Mpase

13 Maa a* tile sha waarawa u shin kpe zegemnger her.

Tsô m nenge inyamkyume i̱gen lu duen shin zegemnger la, i̱ lu a akor pue man ityouv itiankarihiar, ader a tor pue lu sha akor la, ati a lahan Aôndo gema lu sha ityouv mbi i̱. 2 Inyamkyume shon i̱ m nenge a mi ne lu er ka anyam nahan, kpa angahar a i̱ gema lu er ka a biya* nahan, shi zwa u i̱ lu er ka zwa u begha nahan. Tsô derakon la na inyamkyume la tahav nav man ikyônough ki torough nagh, kua tahav mbu vesen mbu hemen.

3 Tsô m nenge ityough ki inyamkyume la ki môm lu er i gber ki javer javer nahan. Kpa ajagba-ivav u i̱ la bee, nahan ior mba sha tar cii dondo inyamkyume la, kpiligh ve iyol a i̱. 4 Nahan ve civir derakon la sha ci u tahav mbu a ne inyamkyume ne la, shi ve civir inyamkyume shon, ve kaa ér: “Ka an nan lu er inyamkyume ne nahana? Man ka an nana fatyô u nôngon ityav a ii?” 5 I na i̱ zwa u ôron uzegembaakaav shi lahan uicighanmbaakaav, shi i na i̱ tahav mbu eren kwagh u i̱ soo la iwer 42. 6 Tsô i̱ bugh zwa, i̱ ôr akaa sha Aôndo dang dang, sha u lahan iti na kua ijiir na i teman, man mba ve tem sha la je kpaa. 7 I na i̱ ian i nôngon ityav a uicighanmbaiorov hemban ve ityav, shi i na i̱ tahav sha hanma ipyaven man hanma nongoior man hanma zwa man hanma ikyurior. 8 Shi ior mba ve tem sha tar cii vea civir i̱. Hii sha shighe u i lu gban tar la je, mba a nger iti i mô ve môm ken ihyurenruamabera u uma u Waniyôngo u yange i sôngo un la ga.

9 Or u nan lu a ato yô, nana̱ ungwa. 10 Aluer gba u a yem a or uikyangen yô, nana yem ken uikyangen. Aluer ka* u a wua or sha sanker yô, ka sha sanker a wua nan ye. Ka nahan ve i gbe u uicighanmbaiorov vea taver ishima shi vea lu a jighjigh u nan ye.

11 Tsô shi m nenge inyamkyume i̱gen lu duen shin tar, i̱ lu a akor ahar er ka waniyôngo nahan, kpa i̱ gema i̱ lu ôron kwagh er ka derakon nahan. 12 I̱ lu eren tahav mbu inyamkyume i̱ hiihii la cii sha ishigh ki inyamkyume shon. Shi i̱ na yô, tar man mba ve tem sha u la lu civir inyamkyume i̱ hiihii, i̱ ajagba-ivav u i̱ bee la. 13 I̱ lu eren uivande mba kpilighyol, je yô, i̱ er usu lu duen sha senen shin tar sha ishigh ki uumace.

14 I̱ lu tsughun ior mba ve tem sha tar la, sha ci u uivande mba i na i̱ ian i̱ lu eren sha ishigh ki inyamkyume la, i̱ gema i̱ lu kaan a mba ve tem sha tar la ér ve er eev mbu* inyamkyume i̱ yange i gber i̱ sanker kpa i̱ war la. 15 Shi i na i̱ ian ér i̱ na eev mbu inyamkyume la iôôn, sha er eev mbu inyamkyume shon mbua lam, shi mbua wua mba ve vende u civir eev mbu inyamkyume shon cii yô.

16 I̱ lu kighir ior cii—mbakiriki kua mbavesen, mbanyarev man mbaibanave man mba ve lu ikpan ga yô, kua ikpan—ér i̱ ver ve ikyav sha uwegh vev ku yanegh gayô sha icul, 17 shi or môm nana̱ de fetyô u yamen kwagh shin teen kwagh ga, saa or u nan lu a ikyav la tseegh, ka iti i inyamkyume shon, shin namba u iti i i̱ shon je la. 18 Saa or a lu a kwaghfan ve nana kav kwagh ne ye: Or u nan lu a mkav yô, nana̱ er ayenge nana̱ fa namba u inyamkyume la, gadia ka namba u orumace* je, man namba u i̱ la ka 666.