a lu lun uma zan zan gbem sha won, u a gbe sha kua akaa a a lu ker, man tar kua akaa a a lu ken u, man zegemnger kua akaa a a lu shimi la, a kaa ér: “A kera timbir mayange ga. 7 Kpa sha ayange a ortyom u sha utaankaruhar la una nguren wan iyol u tôngon busa na la, icighan kwaghmyer u a lu loho u dedoo u Aôndo yange yôô hen ikpan na, i i lu uprofeti la, una kure.”
8 Tsô shi m ungwa imo due sha lu ôron kwagh a mo, ér: “Za ngohol ihyurenruamabera u i samber un, u ortyom u a til sha zegemnger man tar la a lu a mi ken uwe la.” 9 Nahan m za hen ortyom la m za kaa a na mer a nam ihyurenruamabera u cuku la. Tsô a kaa a mo ér: “Ngohol, ya, una yua u shin uya,* kpa una gema a nyoho u ken zwa er iyough nahan.” 10 Tsô m ngohol ihyurenruamabera u cuku la sha uwegh nagh, m ye yô, a nyohom ken zwa er iyough nahan, kpa a gema a na iyav av yua* shimi. 11 Maa ve kaa a mo ér: “Gba keng u shi u ôr kwaghôron u profeti sha kwagh u akuraior man nongoior man ijô kua utor kpishi.”